រាជធានីភ្នំពេញ ៖ ដោយសារភ្លៀងធ្លាក់តាំងពីដើមឆ្នាំរហូតមក និងធ្លាក់ជាប់ៗគ្នាជាប្រចាំ បានធ្វើឲ្យការផលិតអំបិលរបស់កម្ពុជា ត្រូវខូចខាតស្ទើរទាំងស្រុង ។ នៅឆ្នាំ២០១៨នេះ កម្ពុជាត្រូវពឹងលើការនាំចូលពីប្រទេសជិតខាង ដើម្បីមកបំពេញតម្រូវការ…
រាជធានីភ្នំពេញ ៖ ដោយសារភ្លៀងធ្លាក់តាំងពីដើមឆ្នាំរហូតមក និងធ្លាក់ជាប់ៗគ្នាជាប្រចាំ បានធ្វើឲ្យការផលិតអំបិលរបស់កម្ពុជា ត្រូវខូចខាតស្ទើរទាំងស្រុង ។ នៅឆ្នាំ២០១៨នេះ កម្ពុជាត្រូវពឹងលើការនាំចូលពីប្រទេសជិតខាង ដើម្បីមកបំពេញតម្រូវការ ស្របពេលតម្លៃនៅលើទីផ្សារបានចាប់ផ្ដើមឡើងស្រឺតៗ ព្រោះតែការផ្គត់ផ្គង់មិនគ្រប់តាមតម្រូវការ ។
យោងតាមលោក ខាត់ សាមឿន ផលិតករអំបិលលើផ្ទៃដីជាង៣០ហិកតានៅខេត្តកំពត បានមានប្រសាសន៍តាមទូរស័ព្ទថា ឆ្នាំនេះ ទិន្នផលអំបិលដែលផលិតនៅក្នុងទឹកដីខេត្តកំពតស្ទើរតែធ្លាក់ដល់សូន្យ ខណៈឆ្នាំមុនៗទទួលបានលើសផែនការរបស់សហគមន៍កំណត់ ។ លោកថា ៖« ការផលិតអំបិលនៅកម្ពុជាបច្ចុប្បន្ននេះ គឺធ្វើទៅតាមប្រពៃណីសុទ្ធសាធ ដែលត្រូវពឹងលើកំដៅថ្ងៃ ហើយបើសិនជាអាកាសធាតុមិនអំណោយផល មិនមានកំដៅថ្ងៃគ្រប់គ្រាន់ ជាពិសេស ភ្លៀងធ្លាក់រាល់ថ្ងៃដូចបច្ចុប្បន្ន គឺអំបិលមិនកើតនោះទេ ហើយបើទោះបីជាទទួលបាន ក៏មិនល្អដែរ » ។
លោកបន្តថា កាលពីឆ្នាំមុនៗ ទិន្នផលអំបិលហាក់មានភាពល្អប្រសើរ ដោយក្នុង១ហិកតាអាចទទួលបានប្រមាណ៣តោន ឬលើសនេះ តែបច្ចុប្បន្ន ផ្ទៃដីផលិតអបិលរបស់លោកជាង៣០ហិកតា ទទួលបានតែជាង៣តោនប៉ុណ្ណោះ ។ ដូចនេះ គឺធ្លាក់ចុះខ្លាំង និងទាមទារឲ្យមានការនាំចូលពីប្រទេសជិតខាង ដើម្បីមកបំពេញតម្រូវការប្រើប្រាស់ក្នុងស្រុក ។ លោកបន្ថែមថា ស្របពេលដែលទិន្នផលអំបិលបានធ្លាក់ចុះខ្លាំងដូចនេះ បានធ្វើឲ្យតម្លៃអំបិលកើនឡើងខ្ពស់ផងដែរ ។ ជាក់ស្ដែងកាលពីមុន ក្នុង១បាវតម្លៃត្រឹមតែ១២.០០០ឬ១៣.០០០រៀលប៉ុណ្ណោះ តែពេលនេះ វាបានកើនឡើងដល់ជិត២០.០០០រៀល ឬលើសពីនេះក្នុង១បាវ ខណៈដែលឃ្លាំងរបស់ផលិតករស្ទើរតែគ្រប់គ្នា នៅពេលនេះត្រូវបានបញ្ចេញលក់អស់ហើយ ។
