ខេត្តកំពត ៖ អ្នកភូមិ៣នាក់ ដែលអ្នកស្រុករាប់រយនាក់ចោទថា ចេះអំពើអាបធ្មប់ ត្រូវបានគេនាំទៅផឹកទឹកសម្បថនៅមុខបារមីព្រះអង្គវត្តដងទង់ ដែលល្បីល្បាញថា មានឫទ្ធិបារមីស័ក្តិសិទ្ធិ ដើម្បីបញ្ជាក់ថា ពួកគាត់មិនចេះអាបធ្មប់…
ខេត្តកំពត ៖ អ្នកភូមិ៣នាក់ ដែលអ្នកស្រុករាប់រយនាក់ចោទថា ចេះអំពើអាបធ្មប់ ត្រូវបានគេនាំទៅផឹកទឹកសម្បថនៅមុខបារមីព្រះអង្គវត្តដងទង់ ដែលល្បីល្បាញថា មានឫទ្ធិបារមីស័ក្តិសិទ្ធិ ដើម្បីបញ្ជាក់ថា ពួកគាត់មិនចេះអាបធ្មប់ ដូចការចោទរបស់អ្នកភូមិឡើយ ។ អ្នកភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាចប្រមាណ២០០នាក់ ខ្លះជិះរថយន្ត ខ្លះជិះម៉ូតូ បានទៅមើលការផឹកទឹកសម្បថ នៅមុខព្រះអង្គវត្តដងទង់ ក្នុងស្រុកដងទង់ ។
ការនាំគ្នាទៅផឹកទឹកសម្បថនៅមុខព្រះបដិមានេះវត្តដងទង់ ដែលគេជឿថា មានបារមីស័ក្តិសិទ្ធិត្រូវបានរៀបចំធ្វើឡើង កាលពីរសៀលថ្ងៃទី២២ ខែកក្កដា ។ ក្នុងពេលចេញដំណើររបស់អ្នកភូមិប្រមាណ២០០នាក់ រួមទាំងអ្នកទាំង៣នាក់ដែលអ្នកភូមិសង្ស័យថា ចេះអំពើអាបធ្មប់នេះ ក៏មានរថយន្តបំពាក់សុីរ៉ែនរបស់នគរ
បាលស្រុកកំពង់ត្រាច និងរថយន្តរបស់កងរាជអាវុធហត្ថស្រុក រួមទាំងនគរបាលនិងកងរាជអាវុធហត្ថស្រុកដងទង់ ក៏ធ្វើដំណើរទៅកាន់ទីនោះដែរ ក្នុងចេតនាការពារសុវត្ថិភាពអ្នកភូមិទាំង៣នាក់ ព្រោះខ្លាចកើតមានអំពើហិង្សា ។
មុនពេលធ្វើពិធី លោកអាចារ្យបានសួរដេញដោលភាគីទាំងចុងចោទនិងដើមចោទ និងឱ្យប្រគំភ្លេងពិណពាទ្យដែលស្តាប់ទៅព្រឺក្បាលដែរ ដោយសារតែលាន់រំពងខ្ទ័រព្រះវិហារ ។ អ្នកភូមិទាំង៣នាក់ដែលអ្នកជាប់ចោទថាចេះអំពើអាបធ្មប់មាន ១-ឈ្មោះ កោះ សុខ ភេទស្រី អាយុ៤៤ឆ្នាំ ២-ឈ្មោះ វ៉ាន់ ស្រីមុំ ភេទស្រី អាយុ៣៧ឆ្នាំ និង៣-ឈ្មោះ តឹប ឌឿន ភេទប្រុស អាយុ៤៣ឆ្នាំ ។ អ្នកទាំង៣នាក់នេះ ជាសាច់ញាតិនឹងគ្នា រស់នៅភូមិកណ្ដាលទួល ។
ពួកគាត់ទាំង៣នាក់ បានស្បថនៅមុខព្រះអង្គថា ខ្លួនមិនបានចេះអាបធ្មប់ដូចគេចោទទេ ហើយបើខ្លួនចេះមែន សូមឱ្យព្រះអង្គមានបារមីដ៏សក្តិសិទ្ធិដាក់ទណ្ឌកម្មចុះ ។ រីឯអ្នកភូមិជាច្រើននាក់សុទ្ធតែនិយាយថា ពួកគេទាំង៣នាក់នេះចេះអំពើអាប់ធ្មប់ ព្រោះអ្នកភូមិបានស្លាប់ម្នាក់ អ្នកខ្លះឈឺ និងខ្លះទៀតត្រូវខ្មោចអាបធ្មប់ចូលសណ្ឋិតធ្វើឱ្យខ្លាចស្ត្រីឈ្មោះ«សុខ»នេះស្ទើរតែគ្រប់គ្នា ។ នេះជាការអះអាងរបស់អ្នកភូមិម្នាក់ឈ្មោះ មុំ យ៉េត អាយុ៦៩ឆ្នាំ ។
