ទីក្រុងប៊ុយណូស៊ែ ៖ កាលពីថ្ងៃអាទិត្យកន្លងមក អ្នកដឹកនាំផ្នែកហិរញ្ញវត្ថុមកពីជុំវិញពិភពលោក បានស្នើឲ្យបង្កើនកិច្ចសន្ទនាទប់ស្កាត់ភាពតានតឹងផ្នែកពាណិជ្ជកម្ម និងភូមិសាស្ត្រនយោបាយ ដើម្បីការពារការលូតលាស់ ប៉ុន្តែកិច្ចប្រជុំ G20 មិនបានសម្រេចដំណោះស្រាយណាមួយ ក្នុងការដោះស្រាយជម្លោះជាច្រើនជាមួយសហរដ្ឋអាមេរិកឡើយ ។
រដ្ឋមន្ត្រីហិរញ្ញវត្ថុ និងប្រធានធនាគារជាតិ ដែលមកពីប្រទេសអភិវឌ្ឍន៍ធំៗទាំង២០លើពិភពលោក បានព្រមានថា ការលូតលាស់នៅតែរឹងមាំ ប៉ុន្តែអាចជួបនឹងហានិភ័យ ។
រដ្ឋមន្ត្រីហិរញ្ញវត្ថុបាននិយាយក្នុងសេចក្តីថ្លែងការណ៍ជាផ្លូវការថា ៖« វារួមមានភាពទន់ ខ្សោយផ្នែកហិរញ្ញវត្ថុ, កំណើនភាពតានតឹងផ្នែកពាណិជ្ជកម្ម និងភូមិសាស្ត្រនយោបាយ, អតុល្យភាពពិភពលោក, វិសមភាព និងការលូតលាស់ដ៏ទន់ខ្សោយ ជាពិសេស នៅក្នុងប្រទេសអភិវឌ្ឍន៍មួយចំនួន » ។
ពួកគេបន្តថា ៖« ពួកយើងទទួលស្គាល់ពីតម្រូវការបង្កើនកិច្ចសន្ទនា និងសកម្មភាព ដើម្បីទប់ស្កាត់ហានិភ័យ និងបង្កើនជំនឿចិត្ត » ។
កិច្ចប្រជុំនៅទីក្រុងប៊ុយណូស៊ែ (Buenos Aires) ប្រទេសអាហ្សង់ទីន កាលពីចុងសប្តាហ៍មុននេះ កើតមានឡើងពេលមានជម្លោះពាណិជ្ជកម្មតានតឹងរវាងសហរដ្ឋអាមេរិកនិងចិន ខណៈប្រទេសទាំងពីរបានដាក់ពន្ធលើផលិតផលនាំចូលទៅវិញទៅមកប្រមាណ៣៤ប៊ីលានដុល្លារ ។
កាលពីថ្ងៃសុក្រ លោកប្រធានាធិបតីអាមេរិក ដូណាល់ ត្រាំ បានគំរាមថា នឹងដាក់ពន្ធលើផលិតផលចិនប្រមាណ៥០០ប៊ីលានដុល្លារ ប្រសិនបើប្រទេសចិនមិនកែទម្រង់គោលនយោបាយផ្ទេរបច្ចេកវិទ្យា, ការឧបត្ថម្ភធនឧស្សាហកម្ម និងសហគ្រាសរួមទេនោះ ។
លោក Steven Mnuchin ប្រធានរតនាគារអាមេរិក បានប្រាប់សន្និសីទមួយកាលពីថ្ងៃអាទិត្យថា លោកមិនបានពិភាក្សាស៊ីជម្រៅលើការធ្វើពាណិជ្ជកម្មជាមួយរដ្ឋមន្ត្រីហិរញ្ញវត្ថុចិន លោក Liu Kun ក្នុងកិច្ចប្រជុំ G20 ទេ ។ លោកថា ៖« ខ្ញុំ និងក្រុមការងាររបស់ខ្ញុំ នឹងចរចាលើការផ្លាស់ប្តូរដ៏មានន័យជាមួយពួកគេ» ៕
ចែករំលែកព័តមាននេះ