អ្នកវិទ្យាសាស្ដ្រទាំងឡាយបានរកឃើញសារធាតុគីមីជាច្រើនប្រភេទនៅក្នុងផ្លែឈើ ដែលយើងកំពុងតែបរិភោគរៀង រាល់ថ្ងៃ ។ សារធាតុគីមីនៅក្នុងផ្លែឈើទាំងនោះសុទ្ធតែមានគុណប្រយោជន៍ក្នុងការជួយទ្រទ្រង់សុខភាពរបស់មនុស្សយើងទាំងអស់ ជាពិសេសវាមានតួនាទីយ៉ាងសំខាន់ក្នុងការជួយទប់ស្កាត់ការកើតជំងឺមហារីកដោះ ។ ទទឹម គឺជាផ្លែឈើមួយប្រភេទដែលអ្នកវិទ្យាសាស្ដ្របានអះអាងថា មានផ្ទុកនូវសារធាតុម្យ៉ាងដែលអាចជួយទប់ស្កាត់ការកើតជំងឺមហារីកដោះបាន ។
បច្ចុប្បន្ននេះ ការសិក្សាស្រាវជ្រាវជាច្រើនបាននិងកំពុងតែធ្វើដោយអ្នកវិទ្យាសាស្ដ្រទាំងឡាយក្នុងការខិតខំដើម្បីស្វែងរកឱសថថ្មីមួយប្រឆាំងនឹងជំងឺមហារីក ។ នៅពេលដំណាលគ្នានេះអ្នកស្រាវជ្រាវទាំងឡាយបាននិយាយថា ការញ៉ាំផ្លែឈើឱ្យបានច្រើនគឺអាចមានអត្ថប្រយោជន៍ដល់សុខភាព ។ ការធ្វើពិសោធន៍ទាំងឡាយនៅក្នុងមន្ទីរពិសោធន៍បានរកឃើញថា មានសារធាតុគីមីម្យ៉ាងឈ្មោះអេឡាហ្គីតង់នីន (ellagitannins) ។ សារធាតុនេះអាចជួយទប់ស្កាត់ការកើនឡើងនៃកំរិតអ័រម៉ូន អេសស្ដ្រូជេន(Oestrongen) ដែលជាប្រភេទអ័រម៉ូនជួយឱ្យកោសិកាមហារីកលូតលាស់។
អ្នកជំនាញការទាំងឡាយបាននិយាយថា វាមិនទាន់ច្បាស់ថា តើចំនួនសារធាតុអេឡា ហ្គីតង់នីនប៉ុន្មានដែលខ្លួនមនុស្សយើងត្រូវការចាំបាច់ ។ លោកហ្គីរីស្ដូន័រ សាស្ដ្រាចារ្យនៅនាយកដ្ឋានឱសថនៃសាកលវិទ្យាល័យរដ្ឋអូ ហៃយ៉ូ សហរដ្ឋអាមេរិក បាននិយាយថា ក្រុមអ្នកពិសោធន៍ត្រូវការសារធាតុអេឡាហ្គីតង់ នីន យ៉ាងច្រើនដើម្បីឱ្យការងាររបស់ពួកគេទទួលបានជោគជ័យ ។ លោកបានបន្ថែមទៀតថា យើងមិនទាន់ប្រាកដថា កំរិតសារធាតុអេឡាហ្គីតង់នីនដ៏ច្រើនបែបនេះអាចធ្វើឱ្យការពិសោធន៍ទទួលបានជោគជ័យ ឬយ៉ាងណានោះទេ ដ្បិតសារធាតុអេឡាហ្គីតង់នីន មិនងាយត្រូវបានស្រូបចូលទៅក្នុងឈាម ដោយងាយស្រួលនោះឡើយ ។
ប៉ុន្ដែទោះបីជាយ៉ាងណា លោកស្ដូន័រ បានសង្កត់ធ្ងន់ថា មនុស្សគួរតែពិចារណាបរិភោគផ្លែទទឹម ដើម្បីការពារ និងទប់ស្កាត់ការកើតជំងឺមហារីកដោះ ពីព្រោះបច្ចុប្បន្នគេពុំទាន់រកឃើញឱសថសំរាប់ព្យាបាលជំងឺមហារីកនៅឡើយទេ ។ លោកវេជ្ជបណ្ឌិតប៉ូវែលប្រោន ប្រធាននាយកដ្ឋានទប់ស្កាត់ជំងឺមហារីកនៅសាកលវិទ្យាល័យតិចសាស់ បាននិយាយថា គេនឹងធ្វើការស្រាវជ្រាវបន្ថែមទៀតទៅលើធាតុនីមួយៗ ព្រមទាំងផលប្រយោជន៍នៃការបរិភោគផ្លែទទឹម ៕
ចែករំលែកព័តមាននេះ