រាជធានីភ្នំពេញ ៖ កាលពីល្ងាចថ្ងៃទី២១ កក្កដា ២០១៨ លោកសូ ស្រណោះ បណ្ឌិតព្យ៉ាណូមកពីប្រទេសជប៉ុន ត្រូវគណៈកម្មការរបស់ប្រទេសជប៉ុន ជ្រើសរើសជាគណៈកម្មការផ្ដល់ពិន្ទុក្នុងចំណោមគណៈកម្មការអន្តរជាតិពី៦ប្រទេស…
រាជធានីភ្នំពេញ ៖ កាលពីល្ងាចថ្ងៃទី២១ កក្កដា ២០១៨ លោកសូ ស្រណោះ បណ្ឌិតព្យ៉ាណូមកពីប្រទេសជប៉ុន ត្រូវគណៈកម្មការរបស់ប្រទេសជប៉ុន ជ្រើសរើសជាគណៈកម្មការផ្ដល់ពិន្ទុក្នុងចំណោមគណៈកម្មការអន្តរជាតិពី៦ប្រទេស នៅក្នុងព្រឹត្តិការណ៍ប្រកួតព្យ៉ាណូធំមួយ នៅប្រទេសថៃ ។
លោកសូ ស្រណោះ បានចាកចេញទៅកាន់ទីក្រុងបាងកក ក្នុងនាមជាគណៈកម្មការតំណាងប្រទេសកម្ពុជា ។ លោកត្រូវប្រទេសជប៉ុនដែលជាអ្នករៀបចំការប្រកួតនោះ ជ្រើសជាអ្នកផ្ដល់ពិន្ទុក្នុងវគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ។
លោកសូ ស្រណោះ និយាយថា ដំណើរទៅកាន់បរទេសប្រទេសលើកនេះ មិនមែនជាលើកទី១នោះទេ ដោយសារតែពេលកន្លងមក លោកក៏ត្រូវបានគណៈកម្មការអន្តរជាតិ ជ្រើសឲ្យធ្វើជាគណៈកម្មការផ្ដល់ពិន្ទុការប្រកួតព្យ៉ាណូនៅក្រៅប្រទេសចំនួន៤លើករួចមកហើយ ។
ការប្រកួតនៅក្នុងប្រទេសថៃនោះ ភាគីជប៉ុន ដែលជាអ្នករៀបចំបានប្រកួតជម្រុះចំនួន៣ខែមកហើយ ដោយលោកទើបតែត្រូវគណៈកម្មការជប៉ុនជ្រើសឲ្យធ្វើជាគណៈកម្មការផ្ដល់ពិន្ទុ ក្នុងពេលការប្រកួតកំពុងឈានដល់វគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ ។ កាតព្វកិច្ចលើកនេះ គឺតំណាងឲ្យកម្ពុជា ធ្វើជាអ្នកកាត់ក្ដី ក្នុងចំណោមគណៈកម្មការផ្ដល់ពិន្ទុពីជប៉ុន និងថៃផ្សេងទៀត ដើម្បីជ្រើសអ្នកពូកែផ្នែកព្យ៉ាណូម្នាក់ ឲ្យក្លាយជាម្ចាស់ពានរង្វាន់នៅក្នុងប្រទេសថៃ ។ ការប្រកួតនេះ គឺមានតែជនជាតិថៃប៉ុណ្ណោះ ជាបេក្ខជន។
លោកសូ ស្រណោះ បញ្ជាក់ថា លោកនឹងស្នើឲ្យគណៈកម្មការ ចាប់អារម្មណ៍មកធ្វើព្រឹត្តិការណ៍នេះនៅក្នុងប្រទេសកម្ពុជា ឬយ៉ាងហោចណាស់ ក៏ស្នើឲ្យព្រឹត្តិការណ៍នេះមានការចូលប្រកួតពីអ្នកជំនាញផ្នែកព្យ៉ាណូពីប្រទេសផ្សេងៗ ដើម្បីឲ្យលោកអាចបញ្ជូនសិស្សរបស់ខ្លួនដែលតំណាងឲ្យកម្ពុជាចូលរួមប្រកួត និងបង្ហាញសមត្ថភាព ។
លោកសូ ស្រណោះ នឹងត្រលប់មកកាន់ប្រទេសកំណើតវិញនៅថ្ងៃទី២៥ កក្កដា បន្ទាប់ពីការប្រកួតជ្រើសរើសម្ចាស់ពានរង្វាន់បានបញ្ចប់ ៕
ចែករំលែកព័តមាននេះ