លោក លី សេង សហប្រធានសហគមន៍ផលិតអំបិលខេត្តកំពត បានមានប្រសាសន៍ដែរថា បច្ចុប្បន្ននេះ ផលិតករ ក៏ដូចជាសហគមន៍ កំពុងតែបញ្ចេញលក់អំបិលដែលនៅសេសសល់កាលពីឆ្នាំមុនៗទៅកាន់ទីផ្សារក្នុងស្រុក ក៏ប៉ុន្តែអំបិលដែលនៅសេសសល់នោះមិនអាចគ្រប់គ្រាន់ ឬផ្គត់ផ្គង់បានគ្រប់១ឆ្នាំពេញទេ ។ អីចឹង ត្រូវការនាំចូលពីខាងក្រៅ ដើម្បីបំពេញសេចក្តីត្រូវការរបស់អ្នកប្រើប្រាស់ ។ លោកនិយាយថា ៖« អំបិលដែលនៅសេសសល់អាចផ្គត់ផ្គង់បានយ៉ាងយូរត្រឹមខែតុលាប៉ុណ្ណោះ ខណៈឆ្នាំនេះ រដូវវស្សាអាចអូសបន្លាយពេលយូរ ដូចនេះ ការចាប់ផ្ដើមផលិតអំបិល អាចនឹងអូសបន្លាយទៅតាមនោះដែរ » ។
លោកបន្តថា ឆ្នាំនេះ ផលិតករផលិតអំបិលក្នុងខេត្តកំពត កំពុងតែខាតបង់យ៉ាងច្រើន ដោយសារតែយកលុយពីមីក្រូហិរញ្ញវត្ថុ និងធនាគារ ដើម្បីមករៀបចំស្រែផលិតអំបិល ក៏ប៉ុន្តែក្រោយពេលដែលបានរៀបចំស្រែ និងបញ្ចូលទឹករួចរាល់ហើយ ក៏ស្រាប់តែភ្លៀងបន្តធ្លាក់ជាប់ៗគ្នាតាំងពីដើមឆ្នាំមក ទើបធ្វើឲ្យអំបិលក្នុងស្រែ ដែលហៀបនឹងប្រមូលផលទៅហើយ នោះ ត្រូវខូចខាតទាំងស្រុង ។ លោកបញ្ជាក់ថា ពាក់ព័ន្ធនឹងអំបិលឡើងថ្លៃ ក្នុងពេលដែលទិន្នផលអំបិលឆ្នាំនេះធ្លាក់ចុះយ៉ាងគំហុក គឺជារឿងធម្មតា ព្រោះបើកាលណាផលិតផលតិច តែមានតម្រូវការច្រើន នឹងធ្វើឲ្យផលិតផលនោះឡើងថ្លៃ ។ ម្យ៉ាងវិញទៀត ការឡើងថ្លៃប៉ុណ្ណេះ ក៏ជាដំណោះស្រាយមួយដែលអាចជួយឲ្យផលិតករទប់ស្កាត់នឹងការខាតបង់សម្រាប់ឆ្នាំនេះដែរ ។
លោកបន្ថែមថា ៖« បច្ចុប្បន្ននេះ អំបិលដែលលក់ចេញពីឃ្លាំង អាចមានតម្លៃរហូតដល់៧០ដុល្លារអាមេរិកក្នុង១តោន ហើយវានឹងឡើងថ្លៃថែមទៀត បើសិនជាតម្រូវការកាន់តែខ្ពស់ ស្របពេលផលិតផលកាន់តែតិច » ។ យោងតាមប្រធានការិយាល័យរដ្ឋបាលអំបិលកំពត-កែប លោក អ៊ុំ ឈុន បានប្រាប់កោះសន្តិភាពកន្លងមកថា ៖« ឆ្នាំនេះ សមាគមបានស្នើទៅរាជរដ្ឋាភិបាលសម្រាប់នាំចូលអំបិលមកផ្គត់ផ្គង់ក្នុងប្រទេស ដោយយើងបានពិភាក្សាគ្នាជាមួយខេត្តថា នឹងដាក់ស្នើទៅប្រទេសថៃ ចំនួន៣ទៅ៤ម៉ឺនតោន ខណៈពេលដែលអំបិលសព្វថ្ងៃ មាននៅក្នុងស្តុកប្រហែលជា៤ទៅ៥ម៉ឺនតោនប៉ុណ្ណោះ » ។
គួរបញ្ជាក់ផងដែរថា អំបិលកម្ពុជា ក៏ត្រូវទទួលស្គាល់ជាអំបិលដែលមានគុណភាព និងបាននាំចេញទៅកាន់ទីផ្សារអន្តរជាតិជាច្រើនផងដែរ ដូចជា ទីផ្សារប្រទេសអង់គ្លេស ស្វ៊ីស និងបណ្ដាប្រទេសមួយចំនួនទៀតនៅអឺរ៉ុប ជាដើម ក៏ប៉ុន្តែការនាំចេញនោះ គឺតែផលិតផលផ្កាអំបិលប៉ុណ្ណោះ ដែលជាផលិតផលកម្រ និងមានគុណប្រយោជន៍ខ្ពស់សម្រាប់សុខភាព ៕
ចែករំលែកព័តមាននេះ