រាជធានីភ្នំពេញ ៖ តាំងពីបុរាណមកស្ត្រីខ្មែរភាគច្រើនមិនសូវគិតពីបញ្ហាថែទាំសម្រស់ដូចកាលនៅក្រមុំ ឬគេហៅថាដាក់ខ្លួន ក្នុងពេលដែលខ្លួនមានស្វាមី និងកូន ទៅហើយនោះ ។ ស្ត្រីខ្មែរមិនសូវយកចិត្តទុកដាក់ថែសម្រស់គឺអាចមកពីមូលហេតុគិតតែពីកិច្ចការផ្ទះ និងថែទាំកូនចៅ ។
បញ្ហាមួយទៀតស្ត្រីខ្លះតែងគិតថា ប្រសិនបើខ្លួនមានស្វាមីហើយ នៅធ្វើខ្លួនឡូយឆាយដូចនៅក្រមុំទៀត នោះមិនអាចគេចផុតពីការពេបជ្រាយពីអ្នកជិតខាងនោះឡើយ ។ ស្ត្រីខ្លះបានយកមូលហេតុនៃជីវភាពក្រីក្រមកដាក់នៅខ្លួន ។
បញ្ហាទាំងនោះត្រូវស្ត្រីខ្មែរធ្វើតាមគ្នាជារៀងរហូតមក ទើបតែមកដល់នាយុគសម័យដ៏ទំនើបនិងមានសម្ភារប្រើប្រាស់គ្រប់បែបយ៉ាងណានេះ ស្ត្រីខ្មែរជាច្រើនបានផ្លាស់ប្តូរផ្នត់គំនិតចាស់ចោល ដោយមានអ្នកខ្លះបានថែរក្សាសម្រស់ខ្លួនឲ្យនៅស្រស់ស្អាតជានិច្ច បើទោះបីជាខ្លួនមានកូន និងស្វាមីរួចហើយក៏ហើយ ។
អ្នកនាង ខាត់ សុឃីម ដែលជាតារាមួយរូបក្នុងចំណោមតារាមួយចំនួនទៀតដែលត្រូវបានគេមើលឃើញថា ថែរក្សាសម្រស់របស់ខ្លួនបានល្អ បើទោះបីជាមានកូន២រួចទៅហើយនោះ កាលពីពេល ថ្មីៗកន្លងមកនិយាយថា នាង ទទួលស្គាល់អ្វីដែលបានលើកឡើងថា ស្ត្រីខ្មែរតែងតែដាក់ខ្លួននៅពេលមានស្វាមី និងកូន ។
ស្ត្រីខ្មែរមួយចំនួនតែងគិតថា ខ្លួនមានស្វាមីរួចហើយមិនចាំបាច់ថែខ្លួនឡើយ ដោយគិតតែពីការថែទាំកូនឲ្យស្អាតបាត ទោះជាខ្លួនឯងយ៉ាងមេ៉ចក៏មិនខ្វល់ព្រោះស្វាមីស្រឡាញ់កូន ។ ផ្ទុយទៅវិញបើតាមអ្នកនាង ខាត់ សុឃីម «យើងជាភរិយាគួរគិតថា ប្តីស្រឡាញ់កូន ហើយប្តីក៏ស្រឡាញ់យើង អ៊ីចឹងយើងត្រូវថែទាំរូបសម្រស់របស់យើងទៅតាមរបៀប ផ្សេងៗ ដើម្បីផ្គាប់ចិត្តស្វាមីយើងផងដែរ ខណៈពេលសម័យនេះមានការណែនាំពីការថែទាំសម្រស់ច្រើន ។ តាមបទពិសោធន៍ការថែទាំសម្រស់របស់ខ្ញុំ គឺតែងតែគិតគូរជានិច្ចចំពោះសុខភាព ដោយទទួលទានបែបណាដើម្បីការពារមិនឲ្យឡើងគីឡូ ខណៈពេលដែលនាងខ្ញុំមិនដែលទទួលទានស្រាឡើយ »។
ចំណែកតារាសម្តែងជើងចាស់អ្នកស្រី ឌី សាវ៉េត បានលើកឡើងថា ក្នុងនាមជាស្ត្រីខ្មែរមួយរូបគឺអ្នកស្រីតែងតែគិតជានិច្ចពីការថែទាំសុខភាព និងសម្រស់ បើទោះបីជាពេលនេះអ្នកស្រីមានកូន និងមានវ័យកាន់តែចាស់ក៏ដោយ ។ ស្ត្រីខ្មែរភាគច្រើនមានកាតព្វកិច្ចធ្ងន់នៅពេលមានគ្រួសារ ទាំងការថែទាំកូន និងមើលទុកដាក់ផ្ទះសម្បែង និងបម្រើស្វាមី ដែលកិច្ចការទាំងអស់នេះស្ត្រីខ្មែរភាគច្រើនមិនអាចគេចរួចឡើយ ។ តែទោះជាយ៉ាងណាក្តីមិនគួមើលរំលងអំពីរការថែទាំសុខភាព និងសម្រស់របស់ខ្លួនឯងឡើយ បើទោះបីជាយើងមានស្វាមីនិងមានកួនក៏ដោយ ព្រោះសម្រស់ជាភាពចាំបាច់មួយសម្រាប់ផ្គាប់ចិត្តស្វាមីផងដែរ បន្ទាប់ពីកាតព្វកិច្ចជាមេផ្ទះ ។
