រាជធានីភ្នំពេញ ៖ រយៈពេល៥ឆ្នាំចុងក្រោយនេះ ភ្ញៀវទេសចរជាតិបានធ្វើដំណើរកម្សាន្ដតាមតំបន់គោលដៅទេសចរណ៍នានានៅទូទាំងប្រទេសកើនឡើងជាបន្ដបន្ទាប់ គិតជាមធ្យម៦%ក្នុង១ឆ្នាំ ដែលបានបង្កើតការងារ និងផ្ដល់ចំណូលដល់ប្រជាពលរដ្ឋក្នុងមូលដ្ឋានយ៉ាងច្រើន ។
ដោយមើលឃើញភ្ញៀវទេសចរក្នុងស្រុកមានសារសំខាន់ក្នុងការរួមចំណែកលើកស្ទួយសេដ្ឋកិច្ចសង្គម ក្រសួងទេសចរណ៍បាននិងកំពុងជំរុញចលនាទេសចរណ៍ក្នុងស្រុកឱ្យកើនឡើងថែមទៀត ស្របតាមចក្ខុវិស័យកម្ពុជាទទួលបានទេសចរក្នុងស្រុក ចំនួន១៩លាននាក់នៅឆ្នាំ២០២៥ ។ ថ្លែងនៅក្នុងពិធីបើកពិព័រណ៍ទេសចរណ៍ក្នុងស្រុក លើកទី១ ឆ្នាំ២០១៨ កាលពីថ្ងៃទី២០ កក្កដា នៅកោះពេជ្រ លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ទេសចរណ៍ក្នុងស្រុកជាចលករយ៉ាងសំខាន់ ដើម្បីជំរុញប្រជាពលរដ្ឋឱ្យដឹងពីសក្តានុពល និងចេះស្រឡាញ់ទឹកដី ។ ទន្ទឹមនឹងនេះ ទេសចរណ៍ក្នុងស្រុកជាឧបករណ៍ធ្វើឱ្យតំបន់ទេសចរណ៍ថ្មីៗដែលមិនសូវមានភាពល្បីល្បាញ ទទួលបានការចាប់អារម្មណ៍ និងដំណើរការទៅមុខសម្រាប់បម្រើឱ្យវិស័យទេសចរណ៍ ។
លោកបន្ដថា ៖« ដើម្បីសម្រេចបានចក្ខុវិស័យជំរុញទេសចរក្នុងស្រុកឱ្យកើនឡើងដល់១៩លាននាក់ក្នុងឆ្នាំ២០២៥ ក្រសួងទេសចរណ៍ បានសហការជាមួយក្រសួង-ស្ថាប័នពាក់ព័ន្ធ និងផ្នែកឯកជនក្នុងវិស័យទេសចរណ៍ កំពុងសិក្សារៀបចំដាក់ចេញនូវគោលនយោបាយកម្មវិធី «កម្ពុជាមាតុភូមិខ្ញុំ» ក្រោមពាក្យស្លោក «ទាំងអស់គ្នាអាចធ្វើដំណើរកម្សាន្តបាន» និងបង្កើតកម្មវិធីប័ណ្ណដំណើរកម្សាន្ត ដែលមានកញ្ចប់ទស្សនកិច្ចក្នុងស្រុកមានតម្លៃសមរម្យ ដើម្បីលើកទឹកចិត្តដល់សិស្ស-និស្សិត សាស្ត្រាចារ្យ មន្ត្រីរាជការ កម្មករ-កម្មការិនី និងកីឡាករ-កីឡាការិនី អាចធ្វើដំណើរកម្សាន្តឱ្យបានយ៉ាងហោចណាស់១ដងក្នុង១ឆ្នាំ » ។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា ក្រោមកិច្ចសហការជាមួយក្រសួងទេសចរណ៍ និងក្រសួងពាក់ព័ន្ធ សមាគមបានរៀបចំពិព័រណ៍ទេសចរណ៍កម្ពុជានេះ ក្រោមប្រធានបទ «កំណប់ទ្រព្យទេសចរណ៍កម្ពុជា»ក្នុងគោលបំណងផ្សព្វផ្សាយផលិតផលទេសចរណ៍ ឱ្យបានទូលំទូលាយដល់ប្រជាពលរដ្ឋកម្ពុជាបានឈ្វេងយល់កាន់តែច្បាស់ និងដើម្បីចូលរួមចំណែកអនុវត្តយុទ្ធសាស្ត្រ និងគោលនយោបាយរបស់រដ្ឋាភិបាលកម្ពុជា ដើម្បីជំរុញ និងពង្រីកគោលដៅទេសចរណ៍នានាក្នុងព្រះរាជាណាចក្រកម្ពុជាទាំង២៥ខេត្ត-ក្រុង ។
លោកជំទាវថ្លែងថា ៖« ពិព័រណ៍នេះលើកទឹកចិត្តឱ្យប្រជាពលរដ្ឋឈ្វេងយល់បន្ថែមពីសក្តានុពល និងទទួលបានព័ត៌មានពីបច្ចុប្បន្នភាពទេសចរណ៍ទាំងក្នុងនិងក្រៅប្រទេស ក៏ដូចជាការប្រមូលផ្តុំរវាងអ្នកផលិតជួបអ្នកផលិត អ្នកផ្គត់ផ្គង់ផ្ទាល់ជាមួយអ្នកផ្គត់ផ្គង់បន្ត និងជាមួយអ្នកប្រើប្រាស់សេវាកម្មផ្ទាល់ » ។
តំណាងបណ្តាញស្ត្រីអាជីវកម្មខ្នាតតូចខេត្តក្រចេះបានឱ្យដឹងថា មួយរយៈចុងក្រោយនេះសហគមន៍អេកូទេសចរណ៍នៅប៉ែកឦសាន ទទួលបានការគាំទ្រគួរឱ្យកត់សម្គាល់ពីភ្ញៀវទេសចរជាតិ-អន្តរជាតិ ។
កញ្ញា ប៊ុន ណារុំ តំណាងបណ្ដាញស្ត្រីរូបនេះបាននិយាយថា ៖« ដោយសារកំណើនភ្ញៀវទេសចរទៅកម្សាន្តនៅតាមតំបន់ទេសចរណ៍កើនឡើង ធ្វើឲ្យការអាជីវកម្មខ្នាតតូចនៅតាមតំបន់មួយចំនួនមានសកម្មភាពល្អប្រសើរ ក្នុងនោះខេត្តក្រចេះមានផលិតផលដូចជា ក្រូចថ្លុងដែលទើបនឹងទទួលស្គាល់ជាផលិតផលសម្គាល់ភូមិសាស្ត្រកាលពីពេលថ្មីៗនេះ, ណែម និងនំក្រឡានដែលភ្ញៀវទេសចរជាតិភាគចូលចិត្តទទួលទាន និងទិញផ្ញើបងប្អូន »។ កញ្ញាបន្ដថា ៖« ភ្ញៀវទេសចរជាតិ ពិតជាបានរួមចំណែកក្នុងការអភិវឌ្ឍតំបន់គោលដៅទេសចរណ៍តាមរយៈការបែងចែកចំណូល និងផលចំណេញ និងបន្ថែមគុណតម្លៃឲ្យតំបន់ទាំងនោះ »។
យោងតាមក្រសួងទេសចរណ៍ កំណើនភ្ញៀវទេសចរជាតិមានការកើនឡើងជាលំដាប់ពីមួយឆ្នាំទៅមួយឆ្នាំជាមធ្យម៦%។ ជាក់ស្តែង នៅឆ្នាំ២០១៥ ទេសចរក្នុងស្រុកមានចំនួនជាង៩,៦លាននាក់ កើនដល់ជាង១០លាននាក់នៅឆ្នាំ២០១៦ និងជិត១១លាននាក់នៅឆ្នាំ២០១៧ ហើយជាចក្ខុវិស័យក្រសួងទេសចរណ៍រំពឹងថា នឹងមានទេសចរប្រមាណ១៩លាននាក់នៅឆ្នាំ២០២៥ ៕
ចែករំលែកព័តមាននេះ