ខេត្តបាត់ដំបង ៖ ប្រភពពីសមត្ថកិច្ចបានឱ្យដឹងថា យុវជនម្នាក់ត្រូវជនមិនស្គាល់មុខវាយនឹងដំបងបណ្ដាលឱ្យសន្លប់ រួចប្លន់យកម៉ូតូទៅបាត់ កាលពីវេលាម៉ោង៨យប់ថ្ងៃទី២៣ កក្កដា នៅចំណុចបឹងស្នោ ស្ថិតក្នុងភូមិសំរោងតាកុក ឃុំសំរោងក្នុង…
ខេត្តបាត់ដំបង ៖ ប្រភពពីសមត្ថកិច្ចបានឱ្យដឹងថា យុវជនម្នាក់ត្រូវជនមិនស្គាល់មុខវាយនឹងដំបងបណ្ដាលឱ្យសន្លប់ រួចប្លន់យកម៉ូតូទៅបាត់ កាលពីវេលាម៉ោង៨យប់ថ្ងៃទី២៣ កក្កដា នៅចំណុចបឹងស្នោ ស្ថិតក្នុងភូមិសំរោងតាកុក ឃុំសំរោងក្នុង ស្រុកឯកភ្នំ ។
ប្រភពដដែលបានឱ្យដឹងទៀតថា ជនរងគ្រោះឈ្មោះថៃ ធៀង ភេទប្រុស អាយុ២២ឆ្នាំ រស់នៅភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង ។ ជនរងគ្រោះរូបនេះ ត្រូវជនដៃដល់ប្រើដំបងវាយចំក្បាលបែកចំហៀងខាងស្តាំ និងរលាត់ស្មាខាងឆ្វេងបណ្ដាលឱ្យសន្លប់ រួចជនដៃដល់បានប្លន់យកម៉ូតូជិះគេចខ្លួនដោយសុវត្ថិភាព។
ពាក់ព័ន្ធករណីប្លន់នេះដែរ បើតាមប្រភពព័ត៌មានបានឲ្យដឹងថា ពេលដែលត្រូវចោរវាយប្លន់យកម៉ូតូ គឺខណ:ពេលដែលយុវជនរងគ្រោះកំពុងអង្គុយសាសងគ្នាជាមួយសង្សារ ។ ជនដៃដល់បានវាយជនរងគ្រោះពីក្រោយ ធ្វើឱ្យជនរងគ្រោះដួលសន្លប់ រីឯនាងជាសង្សារបានរត់កាត់វាលស្រែ និងស្រែកឱ្យគេជួយ ។
សមត្ថកិច្ចបានឱ្យដឹងថា សម្ភារដែលបាត់បង់ មានម៉ូតូដែលត្រូវចោរប្លន់នោះម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បាត់ដំបង1S-0318, កុំព្យូទ័រយួរដៃ១គ្រឿង, ទូរស័ព្ទដៃម៉ាកអាយហ្វូន១គ្រឿង និងសម្ភារមួយចំនួនទៀត ។ បច្ចុប្បន្ន កម្លាំងសមត្ថកិច្ចកំពុងធ្វើការស្រាវជ្រាវនៅកន្លែងកើតហេតុ ។
ចែករំលែកព័តមាននេះ