ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា បុរសម្នាក់មានថ្នាំញៀនជាប់ខ្លួន២កញ្ចប់ ហើយដើររកទីផ្សារងងឹកលក់មិនឃើញ ស្រាប់តែយកទៅលក់ប៉ះចំប៉ូលិស ហេតុការណ៍នេះកើតឡើងកាលពីម៉ោង២រសៀល ថ្ងៃទី២២ ខែកក្កដា ឆ្នាំ២០១៨ ស្ថិតនៅក្រុម៤ ភូមិ៤ សង្កាត់លេខ៤ ខេត្តព្រះសីហនុ ។
ជនសង្ស័យដែលត្រូវឃាត់ខ្លួនឈ្មោះ សាល ពិសិដ្ឋ ភេទប្រុស អាយុ៣២ឆ្នាំ មុខរបរមិនពិតប្រាកដ ទីលំនៅនៅស្រុកភ្នំស្រួច ខេត្តកំពង់ស្ពឺ ចំណែកវត្ថុតាងរួមមានម្សៅក្រាមពណ៌សថ្លា២កញ្ចប់ ក្នុងនោះ១កញ្ចប់តូច និង១ទៀតកញ្ចប់ធំ រួមទាំងទូរស័ព្ទ១គ្រឿងផងដែរ ។
មន្ត្រីនគរបាលបានឲ្យដឹងថា តាមពិតទៅជាគោលការណ៍របស់លោកឧត្តមសេនីយ៍ទោ ជួន ណារិន្ទ ដែលបានដាក់បទបញ្ជាទៅរាល់អង្គភាពជំនាញ និងអធិការដ្ឋាននគរបាលក្រុង-ស្រុកឲ្យចេះប្រើវិធានការណ៍ញុះញង់ ដើម្បីទាក់យកជនសង្ស័យដែលជាជនសង្គមងងឹតដែលរកស៊ីខុសច្បាប់គេចខ្លួនពីសមត្ថកិច្ច ។
មន្ត្រីនគរបាលបន្តទៀតថា ដូច្នោះហើយបានជាកម្លាំងសមត្ថកិច្ចនគរបាលក្រុងសហការជាមួយប៉ុស្តិ៍នគរបាលរដ្ឋាបាលមូលដ្ឋានបានចុះស្រាវជ្រាវ និងបង្ក្រាបករណីគ្រឿងញៀនមួយករណី រួមទាំងឃាត់ខ្លួនជនសង្ស័យម្នាក់តែម្តង ។ ក្រោយពេលឃាត់ខ្លួនជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្តតាមនីតិវិធី ៕
ចែករំលែកព័តមាននេះ