ខេត្តកណ្ដាល ៖ ដោយសារស្ថានភាពអាកាសធាតុភ្លៀងធ្លាក់ខ្លាំងនៅផ្នែកខាងលើស្ទឹងព្រែកត្នោតរយៈពេលប៉ុន្មានថ្ងៃនេះបានធ្វើអោយទឹកស្ទឹងព្រែកត្នោតបានហក់ឡើងយ៉ាងគំហុកហៀរជន់លិច មកក្នុងឃុំមួយចំនួនក្នុងស្រុកកណ្ដាលស្ទឹង ។ មកដល់ថ្ងៃទី២៣ កក្កដា នេះមានឃុំចំនួន៥បានរងផលប៉ះពាល់ដោយសារទឹកជំន់ និងលិចស្រូវជាង៨រយហិកតា លិចផ្លូវលំ និងផ្ទះប្រជាពលរដ្ឋមួយចំនួន ប៉ុន្តែមិនមានរងគ្រោះដល់អាយុជីវិតមនុស្សទេ ។ នេះបើយោងតាមរបាយការណ៍របស់អាជ្ញាធរ ស្រុកកណ្ដាលស្ទឹង ។
ជំនន់ទឹកភ្លៀងមួយប្រាវលិចបំផ្លាញស្រូចជាង៨០០ហិកតាក្នុងស្រុកកណ្តាលស្ទឹង(មានវីដេអូ)បើគិតត្រឹមព្រឹកថ្ងៃទី ២៣ ខែកក្កដា ឆ្នាំ២០១៨ ទឹកបានស្រកចុះនៅផ្នែកខាងលើក្នុងភូមិសាស្ត្រឃុំដើមឫសបន្តិចប៉ុន្តែនៅបន្តលិចផ្លូវចូលភូមិមួយចំនួន ។
លោក អ៊ូច សាវឿន អភិបាលរងស្រុកកណ្ដាលស្ទឹងបានប្រាប់ឱ្យដឹងថា មកដល់ពេលនេះផលប៉ះពាល់នៃទឹកជំនន់មានចំនួន៥ឃុំលើ១៨ឃុំរួមមាន ៖ ឃុំដើមឫស លិចស្រូវទាំង១៤ភូមិ ប៉ះពាល់ស្រូវ៦០៤ហិកតា, ឃុំជើងកើបលិចចំនួន៣ភូមិ ប៉ះពាល់ស្រូវ៥៧ហិកតា, ឃុំបារគូលិចចំនួន២ភូមិប៉ះពាល់ស្រូវ៤០ហិកតា, ឃុំត្រពាំងវែងលិចចំនួន២ភូមិ ប៉ះពាល់ស្រូវ៣០ហិកតា, ឃុំគោកត្រប់លិចចំនួន៤ភូមិប៉ះពាល់ស្រូវ៧០ហិតា សរុបផលប៉ះពាល់ស្រូវ៨៨១ហិកតា ។
ដោយឡែកក្នុងឃុំកណ្តោក (ទំនប់៩៤) មានផ្ទះប្រជាពលរដ្ឋចំនួន១៥លើ១៤៤ខ្នងផ្ទះបានរងផលប៉ះពាល់ទឹកជន់លិច ។ រីឯទឹកក្នុងអាង៧មករាមានកំពស់ទៅដល់៦,៤០ម៉ែត្របានធ្វើអោយឃុំមួយចំនួនក្នុងស្រុកកណ្ដាលស្ទឹងខេត្តកណ្ដាលត្រូវទឹកជនលិច ប៉ុន្តែមិនបណ្ដាលឱ្យគ្រោះថ្នាក់ដល់មនុសទេ ។
អាជ្ញាធរស្រុកកណ្ដាស្ទឹងលោកអភិបាល អភិបាលរង និងក្រុមការងារចុះជួយស្រុកកណ្ដាលស្ទឹងបានចុះពិនិត្យស្ថានភាពទឹកជំនន់ជាក់ស្ដែង ចាប់តាំងពីថ្ងៃ២០ កក្កដា មក និងបានណែនាំមន្រ្ដីជំនាញបន្តបើកទ្វារអាងទឹក៧មករាទាំងបួនទ្វាដើម្បីកាត់បន្ថយកំពស់ទឹក និងផ្សព្វផ្សាយអោយប្រជាពលរដ្ឋរស់នៅតាមបណ្តោយស្ទឹងមាន ការប្រុងប្រយ័ត្នទ្រព្យសម្បត្តិ និងសុខភាព ។
ជាមួយគ្នានេះដែរកម្លាំងបញ្ជាការដ្ឋានអង្គរក្សសាលាហ្វឹកហ្វឺនក្រាំងចេក នៅតែបន្តដឹកនាំអូប៊័រចំនួន២០គ្រឿង ដើម្បីជួយដឹកជញ្ជូនចំលងប្រជាពលរដ្ឋ និងត្រៀមជម្លៀសប្រជាជនទៅកាន់ទីទួលសុវត្ថិភាផងដែរ ៕
ចែករំលែកព័តមាននេះ