ខេត្តស្ទឹងត្រែង ៖ នៅព្រឹកថ្ងៃទី២៤ ខែកក្កដា ឆ្នាំ២០១៨ សពបុរសម្នាក់ត្រូវបានក្រុមគ្រួសាររៀបចំធ្វើបុណ្យតាមប្រពៃណីនៅលំស្ថានភូមិផាបាំង ឃុំថ្មកែវ ស្រុកសៀមប៉ាង បន្ទាប់ស្លាប់ក្នុងឈាមដោយសារសត្វក្របីវ័ធ ។
ប្រភពព័ត៌មានអោយដឹងថា មុនពេលកើតហេតុជនរងគ្រោះបានបណ្តើរក្របីចុះទន្លេ និងឡើងទូកដើម្បីនាំចេញទៅក្រៅស្រុកតែគ្រាបណ្តើរខ្សែចងក្របីបានទាក់ជាមួយនឹងដើមឈើ គ្រានោះជនរងគ្រោះបានប្រើកាំបិតកាត់ផ្តាច់ខ្សែក្របីផ្អើលរត់គេចឃើញដូច្នេះជនរងគ្រោះបានដេញតាមចាប់ពីក្រោយក៏ត្រូវក្របីវ័ធបណ្តាលអោយស្លាប់នៅនឹងកន្លែង ។
លោក ជឹម អេន អធិការស្រុកសៀមប៉ាងអោយដឹងថា ជនរងគ្រោះឈ្មោះ ផាន់ ធុយ ភេទ ប្រុស អាយុ៣៤ឆ្នាំ ជនជាតិខ្មែរ មុខរបរកសិករ រស់នៅភូមិផាបាំង ឃុំថ្មកែវ ស្រុកសៀមប៉ាង ។
លោកបន្តថាជនរងគ្រោះជាអ្នកស៊ីឈ្នួលដឹកក្របីអោយឈ្មួញកណ្តាលហើយមុនពេលកើតហេតុជនរងគ្រោះបានបណ្តើរក្របីចុះទូកតែដោយសារជាប់ខ្សែជាមួយដើមឈើជនរងគ្រោះយកកាំបិតទៅកាត់ផ្តាច់ខ្សែក្របីផ្អើលរត់សំដៅទៅផ្ទះរបស់វាវិញហើយជនរងគ្រោះបានដេញតាមចាប់ពីក្រោយលុះបាត់មួយសន្ទុះធំគេប្រទះឃើញម្ចាស់ក្របីបណ្តើរសត្វក្របីនោះមកវិញតែបាត់ជនរងគ្រោះទើបនាំគ្នាដើររកក៏ប្រទះឃើញស្លាប់ក្នុងថ្លុកឈាមដោយមានដានជើងក្របីជាន់សុះដីក្បែសាកសព ។
ប្រភពព័ត៌មានពីម្ចាស់សត្វក្របីអោយដឹងថា ក្របីនោះមានចរឹតកាចបន្តិចហើយមានតែម្ចាស់របស់ប៉ុណ្ណោះដែលអាចគ្រប់គ្រងវាបានបើជាអ្នកដទៃលុះត្រាចេះថ្នាក់ថ្នមវាតែបើសិនចាប់អូសទាញវាទាំងទទឹងទទែងវានឹងវ័ធមិនខាន ។
មន្ត្រីនគរបាលប៉ុស្តិ៍រដ្ឋបាលបានពិនិត្យលើសាកសពជនរងគ្រោះត្រូវសត្វក្របីវ័ធចំគល់ថ្គាមខាងឆ្វេង និងលើចិញ្ចើមខាងស្តាំបណ្តាលអោយស្លាប់នៅនឹងកន្លែង ក្រោយធ្វើកោសល្យវិច្ច័យរួចរាល់មន្ត្រីនគរបាលបានប្រគល់សពជូនគ្រួសារសាច់ញាតិនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