ទោះបីជាបែបណា លោក ស សេង អនុប្រធានភូមិកណ្ដាលទួល បានប្រាប់ឱ្យដឹងថា ពេលនេះអ្នកភូមិស្ងប់ចិត្តហើយ បន្ទាប់ពីបានទៅផឹកទឹកសម្បថទាំងអ្នកដើមចោទនិងចុងចោទ ហើយអ្នកភូមិនាំគ្នាជិះរថយន្តទាំងភ្លៀងរលឹមត្រឡប់មកផ្ទះវិញរៀងៗខ្លួន ។
គួររំឭកថា ពីមុនមានស្ត្រីតែម្នាក់ទេដែលអ្នកភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ចោទប្រកាន់ថា ចេះធ្វើអំពើអាបធ្មប់ និងចេះមន្តអាគមអូមអាម(ផ្លូវងងឹត) ដោយអះអាងថា កន្លងមកតែងតែធ្វើឲ្យមនុស្សឈឺនិងស្លាប់ជាបន្តបន្ទាប់ ។ ដោយសារមានរឿងកើតឡើងផ្ទួនៗបែបនេះ ទើបអ្នកភូមិចេះតែនាំគ្នាសរសេរបង្ហោះហ្វេសបុ៊កចោទប្រកាន់លើស្ត្រីម្នាក់នោះថា ជាអ្នកធ្វើអំពើមកលើសាច់ញាតិរបស់ខ្លួនឲ្យឈឺរាំុរ៉ៃមើលមិនជា រហូតដល់មានអ្នកខ្លះស្លាប់ជាបន្តបន្ទាប់ទៀតផង ។
ដោយសារមានការចោទប្រកាន់បែបនេះ ទើបនៅរសៀលថ្ងៃទី១៥ ខែកក្កដា អ្នកភូមិខាងលើនេះជាច្រើនគ្រួសារ មានប្រតិកម្មជាចំហរហូតឈានដល់ប្រមូលគ្នាស្ទើរមួយភូមិទៅសាលាឃុំកំពង់ត្រាចខាងលិច និងធ្វើដំណើរទៅកាន់ប៉ុស្តិ៍នគរបាល ខណៈដឹងថាស្ត្រីដែលគេសង្ស័យថាចេះអំពើអាបធ្មប់នោះ ត្រូវបានកោះហៅមកកាន់ប៉ុស្តិ៍ ដើម្បីសាកសួរពីរឿងថាចេះអាបធ្មប់នេះ ។ ចំពោះមនុស្ស២នាក់ទៀត ដែលមកស្បថជាមួយស្ត្រីឈ្មោះ កោះ សុខ ជាសាច់ញាតិនឹងគ្នា ក៏ត្រូវបានចោទដែរ ។
ទាក់ទិននឹងស្ត្រីឈ្មោះ កោះ សុខ នេះអ្នកភូមិខាងលើរៀបរាប់ទៀតថា កាលពីមុនគេធ្លាប់តែឮថាដូនចាស់ជាម្តាយរបស់ស្ត្រីរូបនេះបានរៀបអាសនៈ មានរៀបបាយសីយ៉ាងធំនៅក្នុងផ្ទះ ហើយម្តាយរបស់ស្ត្រីរូបនេះជាអ្នកចេះវិជ្ជាតាមផ្លូវងងឹត។ មុនពេលគាត់ស្លាប់ បានផ្ទេរមន្តអាគមនេះទៅឲ្យកូនស្រីឈ្មោះ កោះ សុខ បន្តរហូតដល់សព្វថ្ងៃ ទើបពួកគាត់មានការសង្ស័យថា ស្ត្រីរូបនេះពិតជាចេះវេទមន្តផ្លូវងងឹតនេោះ ។
