រាជធានីភ្នំពេញ ៖ ប្រមុខជាន់ខ្ពស់ក្រសួងការពារជាតិអះអាងថា បេសកកម្មរបស់កងកម្លាំងរក្សាសន្តិភាពកម្ពុជា នៅពេលនេះជាការបង្ហាញពីឆន្ទៈដ៏មោះមុតរបស់កម្ពុជាក្នុងការសម្តែងនូវសាមគ្គីភាព ជាលក្ខណៈអន្តរជាតិ ក្នុងការរួមវិភាគទានដល់កិច្ចខិតខំប្រឹងប្រែងរបស់សហគមនអន្តរជាតិ ដើម្បីបុព្វហេតុសន្តិភាព សន្តិសុខ និងមនុស្សធម៌នៅលើលោក ។
នៅល្ងាចថ្ងៃទី២៣ ខែកក្កដា ឆ្នាំ២០១៨ ក្នុងពិធីបំពាក់មេដាយដល់កងកម្លាំងមួកខៀវកម្ពុជា បានបញ្ចប់បេសកកម្មរបស់ខ្លួនរយៈពេល១ឆ្នាំនៅ សាធារណរដ្ឋស៊ូដង់ខាងត្បូង និងពីសាធារណរដ្ឋម៉ាលី នៅទីស្តីការគណៈរដ្ឋមន្ត្រីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្លែងថា «ការបញ្ចប់បេសកកម្មរបស់កងកម្លាំងរក្សាសន្តិភាពកម្ពុជា ជាង៣០០នាក់នេះគឺបង្ហាញពីឆន្ទៈដ៏មោះមុតរបស់កម្ពុជាក្នុងការចូលរួមបំពេញបេសកកម្មអង្គការសហប្រជាជាតិ ហើយកម្លាំងកម្ពុជាក៏បានទទួលស្នាដៃដ៏ធំធេងលើឆាកអន្តរជាតិផងដែរពីបុព្វហេតុសន្តិភាព សន្តិសុខ និងមនុស្សធម៌នៅលើលោក» ។
សម្តេចពិជ័យសេនាបានបន្តថា ការនិវត្តន៍របស់កងកម្លាំងរបស់កម្ពុជាពេលនេះសបញ្ជាក់ឱ្យឃើញពីសមត្ថភាព និងសក្តានុពលដ៏ខ្លាំងខ្លារបស់កងយោធពលខេមរភូមិន្ទក្នុងការធ្វើសមាហរណកម្មចូលក្នុងប្រព័ន្ធពហុជាតិរបស់អង្គការសហប្រជាជាតិ និងជាការបង្ហាញ ពីកិច្ចខិតខំរបស់ក្រសួង ការពារជាតិ គណៈកម្មការជាតិ ក្រសួងស្ថាប័ន និងគ្រប់កងឯកភាពនៅក្នុងកងយោធពលខេមរភូមិន្ទដែលបានរួមគ្នារៀបចំការងារគ្រប់ផ្នែកទាំងធនធានមនុស្ស ឧបករណ៍ មធ្យោបាយ និងធ្វើការហ្វឹកហ្វឺនជាប្រចាំ តាមនិយាមរបស់អង្គការសហប្រជាជាតិផងដែរ ។
លោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌកជាតិរក្សាសន្តិភាពថ្លៃងថា «កម្លាំងមួកខៀវបានបំពាក់មេដាយកងវិស្វកម្មថ្ងៃនេះគឺមានកងកម្លាំងវិស្វកម្មព្រលានយន្តហោះ លេខ១៨៩ ចំនួន១៦៥រូប, កងកម្ទេចគ្រាប់មិនទាន់ផ្ទុះលេខ១២៣ ចំនួន១៤៤រូប មកពីប្រទេសម៉ាលី និងកងរាជ អាវុធហត្ថលេខ៦១៨ ពីប្រទេសស៊ូដង់ខាងត្បូងចំនួន៧៣រូប» ។
សូមបញ្ជាក់ថា ឆ្នាំ២០១៨នេះគឺជាឆ្នាំទី១២ហើយដែលកម្ពុជាបានបញ្ជូនកងកម្លាំងទៅចូលរួមបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិជាមួយប្រទេសចំនួន១២៣នៅលើពិភពលោក ។ អ្វីដែលជាមោទនភាពនោះ មកដល់បច្ចុប្បន្នកម្ពុជាបានបញ្ចូនកម្លាំងចូលរួមបំពេញបេសកកម្មចំនួន៨ប្រទេសរួមមាន សាធារណរដ្ឋស៊ូដង់ខាងត្បូង, ស៊ូដង់, លីបង់, សាយប្រឺស, ស៊ីរី, ឆាដ, ម៉ាលី, និង អាហ្វ្រិកកណ្តាល សរុបចំនួន ៥,២៥៧នាក់ លើជំនាញបោសសំអាតមីន កំទេចគ្រាប់មិនទាន់ផ្ទុះ អាវុធហត្ថ មន្ទីរពេទ្យកម្រិត២ វិស្វកម្មសំណង់ វិស្វកម្មព្រលានយន្តហោះ នាយទាហានសេនាធិការ និង សង្កេតការណ៍ ៕
ចែករំលែកព័តមាននេះ