ខេត្តប៉ៃលិន ៖ ក្នុងការរួមចំណែកលើកកម្ពស់ប្រសិទ្ធភាពការផ្តល់សេវាសាធារណៈជូនប្រជាពលរដ្ឋ និងវិស័យឯកជនសម្តៅឆ្លើយតបនឹងវត្តុបំណងនៃអភិបាលកិច្ចល្អដែលជាស្នូលនៃយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា និងក្រសួងមហាផ្ទៃរហូតមកដល់ព្រឹកថ្ងៃទី២៣ ខែកក្តដា ឆ្នាំ២០១៨នេះអាជ្ញាធរខេត្ត បានប្រកាសដាក់ឲ្យដំណើរជាផ្លូវការនូវអង្គភាពច្រកចេញចូលតែមួយនៃរដ្ឋបាលខេត្តប៉ៃលិន ។
លោក ផាន់ ចាន់ធុល អភិបាលខេត្តប៉ៃលិនបានថ្លែងអំណរគុណ និងកោតសរសើរដល់ថ្នាក់ដឹកនាំនៃរដ្ឋបាលខេត្ត ព្រមទាំងមន្ទីរអង្គភាពពាក់ព័ន្ធ និងគណៈកម្មាធិការបច្ចេកទេសដែលបានចូលរួមសហការរៀបចំប្រកាសដាក់ឱ្យដំណើរការអង្គភាពច្រកចេញចូលតែមួយនៃរដ្ឋបាលខេត្តប៉ៃលិន ដើម្បីបម្រើការអភិវឌ្ឍវិស័យសាធារណៈ ជាពិសេសឆ្លើយតបចំពោះបំណងប្រាថ្នារបស់ប្រជាពលរដ្ឋ និងវិស័យឯកជនក្នុងខេត្តប៉ៃលិនទាំងមូលក្នុងការផ្តល់សេវានានា បង្កើតនូវអភិបាលកិច្ចល្អផងដែរ ។
លោកបានលើកឡើងថា ដើម្បីរួមចំណែកអនុវត្តនូវកម្មវិធីកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជាតាមរយៈក្រសួងមហាផ្ទៃបានបង្កើតការិយាល័យច្រកចេញចូលតែមួយ និងការិយាល័យប្រជាពលរដ្ឋនៅតាមរដ្ឋបាលខេត្តក្រុងស្រុក ក្នុងគោលបំណងបង្កើននូវការលើកកម្ពស់គុណភាព ការផ្តល់សេវារដ្ឋបាលជូនប្រជាពលរដ្ឋឱ្យមានប្រសិទ្ធិភាព ។
លោកបានបន្តទៀតថា ការិយាល័យច្រកចេញចូលតែមួយ គឺជាកន្លែងផ្តល់សេវារដ្ឋបាលដែលប្រជាពលរដ្ឋ ត្រូវការជាចាំបាច់ពោល គឺធ្វើឲ្យទាន់ពេលវេលា និងតាមនីតិវិធីសាមញ្ញជាកន្លែងប្រមូលផ្តុំសេវាកម្ម និងនីតិវិធីរដ្ឋបាលមួយចំនួន នៅកន្លែងតែមួយ ដើម្បីឱ្យប្រជាពលរដ្ឋទៅទទួលទម្រង់បែបបបទ និងទទួលបាននូវព័ត៌មានគ្រប់គ្រាន់ច្បាស់លាស់ពីការផ្តល់សេវារដ្ឋបាលផ្សេងៗ និងការបង់ថ្លៃសេវារដ្ឋបាល សម្រាប់ផ្តល់លទ្ធផលសម្រេចជាផ្លូវការលើសេចក្តីស្នើសុំពីប្រជាពលរដ្ឋ ។
លើសពីនេះលោកក៏ជំរុញ និងណែនាំដល់មន្ទីរជំនាញទាំង១២មន្ទីរ ដែលមានភារៈកិច្ចនៅក្នុងការិយាល័យច្រកចេញចូលតែមួយនៃរដ្ឋបាលខេត្តប៉ៃលិនត្រូវតែពង្រឹងចំណេះដឹង និងសមត្ថភាពជំនាញ ប្រកបដោយក្រមសីលធម៌ និងមនសិការវិជ្ជាជីវៈ ដើម្បីរួមចំណែកឆ្លើយតបទៅនឹងការអនុវត្ត និងផ្តល់សេវាឱ្យបានទាន់ពេលវេលាតាមតម្រូវការរបស់ប្រជាពលរដ្ឋ និងរួមចំណែកជាមួយរាជរដ្ឋាភិបាលក្នុងការកែទម្រង់ការផ្ដល់សេវារដ្ឋបាលឱ្យកាន់តែប្រសើរឡើងក្នុងគោលដៅកាត់បន្ថយភាពក្រីក្ររបស់ប្រជាពលរដ្ឋ ។
ម្យ៉ាងវិញទៀតគ្រប់មន្ទីរស្ថាប័នជាប់ពាក់ព័ន្ធទាំងអស់ត្រូវរៀបចំផែនការផ្សព្វផ្សាយឱ្យបានច្បាស់លាស់ អំពីតម្លៃសេវា និងព័ត៌មានសំខាន់ៗ ផ្សេងទៀតស្តីពីការផ្តល់សេវារដ្ឋបាលរបស់ខ្លួនព្រមទាំងប្រមូលព័ត៌មានត្រឡប់ពីប្រជាពលរដ្ឋអំពីការបំពេញកិច្ចការរបស់ខ្លួន និងធ្វើការកែលម្អនូវចំណុចខ្វះខាតឱ្យបានល្អប្រសើរឡើងវិញផង ៕
ចែករំលែកព័តមាននេះ