រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា បានឲ្យដឹងថា វិស័យធនាគារ និងហិរញ្ញវត្ថុកម្ពុជាកាន់តែមានទំនុកចិត្តខ្ពស់ពីវិនិយោគិនជាតិ និងអន្តរជាតិ ពិសេស វត្តមាននៃធនាគារពាណិជ្ជ ដែលទទួលបានអាជ្ញាប័ណ្ណពីធនាគារជាតិនៃកម្ពុជា កំពុងតែចូលរួមចំណែកពង្រឹងជំនឿទុកចិត្តបន្ថែមទៀត ខណៈបច្ចុប្បន្ននេះ ធនាគារពាណិជ្ជនៅកម្ពុជាមានចំនួន៣៩ធនាគារ ។
ថ្លែងក្នុងពិធីប្រគល់អាជ្ញាប័ណ្ណដល់ធនាគារពាណិជ្ជមួយមកពីហុងកុង កាលពីថ្ងៃទី២២ កក្កដា លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើងថា វត្តមាននៃធនាគារពាណិជ្ជនាថ្ងៃនេះ បានឆ្លុះបញ្ចាំងពីជំនឿទុកចិត្ត ការគាំទ្រ និងការចូលរួមចំណែកកាន់តែច្រើនរបស់វិនិយោគិនបរទេសមកលើវិស័យធនាគារ និងហិរញ្ញវត្ថុកម្ពុជា ដែលជាទិសដៅមួយនៃគោលនយោបាយអភិវឌ្ឍន៍វិស័យធនាគារ និងហិរញ្ញវត្ថុរបស់កម្ពុជា ។
លោកទេសាភិបាលថ្លែងថា ៖« ធនាគារពាណិជ្ជដែលទទួលបានអាជ្ញាប័ណ្ណធ្វើអាជីវកម្មនៅថ្ងៃនេះ បានចូលរួមចំណែកពង្រឹងជំនឿទុកចិត្តលើវិស័យធនាគារ និងហិរញ្ញវត្ថុរបស់កម្ពុជា ហើយក្នុងនាមជាអាជ្ញាធរ អាណាព្យាបាល យើងនឹងបន្តរៀបចំក្របខ័ណ្ឌច្បាប់ បទប្បញ្ញត្តិ និងកែសម្រួលឡើងវិញនូវបទដ្ឋានគតិយុត្តនានា ដែលមានស្រាប់ បង្កើតបទប្បញ្ញត្តិថ្មីៗដែលចាំបាច់ឱ្យស្របតាមស្តង់ដាអន្តរជាតិ ព្រមទាំងពង្រីកការត្រួតពិនិត្យកិច្ចការពារអតិថិជន ដើម្បីទទួលបានជំនឿទុកចិត្តពីសាធារណជនមកលើប្រព័ន្ធធនាគារ » ។
លោក ជា ចាន់តូ គូសបញ្ជាក់ថា ៖«គ្រឹះស្ថានធនាគារបន្តរីកចម្រើនគួរឱ្យកត់សម្គាល់ ។ ជាក់ស្តែង ទ្រព្យសកម្មរបស់គ្រឹះស្ថានធនាគារកើនដល់១២៥,២ទ្រីលានរៀល ស្មើនឹងប្រមាណ៣១ប៊ីលានដុល្លារ ដែលក្នុងនោះមានឥណទានប្រមាណ៥៦,៤% ចំណែកឯដើមទុនរបស់គ្រឹះស្ថានក៏មានភាពរឹងមាំដែរ ហើយគ្រឹះស្ថានបានកៀរគរប្រាក់បញ្ញើដល់៧៧,៤ទ្រីលានរៀល ស្មើនឹងប្រមាណ១៩ប៊ីលានដុល្លារ ដែលបានរួមចំណែកជាច្រើនដល់ការពង្រីកអន្តរការីយកម្ម ហិរញ្ញវត្ថុ ។ គ្រឹះស្ថានធនាគារបានពង្រីកការផ្តល់សេវាឱ្យកាន់តែទូលំទូលាយ និងមានភាពងាយស្រួលជាងមុន តាមរយៈការពង្រីកសាខារហូតដល់៨៦២សាខា, ម៉ាស៊ីនដកប្រាក់ និងដាក់ប្រាក់ស្វ័យប្រវត្តិ(ATM)ដល់១.៥៩៣ម៉ាស៊ីន, ការប្រើប្រាស់ប័ណ្ណឥណទាន និងឥណពន្ធមានការកើនឡើងគួរឱ្យកត់សម្គាល់ផងដែរ » ។
យោងតាមរបាយការណ៍របស់ធនាគារជាតិនៃកម្ពុជា បង្ហាញថា គិតមកត្រឹមឆមាសទី១ឆ្នាំនេះ ប្រទេសកម្ពុជា មានធនាគារពាណិជ្ជចំនួន៣៩ ក្នុងនោះសាខាធនាគារបរទេស១២, ធនាគារក្នុងស្រុក១២ និងបុត្រសម្ព័ន្ធធនាគារចំនួន១៥ ៕
ចែករំលែកព័តមាននេះ