អ្នកស្រីឌី សាវ៉េត លើកមូលហេតុពីការធ្លាក់ចុះរូបសម្រស់របស់ស្ត្រីនៅពេលមានស្វាមីថា «ស្ត្រីខ្លះគិតតែពីការប្រចែចណ្ឌស្វាមី គិតតែពីរឿងការនឿយហត់ និងភាពក្រីក្រ ហើយចេះតែបណ្តោយខ្លួន ដែលបញ្ហាទាំងអស់នេះហើយបានជាធ្វើឲ្យយើងឆាប់ចាស់មុនអាយុ ។ យើងមិនត្រូវយករឿងរ៉ាវទាំងអស់នេះមកដាក់ខ្លួនពេកទេ យើងត្រូវចេះអំណត់ខ្លះ ព្រោះអ្នកណាក៏មានរឿងរ៉ាវដូចគ្នា សំខាន់យើងត្រូវចេះបន្លប់វា ដោយការអានសៀវភៅ និងមើលទូរទស្សន៍ជាដើម ។ ក
ររស់នៅគឺត្រូវមានការសប្បាយច្រើនជាងការគិត និងកើតទុក្ខ ហើយការសប្បាយនោះទៀតសោតមិនមែនការដើរលែងប៉ាតណាប៉ាតណីនោះឡើយ ពោលគឺការដើរលែងជាលក្ខណៈគ្រួសារ និងការជួបជុំបងប្អូនសាច់ញាតិ ជជែកលែងពីរឿង សប្បាយៗ។
ប្រសិនបើការរស់នៅរបស់យើងសុខសាន្តហើយនោះសម្រស់របស់យើងក៏មិនងាយចាស់មុនអាយុឡើយ ហើយស្វាមី និងកូនក៏កាន់តែមានភាពផ្អែមល្ហែមជាមួយគ្នា » ។
បើតាមអ្នកស្រីឌី សាវ៉េត ការថែទាំសម្រស់មិនទាល់តែចាំបាច់ប្រើប្រាស់ថ្នាំ ឬការលាបផលិតផល ផ្សេងៗឡើយ ពោលគឺសំខាន់ឲ្យតែយើងចេះថែរក្សាសុខភាពបានល្អ និងកុំយកភាពមួម៉ៅ ក្តៅក្រហាយ និងគិតច្រើន ។ ការថែទាំសុខភាព និងសម្រស់ គឺអ្នកស្រីតែងតែទទួលទានបន្លែ ផ្លែឈើ និងត្រី ដោយក្នុងនោះអ្នកស្រីទទួលទានសាច់តិចតួចប៉ុណ្ណោះ ។
ជាទូទៅពេលទៅណាមកណាអ្នកស្រីតែងតែបើកឡានដោយខ្លួនឯង ដើម្បីផ្តល់ភាពងាយស្រួល ព្រោះនៅពេលដែលអ្នកស្រីចូលឡានគឺអ្នកស្រីមិនបើកម៉ាស៊ីនត្រជាក់ភ្លាមឡើយ ដោយអ្នកស្រីចំហកញ្ចក់មួយសន្ទុះសិន ។ បើយើងចូលឡានហើយបើកម៉ាស៊ីនត្រជាក់ភ្លាមនោះវានឹងមានការប្រឆាំងគ្នារវាងម៉ាស៊ីនត្រជាក់ និងកម្តៅថ្ងៃ ដូចនេះអ្នកស្រីតែងតែចំហកញ្ចក់ប្រហែលជាកន្លះម៉ោង ទៅមួយម៉ោង ទើបអ្នកស្រីចាប់ផ្តើមបើកម៉ាស៊ីនត្រជាក់ក្នុងរថយន្ត។ ការបើម៉ាស៊ីនត្រជាក់ហើយ ត្រូវមើលថា វាមានភាពត្រជាក់សមល្មមហើយនោះ គឺអ្នកស្រីនឹងបិទម៉ាស៊ីនត្រជាក់នោះវិញ ហើយចំហកញ្ចក់រថយន្ត ។
ដោយឡែកសម្រាប់ការចូលគេង អ្នកស្រីឌី សាវ៉េត មិនសូវជាទម្លាប់បើកម៉ាស៊ីនត្រជាក់មួយយប់ទល់ភ្លឺទេ ពោលមុនចូលគេងគឺអ្នកស្រីតែងបើកម៉ាស៊ីនត្រជាក់ទុកប្រហែលជាកន្លះម៉ោងយ៉ាងយូរ ព្រោះការត្រជាក់ពេកនោះគឺធ្វើឲ្យឈាមរបស់យើងមិនអាចដើរស្រួលឡើយ ។
អ្នកស្រីឌី សាវ៉េត បានអះអាងថា ការហាត់ប្រាណគឺជាសំខាន់ និងចាំបាច់បំផុត សម្រាប់សុខភាពនិងរូបសម្រស់ ព្រោះការបែកញើសនេះបានធ្វើឲ្យយើងបញ្ចេញជាតិពុលពីក្នុងខ្លួន និងនាំឲ្យស្បែកមានភាពភ្លឺថ្លា ៕
ចែករំលែកព័តមាននេះ