ខេត្តត្បូងឃ្មុំ ៖ ស្របពេលដែលមេឃខ្មៅបម្រុងនឹងភ្លៀងដោយមានខ្យល់បោកបក់ផងនោះដែលជាហេតុ
ធ្វើឲ្យទូកម៉ាស៊ីន០១គ្រឿងតូចល្មមដឹកដើមឫស្សីជាច្រើនដើមបានលិចត្រង់កណ្តាលទន្លេនៅភូមិមុខ
ទួលគរ ឃុំទន្លេបិទ ស្រុកត្បូងឃ្មុំ នៅវេលាម៉ោង១០ និង១០នាទីព្រឹក ថ្ងៃទី២៣ កក្កដា ២០១៨នេះ។ ហើយបណ្តាលឲ្យលិចទូក និងបានរសាត់ ទៅតាមខ្សែទឹកហូរទន្លេមេគង្គចុះទៅក្រោម ជាមួយនោះ មនុស្សប្រុស៤នាក់ព្រលឹងចុងសក់ និងភិតភ័យយ៉ាងខ្លាំងនាំគ្នា តោងដោយស្រែកហៅគេឯង ឲ្យជួយសង្គ្រោះផងដែរ។
លោក សយ ស៊ាងហុង មន្ត្រីរដ្ឋបាលខណ្ឌជលផលខេត្តត្បូងឃ្មុំ ប្រាប់ថា កម្លាំងរបស់លោកជាច្រើននាក់បានចេញទៅពិនិត្យមើលតាមភូមិសាស្ត្រនានា ក្នុងភូមិទួលគរ ឃុំទន្លេបិទ ស្រុកត្បូងឃ្មុំ ស្របពេលនោះស្រាប់តែមេឃឡើងខ្មៅ ហើយមានខ្យល់បោកបក់ខ្លាំងទៀតផង។ ក្នុងពេលនោះក៏បានឃើញទូកម៉ាស៊ីន០១គ្រឿងបើកចេញពីខាងភូមិថ្មី ដីស្រុកកោះសូទិន ខេត្តកំពង់ចាម ឆ្លងទន្លេមេគង្គមកកាន់ត្រើយភូមិទួលគរ ឃុំទន្លេបិទ លុះមកដល់ត្រង់កណ្តាលទន្លេទូកនោះ ក៏បានលិចតែម្តង។
មន្ត្រីជលផលខេត្តប្រាប់បន្តថា ក្នុងពេលនោះមន្ត្រីរបស់លោកដែលរួមដំណើរ ក្នុងការចុះបំពេញបេសកកម្មបង្ក្រាបបទល្មើសនេសាទ បានចោលកន្ទុយភ្នែកទៅឃើញទូកលិច ហើយបានរសាត់អណ្តែតចុះទៅតាមខ្សែទឹកហូរលឿនថែមទៀតផង ព្រោះរដូវវស្សាទឹកទន្លេឡើងខ្លាំង។ ក្នុងពេលនោះក៏បានឲ្យអ្នកកាន់ចង្កូតកាណូតរបស់ជំនាញជលផល បើកលឿនសំដៅទៅរកទូកដែលលិច ទំរាំតែទៅដល់ ទូកបានរសាត់ទៅជិតដល់ត្រង់ចំណុចក្បាលពាមត្រង់ទន្លេតូច ដែលមានចរន្តទឹកហូរ កួចត្របាញ់ទៅហើយ។
គ្រានោះបានសណ្តោងទូករួមនឹងមនុស្ស៤នាក់បានឲ្យឡើងលើកាណូត បើកសំដៅទៅរកច្រាំងថែមទាំងបានសណ្តោងទូកដឹកឫស្សីថែមទៀត បន្ទាប់មកបានទូរស័ព្ទទៅប្រាប់ សាច់ញាតិឲ្យមកទទួលយក។ ហើយក្រុមជំនាញជលផលខេត្តបានបើកកាណូត ចុះបំពេញការងារ របស់ខ្លួន ដើម្បីមើលពីសកម្មភាពបទល្មើសនេសាទក្នុងរដូវបិទទៅកន្លែងកន្លែងផ្សេង៕
ចែករំលែកព័តមាននេះ