ខេត្តកំពត ៖ អំឡុងពេលភ្លៀងបន្តធ្លាក់កាន់តែខ្លាំងនៅតាមតំបន់មាត់សមុទ្រ ខេត្តកំពត ដែលល្បីខាងដំណាំម្រេច កំពុងជួបបញ្ហាក្នុងការប្រមូលផលម្រេច ព្រោះតែភ្លៀងធ្លាក់ជាប់ៗគ្នា បណ្ដាលឲ្យផលិតផលម្រេចត្រូវខូចទាំងស្រុង ឬខូចគុណភាពមិនសមស្របទៅតាមស្តង់ដារបស់ក្រុមហ៊ុនបញ្ជាទិញ ។
បើតាមលោក ងួន ឡាយ ប្រធានសមាគមលើកកម្ពស់ផលិតផលម្រេចខេត្តកំពត បានមានប្រសាសន៍ថា ចំពោះកសិករ ឬម្ចាស់ចម្ការដែលប្រមូលផលបានមុន ការប៉ះពាល់មិនមាននោះទេទៅលើផលិតផលម្រេច ក៏ប៉ុន្តែសម្រាប់កសិករ ឬម្ចាស់ចម្ការដែលមិនទាន់បានប្រមូលផលអស់ពីចម្ការ នឹងជួបបញ្ហាប្រឈម ដោយវាជ្រុះនៅនឹងដើមផង ហើយមិនមានកំដៅថ្ងៃគ្រប់គ្រាន់សម្រាប់ហាលម្រេចឲ្យស្ងួត ដើម្បីឲ្យក្លាយជាម្រេចស្តង់ដាទៅតាមការបញ្ជាទិញ ឬចង់បានរបស់ក្រុមហ៊ុន ។ លោកនិយាយថា ៖«ក្នុងពេលភ្លៀងធ្លាក់ជាបន្តបន្ទាប់បែបនេះ ចំពោះផលិតផលម្រេចអាចនិយាយថា ខូចក៏បាន មិនខូចក៏បាន ។ វាមានន័យថា មិនខូច ចំពោះអ្នកដែលគេប្រមូលផលរួចរាល់ និងបានហាលស្ងួតត្រឹមត្រូវរួចហើយ តែសម្រាប់អ្នកដែលខូចដោយសារតែប្រមូលមិនទាន់អស់ពីចម្ការ និងមិនទាន់បានហាលស្ងួតត្រឹមត្រូវ » ។
លោកបន្តថា បើនិយាយជារួម ការខូចខាតផលិតផលម្រេចដែលបណ្ដាលមកពីភ្លៀងនេះ អាចមានទំហំប្រមាណ១៥% ពីព្រោះអីខែនេះ កសិករ និងម្ចាស់ចម្ការម្រេចភាគច្រើនបានប្រមូលរួចរាល់ខ្លះៗ និងសល់តែបន្តិចបន្តួច។ ម្យ៉ាងទៀត ការធ្លាក់ភ្លៀងបែបនេះ ក៏ធ្វើឲ្យកសិករចំណេញកម្លាំងសម្រាប់ស្រោចទឹកបានមួយចំនួនដែរ តែយ៉ាងណាក៏ដោយ ភ្លៀងធ្លាក់ខ្លាំងពេក ក៏បណ្ដាលឲ្យផ្កាម្រេចជ្រុះច្រើនដែរ អីចឹង នៅឆ្នាំក្រោយ វានឹងអាចទទួលទិន្នផលតិចជាងឆ្នាំនេះ ។ លោកបន្ថែមថា បើនិយាយពីទីផ្សារផលិតផលម្រេចកំពតនាពេលនេះវិញ វាហាក់ដូចជាចង្អៀតបន្តិចហើយ ព្រោះផលិតផលបានកើនឡើងជាបន្តបន្ទាប់ ក៏ព្រោះតែកសិករបានពង្រីកផ្ទៃដីដាំផង និងមានក្រុមហ៊ុនធំៗពីភ្នំពេញ ដែលជាអ្នកមានទុនច្រើន មកវិនិយោគដាំដំណាំម្រេចផ្ទាល់ផងដែរនៅក្នុងទឹកដីខេត្តកំពតនេះ។ លោកនិយាយថា ៖« កាលពីមុន យើងមានផលិតផលតិច បណ្ដាក្រុមហ៊ុននានាដែលប្រមូលទិញនាំចេញ បានសម្រុក និងដណ្ដើមគ្នាដាក់កក់ចុះកិច្ចសន្យាទិញម្រេចពីយើង តែនៅពេលដែលយើងមានផលិតផលកាន់តែច្រើន បែរជាក្រុមហ៊ុនទាំងនោះមិនបានធ្វើដូចកាលពីមុនទេ ពោលគឺគេចង់បានពេលណា គេមកពេលហ្នឹង ហើយគេយក ក៏មិនបានច្រើនដូចកាលពីមុនទៀតនោះទេ » ។ លោកបន្ថែមថា បើទោះបីជាទីផ្សារផលិតផលម្រេចចង្អៀតក្តី តែតម្លៃផលិតផលមួយនេះមិនបានចុះថ្លៃទេ គឺតម្លៃនៅដដែលក្នុងរយៈពេល២-៣ឆ្នាំកន្លងទៅនេះ ក្នុងនោះម្រេចខ្មៅ១៥ដុល្លារអាមេរិកក្នុង១គីឡូក្រាម, ម្រេចក្រហម២៥ដុល្លារអាមេរិក និងម្រេចស ២៨ដុល្លារអាមេរិកក្នុង១គីឡូក្រាម ។
លោក សោម សុខា ផលិតករម្រេចកំពតមួយរូបបានឲ្យដឹងថា ជាការពិតណាស់ ទីផ្សារម្រេចកំពតវារាងចង្អៀតបន្តិចហើយ ហើយរាល់ផលិតផលដែលផលិតបាន មួយភាគលក់ទៅសមាគម និងមួយភាគទៀត ត្រូវរកទីផ្សារដោយខ្លួនឯង ក្នុងតម្លៃទាបជាងតម្លៃដែលលក់ជូនទៅសមាគម ។ លោកថា ៖« បញ្ហាទីផ្សារម្រេចកំពត បានកើតឡើងចាប់តាំងពីមានក្រុមហ៊ុនធំៗមកបណ្ដាក់ទុននៅលើទឹកដីខេត្តកំពត ដើម្បីដាំម្រេចដោយខ្លួនឯង ហើយនាំចេញដោយខ្លួនឯងវិញ » ។
លោកបន្តថា ដំណាំម្រេចខុសពីដំណាំផ្សេង។ ដំណាំម្រេចប្រៀបបាននឹងកូនង៉ែតអីចឹង គឺត្រូវមានការថែទាំដិតដល់ណាស់ ហើយអ្នកដាំត្រូវទៅមើលថែវារាល់ថ្ងៃ នៅជាមួយវារាល់ថ្ងៃ មិនអាចទុកចោលដូចដំណាំផ្សេងៗបានឡើយ ។ ម្យ៉ាងទៀត ការវិនិយោគលើដំណាំម្រេច ក៏ត្រូវចំណាយដើមទុនច្រើនដែរ ដូច្នេះ បើសិនជាអ្នកមិនមានដើមទុនច្រើនទេ គឺត្រូវការខ្ចីពីធនាគារ ឬមីក្រូហិរញ្ញវត្ថុសម្រាប់ជាដើមទុន ។
គួរបញ្ជាក់ថា ម្រេចកំពត ត្រូវបានចាត់ទុកជាផលិតផលសម្គាល់ភូមិសាស្ត្រមួយរបស់កម្ពុជា ហើយវាបានធ្វើឲ្យផលិតផលនេះកាន់តែមានភាពល្បី និងទទួលស្គាល់ពីបណ្ដាទីផ្សារក្នុងនិងក្រៅស្រុក រហូតធ្វើឲ្យអ្នកដាំដំណាំនេះ កាន់តែមានភាពជីវភាពធូរធារ និងនាំគ្នាដាំច្រើននៅក្នុងខេត្តកំពត ។ បច្ចុប្បន្ន បើទោះបីជាផលិតផលម្រេចនៅបណ្ដាខេត្តផ្សេងបានធ្លាក់ថ្លៃខ្លាំងក៏ដោយ ក៏ម្រេចកំពតនៅតែរក្សាតម្លៃដដែល គ្រាន់តែទីផ្សារហាក់ចង្អៀតដោយសារតែការផលិតមានច្រើនជាងពីមុន ៕
ចែករំលែកព័តមាននេះ