ប្រទេសថៃ ៖ កុមារ១១នាក់ ក្នុងចំណោមកុមារទាំង១២នាក់ និងគ្រូបង្វឹកបាល់ទាត់ពួកគេ ដែលត្រូវបានសង្គ្រោះចេញពីរូងភ្នំថាំហ្លួងភាគខាងជើងប្រទេសថៃ បានលុតជង្គង់ថ្វាយបង្គំព្រះសង្ឃជាឧបជ្ឈាយ៍ជាច្រើនអង្គ ក្នុងពិធីមួយមុនពេលពួកគេសាងផ្នួសនៅវត្តមួយ ក្នុងខេត្តឈៀងរ៉ៃ ។…
ប្រទេសថៃ ៖ កុមារ១១នាក់ ក្នុងចំណោមកុមារទាំង១២នាក់ និងគ្រូបង្វឹកបាល់ទាត់ពួកគេ ដែលត្រូវបានសង្គ្រោះចេញពីរូងភ្នំថាំហ្លួងភាគខាងជើងប្រទេសថៃ បានលុតជង្គង់ថ្វាយបង្គំព្រះសង្ឃជាឧបជ្ឈាយ៍ជាច្រើនអង្គ ក្នុងពិធីមួយមុនពេលពួកគេសាងផ្នួសនៅវត្តមួយ ក្នុងខេត្តឈៀងរ៉ៃ ។ ជាង១សប្ដាហ៍ ក្រោយពេលសង្គ្រោះគេចេញពីរូងភ្នំ ដែលពួកគេជាប់នៅក្នុងនោះ ព្រោះទឹកជន់លិច កុមារ១១នាក់ក្នុងចំណោមកុមារ១២នាក់នឹងបួសរយៈពេល៩ថ្ងៃ មុនពេលវិលត្រឡប់ទៅរកជីវភាពធម្មតាវិញ ដែលនោះជាទំនៀមទម្លាប់ក្នុងប្រទេសមួយ ដែលប្រជាជនភាគច្រើនកាន់ព្រះពុទ្ធសាសនា។
អភិបាលខេត្តឈៀងរ៉ៃ លោក Prachon Pratsakul កាលពីថ្ងៃទី២២ កក្កដា បានថ្លែងទៅកាន់អ្នកសារព័ត៌មានថា កុមារ១១នាក់សាងផ្នួសរយៈពេល៩ថ្ងៃ ចំណែកគ្រូបង្វឹកបាល់ទាត់ពួកគេនឹងក្លាយជាសង្ឃ រីឯកុមារទី១២ឈ្មោះ Adul Sam On ពុំបានបួសឡើយ ព្រោះគេជាគ្រឹស្តសាសនិក ។ តាមពិតទៅ គ្រូបង្វឹកបាល់ទាត់លោក Ekkapol Chantawong បានតាំងចិត្តបួសជាសង្ឃរួចទៅហើយ ទើបអាចជួយកុមារឲ្យចេះតាំងចិត្តស្ងប់ ពេលស្ថិតនៅក្នុងរូងភ្នំ ។ កុមារទាំងនេះ មានអាយុពី១១ឆ្នាំទៅ១៦ឆ្នាំគឺជាក្រុមបាល់ទាត់ជ្រូកព្រៃ ។
ព្រះតេជគុណ Praphun Khomjoi ជាមន្ត្រីសង្ឃខេត្តឈៀងរ៉ៃបញ្ជាក់ថា កុមារទាំងនេះ ត្រូវកោរសក់នៅថ្ងៃទី២៥ កក្កដា មុនពេលបំបួសគ្រងស្បង់ចីវរនៅថ្ងៃបន្ទាប់ ។ ពួកគេនឹងស្ថិតនៅក្នុងវត្ត រហូតដល់ថ្ងៃទី៤ ខែសីហា ទើបសឹកវិញ ។ នៅក្នុងសន្និសីទកាសែត រួមគ្នាមួយកាលពីថ្ងៃទី១៨ ខែកក្កដាកន្លងទៅ ពួកគេបានរៀបរាប់ពីជីវិត ជាប់នៅក្នុងរូងភ្នំ ស្ថិតក្នុងខេត្តឈៀងរ៉ៃ កាលពីថ្ងៃទី២៣ ខែមិថុនា និងបានជាប់ចេញមិនរួចអស់រយៈពេលជាច្រើនថ្ងៃ ដោយសារទឹកឡើងខ្លាំងក្នុងរូងភ្នំ និងត្រូវបានជួយសង្គ្រោះក្នុងប្រតិបត្តិការចុងក្រោយត្រឹមថ្ងៃទី១០ ខែកក្កដា ។
