ខេត្តកណ្ដាល៖ ជនសង្ស័យ២នាក់បានជិះម៉ូតូ១គ្រឿងធ្វើសកម្មភាពឆក់កាបូបពីនិស្សិតពេទ្យស្រីម្នាក់បានសម្រេច បន្ទាប់មកបានព្យាយាមជិះម៉ូតូរត់គេចខ្លួនក្នុងល្បឿនលឿន ហើយជ្រុលទៅបុកជាមួយម៉ូតូមន្ត្រីនគរបាល បណ្ដាលឲ្យដួលទើបត្រូវចាប់ខ្លួនបានម្នាក់ ចំណែកម្នាក់ទៀតរត់គេចខ្លួនបាត់ស្រមោល។ ហេតុ
ការណ៍ខាងលើនេះបានកើតឡើងកាលពីវេលាម៉ោង៧និង៤០នាទីយប់ថ្ងៃទី២៣ ខែកក្កដា ឆ្នាំ២០១៨នៅតាមផ្លូវជាតិលេខ៤ ត្រង់ចំណុចភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល។
នគរបាលបាននិយាយថា ជនសង្ស័យដែលត្រូវឃាត់ខ្លួនបាននោះ ឈ្មោះវណ្ណា វណ្ណេត អាយុ១៦ឆ្នាំ មានទីលំនៅក្នុងភូមិថ្មដា សង្កាត់កន្ទោក ខណ្ឌពោធិសែន រាជធានីភ្នំពេញ ចំណែកជនសង្ស័យម្នាក់ទៀតដែលរត់គេចខ្លួននោះឈ្មោះខែម ម៉េងលន់ ហៅគុណ អាយុប្រហែល២០ឆ្នាំ ជាសិស្ស មានទីលំនៅក្នុងភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល ។ ដោយឡែកនារីជាជនរងគ្រោះឈ្មោះវណ្ណៈ ស្រីនន់ អាយុ១៨ឆ្នាំ ជានិស្សិតពេទ្យឆ្នាំទី១ មានទីលំនៅក្នុងភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។ នៅក្នុងកាបូបដែលត្រូវជនសង្ស័យឆក់នោះ មានទូរសព្ទដៃមួយគ្រឿងម៉ាក iPhone7 Plus, លុយចំនួន៥៥៥០០រៀល និងក្រវិលប្រាក់១គូ ហើយសម្ភារៈទាំងនោះកម្លាំងដកហូតយកបានមកវិញប្រគល់ជូនម្ចាស់វិញហើយ។
តាមប្រភពព័ត៌មានបានឱ្យដឹងថា នៅមុនពេលកើតហេតុ នារីរងគ្រោះបានជិះម៉ូតូពីក្រោយយុវជនម្នាក់ទៀតដែលជាសិស្សរួមថ្នាក់ជាមួយគ្នាឈ្មោះមាស សុវណ្ណារា អាយុ២០ឆ្នាំ បានចេញពីរៀនកុំព្យូទ័រនៅសាលាចំណេះសាកល នៅក្នុងភូមិត្រពាំងក្រសាំង ឃុំបែកចាន ស្រុកអង្គស្នួល លុះមកដល់ចំណុចកើតហេតុ ស្រាប់តែជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កណ្ដាល ១Y-៦១៧២ តាមពីក្រោយហើយពេលជិះម៉ូតូមកទន្ទឹមក៏បានធ្វើសកម្មភាពឆក់កាបូប
ដៃពីនាងបានសម្រេចរួចបាននាំគ្នាជិះម៉ូតូគេចខ្លួន។
ប្រភពដដែលបានបន្តទៀតថា ពេលនោះនារីរងគ្រោះបានស្រែកឆោឡោថា ចោរៗបង្កការភ្ញាក់ផ្អើលយ៉ាងខ្លាំង ហើយជនសង្ស័យបានជិះម៉ូតូរត់ទៅដល់ផ្លូវលំ ស្ថិតនៅក្នុងភូមិព្រៃ ក្រាយ ឃុំព្រៃពួច ស្រុកអង្គស្នួល ក៏បានបុកគ្នាជាមួយម៉ូតូមន្ត្រីនគរបាលប៉ុស្ដិ៍ខាងលើដែលកំពុងពួនស្ទាក់ បណ្តាលឲ្យដួលម៉ូតូ ទើបត្រូវនគរ
បាលឃាត់ខ្លួនជនសង្ស័យបានម្នាក់ ចំណែកជនសង្ស័យម្នាក់ទៀតបានរត់គេចខ្លួនបាត់ស្រមោល។
បន្ទាប់មក ជនសង្ស័យដែលត្រូវឃាត់ខ្លួននោះត្រូវនគរបាលនាំទៅសាកសួរនៅអធិការដ្ឋាននគរបាលស្រុកអង្គស្នួល និងកសាងសំណុំរឿងចាត់តាមច្បាប់៕
ចែករំលែកព័តមាននេះ