ខេត្តរតនគិរី ៖ អ្នកកាន់កាតកាសែតដែលមិនធ្លាប់ឮឈ្មោះ បានចាក់គ្នាបណ្តាលឱ្យរបួសធ្ងន់កាលពីថ្ងៃទី២២ ខែកក្កដា វេលាម៉ោង១០យប់ នៅលើសួនផ្សាររាត្រី ក្នុងភូមិអូរកន្សែងសង្កាត់បឹងកន្សែង ក្រុងបានលុង ។ ហេតុការណ៍កាប់ចាក់គ្នានេះត្រូវបាននគរបាលក្រុងបានលុងឱ្យដឹងថា ជនរងគ្រោះឈ្មោះ អោង ឧត្ដម
ភេទប្រុស អាយុ២៨ឆ្នាំ ជាអ្នកកាសែត«តាដំបងគ្រញូង» ដែលមិនធ្លាប់ឮឈ្មោះ ។ ចំណែកអ្នកចាក់ឈ្មោះ ណាត ពៅ ភេទប្រុស អាយុ៣៨ឆ្នាំ ជាអ្នកកាសែត CPM អនឡាញ ។
រវាងជនសង្ស័យនិងជនរងគ្រោះ បានជួលបន្ទប់ស្នាក់នៅជាប់គ្នា ក្នុងភូមិអូរកន្សែង សង្កាត់បឹងកន្សែង ។ នគរបាលក្រុងបានលុងបញ្ជាក់ថា បើតាមចម្លើយសារភាព គឺមុនពេលកើតហេតុជនសង្ស័យនិងជនរងគ្រោះមានគ្នា៤ទៅ៥នាក់ សុទ្ធតែក្រុមអ្នកកាន់កាតកាសែត បាននាំគ្នាទៅផឹកស្រានៅហាងមួយឈ្មោះ«ម្លប់ខ្នុរ» ស្ថិតនៅខាងកើតព្រលានយន្តហោះ ក្នុងភូមិ៧មករា សង្កាត់ឡាបានសៀក ក្រុងបានលុង ។ ពេលនោះ ពួកគេបានកុម្មង់ស៊ុបគោមួយឆ្នាំង និងស្រាបៀរទឹកខ្មៅមួយកេស ហើយពេលផឹកក្នុងហាងក៏មានស្ត្រីចាក់ស្រាបៀរឱ្យដែរ ។
ពេលផឹកស៊ីនោះ ឈ្មោះ ណាត ពៅ ជាជនសង្ស័យបានញ៉ែនិងចាប់ដៃនារីរត់តុ ហើយឈ្មោះ អោង ឧត្ដម បានស្ដីបន្ទោសឱ្យឈ្មោះ ណាត ពៅ ជាញឹកញាប់នៅក្នុងហាង ។ លុះពេលឈប់ផឹកក៏នាំគ្នាត្រឡប់មកផ្ទះវិញ ហើយពេលទៅដល់ផ្ទះឈ្មោះ ណាត ពៅ ចង់ផឹកស្រាបន្តក៏យកជ្រញ់និងសាច់ជ្រូក និងមានកូនកាំបិត១សម្រាប់ហាន់សាច់ផងមកដាក់ពីមុខ ។ ពេលនោះឈ្មោះ អោង ឧត្តម បានបន្តបន្ទោសឈ្មោះ ណាត ពៅ ថា «អានេះស្រីមេសោះ»មានន័យថា នារីរត់តុដែលឈ្មោះ ណាត ពៅ ញ៉ែនោះគឺជាស្រីមេ តែមិនដឹងមេនរណានោះទេ ។ លុះនិយាយដដែលៗឥតឈប់ក៏កើតជាជម្លោះខ្លាំងឡើងៗ រហូតយកកៅអីវាយគ្នាមួយប្រាវ ។
ក្រោយមក ឈ្មោះ ណាត ពៅ ឃើញកូនកាំបិតនៅលើតុ ក៏យកមកកាន់នៅដៃ ហើយឈ្មោះ អោង ឧត្ដម បានហក់ទៅចំបាប់ឈ្មោះ ណាត ពៅ បណ្តាលឱ្យដួលទៅផ្ទប់នឹងជញ្ជាំងផ្ទះ ។ ដោយក្នុងដៃ ណាត ពៅ មានកាន់កូនកាំបិត ក៏បានចាក់ឈ្មោះ អោង ឧត្ដម ត្រូវចំនួន២កន្លែង គឺឆ្អឹងជំនីរខាងឆ្វេងលិចជម្រៅមួយចង្អុលដៃ និងត្រូវក្បាលពោះរបួសស្រាលនិងមានស្នាមរបួស៣-៤កន្លែងទៀតដោយសារចុងកាំបិត ។
ក្រោយកើតហេតុ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តហៀយបើតាមព័ត៌មានពីគ្រូពេទ្យថា ស្នាមចាក់នៅឆ្អឹងជំនីរធ្ងន់ណាស់មានជម្រៅជ្រៅ ពេលគ្រូពេទ្យលូកដៃចូលមានឈាមកកខាងក្នុងយ៉ាងច្រើន និងមានឈាមហូរបន្តថែមទៀតតែមិនបណ្ដាលឱ្យបាត់បង់ជីវិតទេ ពេលនេះគ្រូពេទ្យកំពុងជួយសង្គ្រោះ ។ ចំណែកជនដៃដល់ ត្រូវបាននគរបាលឃុំខ្លួនបណ្ដោះអាសន្ននៅអធិការដ្ឋានក្រុងបានលុង និងកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