«អព្ភូតហេតុ» «អស្ចារ្យ» នេះជាពាក្យដែលកុមារទាំង១២នាក់ និងគ្រូបង្វឹកពួកគេបាននិយាយច្រើនដងនៅក្នុងសន្និសីទកាសែតរួមគ្នាជាសាធារណៈ ។ អ្វីដែលពួកគេបានរៀបរាប់និងពិពណ៌នា គឺជីវិតជាប់ក្នុងរូងភ្នំរយៈពេល៩ថ្ងៃក្នុងស្ថានភាពងងឹតសូន្យសុង គ្មានអាហារទទួលទាន ផឹកតែទឹកជ្រាបតាមថ្មភ្នំ និងមានតែការបន់ស្រន់ ។គ្រូបង្វឹកបាល់ទាត់អាយុ២៥ឆ្នាំ ដែលជាមនុស្សធំតែម្នាក់គត់ក្នុងក្រុមបានបញ្ជាក់ថា ពួកគេបានព្យាយាមរកមធ្យោបាយចាកចេញដោយខ្លួនឯងដោយគិតថា មិនអាចអង្គុយទន្ទឹងរង់ចាំជំនួយពីខាងក្រៅទេ តែនៅតែមិនអាចចេញរួច ។
ក្រៅពីរៀបរាប់ពីជីវិតឯកោក្នុងរូងភ្នំរយៈពេល៩ថ្ងៃ កុមារទាំង១២នាក់និងគ្រូបង្វឹកបាល់ទាត់របស់ពួកគេបានប្រាប់ថា ក្នុងពេលសម្រាកក្នុងមន្ទីរពេទ្យ ពួកគេក៏បានមើលការប្រកួតបាល់ទាត់ពិភពលោកក្នុងវគ្គផ្តាច់ព្រ័ត្ររវាងក្រុមជ្រើសជាតិបារាំង និងក្រូអាស៊ី នាយប់ថ្ងៃអាទិត្យ ទី១៥ ខែកក្កដាដែរ ។ បន្ទាប់មក មានអ្នកខ្លះបានប្រាប់ឱ្យដឹងពីការចង់ក្លាយខ្លួនជាកីឡាករបាល់ទាត់ជំនាញទៀតផង ។
គួររំឭកថា កុមារទាំង១២នាក់ដែលមានអាយុពី១១ឆ្នាំទៅ១៦ឆ្នាំ និងគ្រូបង្វឹកបាល់ទាត់របស់គេម្នាក់អាយុ២៥ឆ្នាំ បាននាំគ្នាចូលក្នុងរូងភ្នំថាំហ្លួង ស្ថិតក្នុងខេត្តឈៀងរ៉ៃ កាលពីថ្ងៃទី២៣ ខែមិថុនា ហើយក៏បានជាប់ចេញមិនរួចដោយសារទឹកឡើងខ្លាំងក្នុងរូងភ្នំ ។ពួកគេត្រូវរង់ចាំរហូតដល់៩ថ្ងៃ ទើបក្រុមអ្នកជំនាញមុជទឹកជនជាតិអង់គ្លេសបានរកឃើញទីកន្លែងរបស់ពួកគេដែលមានចម្ងាយប្រមាណ៤គីឡូម៉ែត្រពីច្រកផ្លូវចូល ។
តាំងពីពេលនោះមក រដ្ឋាភិបាលថៃដោយមានជំនួយពីអន្តរជាតិបានព្យាយាមរិះរកគ្រប់មធ្យោបាយ ដើម្បីរំដោះពួកគេចេញ ។ ទីបំផុត ប្រតិបត្តិការរំដោះពួកគេបានចាប់ផ្តើមជាផ្លូវការនៅថ្ងៃអាទិត្យទី៨ ខែកក្កដា និងបញ្ចប់នៅថ្ងៃអង្គារទី១០ ខែកក្កដា ដោយរំដោះបានកុមារទាំង១២នាក់ រួមទាំងគ្រូបង្វឹកបាល់ទាត់របស់ពួកគេដោយសុវត្ថិភាព ។
ក្នុងឱកាសសន្និសីទកាសែតរួមគ្នានោះដែរ កុមារទាំង១២នាក់ និងគ្រូបង្វឹកបាល់ទាត់ ក៏បានចូលរួមគោរពវិញ្ញាណក្ខន្ធអ្នកជំនាញមុជទឹកជនជាតិថៃម្នាក់ ដែលបានស្លាប់នៅក្នុងប្រតិបត្តិការសង្គ្រោះពួកគេ ព្រមទាំងលុតជង្គង់ក្រាបក្បាលចុះនៅចំពោះមុខរូបថតព្រះមហាក្សត្រថៃ ៕
ចែករំលែកព័តមាននេះ