ក្រោយពីមានការសាកសួរពីសមត្ថកិច្ច ស្ត្រីឈ្មោះ កោះ សុខ បានបដិសេធថា គាត់មិនចេះធ្វើអំពើអាបធ្មប់អ្វីទេ ហើយការចោទប្រកាន់បែបនេះគាត់មិនអាចទទួលយកបានឡើយ ។ ជាមួយគ្នានេះ អ្នកភូមិកណ្តាលទួល បានសុំឲ្យអាជ្ញាធរនិងសមត្ថកិច្ចជួយធ្វើជាសាក្សី និងជួយជំរុញឲ្យស្ត្រីឈ្មោះ កោះ សុខ ទៅធ្វើពិធីស្បថស្បែ និងធ្វើសច្ចាប្រណិធាននៅមុខព្រះពុទ្ធរូបក្នុងវត្តដងទង់ ដែលល្បីថាពូកែស័ក្តិសិទ្ធិបំផុត ។ហេតុនេះហើយ ទើបអ្នកភូមិកណ្តាលទួលនិងស្ត្រីឈ្មោះ កោះ សុខ បានព្រមព្រៀងសន្យាទៅរៀបចំពិធីស្បថស្បែរនេះ នៅឯវត្តដងទង់ ។
ទាក់ទិននឹងអំពើផ្លូវងងឹតបែបជំនឿអរូបីខាងលើនេះ មជ្ឈដ្ឋានមួយចំនួនបានលើកឡើងថា ការមានជំងឺផ្សេងៗនៅតាមស្រុកស្រែចម្ការពលរដ្ឋមួយភាគតូចតែងតែមានជំនឿលើបារមី ឬការបែបន់ខ្មោចព្រាយបិសាច ជួនកាលមានការបញ្ជាន់អារក្ខ និងការថ្វាយតង្វាយដោយលេងភ្លេងពិណពាទ្យជាដើមជំនួសថ្នាំសង្កូវ ។ ចំណែកអ្នករស់នៅតាមទីប្រជុំជន ភាគច្រើនជឿលើផ្នែកវេជ្ជសាស្ត្រ ហើយអ្នកជំងឺតែងតែពឹងផ្អែកលើគ្រូពេទ្យព្យាបាលជំងឺ គឺគេមិនសូវជឿលើអបិយជំនឿឡើយ ។
យ៉ាងណាមិញ ការជឿស៊ប់លើជំនឿអរូបីដូចខាងលើ បើរឿងនេះមិនពិតប្រាកដវិញ អាចជាករណីលាបពណ៌រវាងគ្នានឹងគ្នា ដែលធ្វើឲ្យមានការភ័ន្តច្រឡំកាន់តែខ្លាំង បង្កជាករណីគុំកួនគ្នាមិនចេះចប់មិនចេះហើយ និងនាំឲ្យបែកបាក់សាមគ្គីពីក្រុមគ្រួសារមួយទៅក្រុមគ្រួសារមួយទៀត រហូតបែកបាក់សាមគ្គីរវាងពលរដ្ឋក្នុងភូមិជាមួយគ្នាផងដែរ ។
ជុំវិញការចោទប្រកាន់របស់អ្នកភូមិថា ស្ត្រីរូបនេះចេះអាបធ្មប់ ធ្វើអំពើសម្លាប់មនុស្សនេះ គប្បីរកឱ្យឃើញថា តើរាល់អ្នកដែលស្លាប់នោះជាសត្រូវរបស់ស្ត្រីរូបនេះឬក៏អត់? មិនមែននៅសុខៗចេះតែធ្វើមន្តអាគមសម្លាប់មនុស្សបែបនេះឡើយ ។ ក្នុងសម័យទំនើបដែលមនុស្សឡើងហួសឋានព្រះចន្ទ្រទៅហើយនោះ តើអបិយជំនឿដែលបានកើតឡើងនេះ គប្បីមានជំនឿបែបការសង្ស័យចោទប្រកាន់នេះតទៅទៀតឬបែប
ណា ?
កន្លងមកនេះ មានអ្នករងគ្រោះច្រើននាក់ហើយដែលត្រូវមនុស្សខ្វះការពិចារណាព្រោះតែជឿស៊ប់ទៅលើអបិយជំនឿនេះ ឈានទៅដល់ការសម្លាប់ជាបន្តបន្ទាប់ ហើយក៏មានជនដៃដល់ជាច្រើននាក់ផងដែរ ត្រូវបានចាប់ខ្លួនផ្តន្ទាទោស ។ និយាយរួម អបិយជំនឿបែបនេះប្រតិកិរិយាពេកហើយ ៕
ចែករំលែកព័តមាននេះ