ការហាត់ប្រាណពេញមួយជីវិត មិនត្រឹមតែជួយឱ្យសុខភាពបេះដូងបានល្អប្រសើរនិងរាងកាយសមសួនប៉ុណ្ណោះទេ ប៉ុន្តែថែមទាំងជួយបង្កើនថាមពលខួរក្បាលទប់ស្កាត់បានជំងឺភ្លេចភ្លាំងទៀតផង ។ការសិក្សាដែលធ្វើឡើងដោយសាកលវិទ្យាល័យ King’s College Londonចក្រភពអង់គ្លេសបានបង្ហាញថា ការធ្វើសកម្មភាពរាងកាយឱ្យបានទៀងទាត់ពី៤ដងឡើងទៅក្នុងមួយសប្តាហ៍ចាប់ពីវ័យកុមារភាព (អាយុ១១ឆ្នាំឡើងទៅ) នឹងជួយធ្វើឱ្យល្អប្រសើរដល់ថាមពលខួរក្បាល១/៣ ពេលឈានដល់វ័យ៥០ឆ្នាំ ។
ការសិក្សាដែលចំណាយពេល៤០ឆ្នាំលើក្មេងអាយុចាប់ពី១១ឆ្នាំឡើងប្រមាណជាង៩ពាន់នាក់បានបង្ហាញថា ក្រុមដែលហាត់ប្រាណទៀងទាត់រាល់សប្តាហ៍ មុខងារយល់ដឹងខួរក្បាលរបស់គេបានល្អប្រសើរច្រើននៅពេលឈានដល់វ័យ៥០ឆ្នាំ ធៀបទៅនឹងក្រុមដែលហាត់ប្រាណ២ឬ៣ដងក្នុងមួយខែ ។ សម្រាប់បុរស ថាមពលខួរក្បាលរបស់គេបានល្អប្រសើរដល់១/៣ខណៈស្ត្រីបាន២៥ភាគរយ ។
អ្នកដឹកនាំការសិក្សា វេជ្ជបណ្ឌិត Alex Dreganបានថ្លែងថា៖«លទ្ធផលនៃការសិក្សាស្រាវជ្រាវនេះបង្ហាញថា ការធ្វើសកម្មភាពរាងកាយណាមួយគឺសុទ្ធតែផ្តល់អត្ថប្រយោជន៍ដល់មុខងារយល់ដឹង ។ ការណែនាំក្នុងពេលបច្ចុប្បន្នគឺតម្រូវឱ្យយើងហាត់ឱ្យបាន៣០នាទី និង៥ដងក្នុងមួយសប្តាហ៍ ។ ប៉ុន្តែតាមលទ្ធផលលើកនេះបញ្ជាក់ថា យើងមិនចាំបាច់ធ្វើច្រើនដូច្នោះទេ ។ ផ្ទុយមកវិញ ការធ្វើសកម្មភាពរាងកាយតែម្តងក្នុងមួយសប្តាហ៍ក៏ទទួលបានផលដែរ ។
សម្រាប់បុរសដែលហាត់ប្រាណទៀងទាត់ អត្រាចុះថយមុខងារយល់ដឹងរបស់គេនៅពេលឈានដល់វ័យ៥០ឆ្នាំកាត់បន្ថយបាន១/៣ខណៈស្ត្រីបាន១/៤ »។ លោកវេជ្ជបណ្ឌិតបានបន្ថែមថា ៖«អត្ថប្រយោជន៍នៃការហាត់ប្រាណនឹងបង្ហាញឱ្យឃើញពិតប្រាកដនៅពេលយើងឈានដល់វ័យ៥០ឆ្នាំឡើងទៅ ។ យ៉ាងណាក៏ដោយ គេមិនគួរចាប់ផ្តើមការហាត់ប្រាណជាលើកដំបូងដោយប្រើកម្លាំងខ្លាំងនិងរយៈពេលយូរឡើយ »៕
ចែករំលែកព័តមាននេះ