សាច់ដុំធំ រាងកាយមាំមួន ជាអ្វីដែលបុរសចង់បានមែនទេ
- ភ្នំពេញ
រាជធានីភ្នំពេញ ៖ បុរសដែលមានរាងស្អាត គឺមានសាច់ដុំធំទាំងដៃជើង និងដងខ្លួន ព្រមទាំងក្បាលពោះ៦ផ្នត់ ឬហៅថា 6Pack ។ បុរសរាងបែបនេះ…
រាជធានីភ្នំពេញ ៖ បុរសដែលមានរាងស្អាត គឺមានសាច់ដុំធំទាំងដៃជើង និងដងខ្លួន ព្រមទាំងក្បាលពោះ៦ផ្នត់ ឬហៅថា 6Pack ។ បុរសរាងបែបនេះ…
រាជធានីភ្នំពេញ ៖ បុរសដែលមានរាងស្អាត គឺមានសាច់ដុំធំទាំងដៃជើង និងដងខ្លួន ព្រមទាំងក្បាលពោះ៦ផ្នត់ ឬហៅថា 6Pack ។ បុរសរាងបែបនេះ មានការចាប់អារម្មណ៍ពីមនុស្សទូទៅ ជាពិសេសទាក់ភ្នែកនារីៗ ។
នាពេលបច្ចុប្បន្នបុរសជាច្រើននិយមទៅធ្វើលំហាត់ប្រាណនៅតាមទីហាត់កីឡា ឬអ្នកទូទៅនិយមហៅថា កន្លែងលើក « អាល់ទែរ » ដើម្បីបានរូបរាងស្អាត ដោយមានសាច់ដុំ ធំៗ តាំងពីដើម.ក រហូតដល់ចុងជើង មើលទៅ រាងកាយមាំមួន និងសុខភាពល្អ ។ ទីហាត់កីឡា ឬ កន្លែងលើក «អាល់ទែរ» មានដុំដែកជាច្រើនសណ្ឋានចាប់ពី៥គីឡូក្រាមដល់១០០គីឡូក្រាម ។
ជាទូទៅគេសង្កេតឃើញអ្នកដែលមិនធ្លាប់ធ្វើលំហាត់ប្រាណទាល់តែសោះ គឺពេលដែលចូលទៅលើកដុំដែកដំបូង តែងតែលើកដុំដែកមានទម្ងន់ត្រឹមតែ៥គីឡូក្រាម ដល់១០គីឡូក្រាមប៉ុណ្ណោះ ដោយពួកគេមិនអាចលើកលើសទម្ងន់ជាងនេះបានឡើយ ព្រោះវាត្រូវការការប្រើប្រាស់ចលនាសាច់ដុំខ្លាំង ។ ដោយឡែក ចំពោះអ្នកដែលឧស្សាហ៍ទៅហាត់ជា អន្លើយៗវិញ គឺពួកគេតែងលើកដុំដែកទម្ងន់ចាប់ពី៣០គីឡូក្រាមដល់៥០គីឡូក្រាមឯណោះ ។
លំហាត់ប្រាណរបស់ពួកគេ គឺហាត់ក្នុងថេរវេលាចាប់ពី១ម៉ោង ដល់៣ម៉ោង ខណៈអ្នកដែលទើបនឹងចាប់ផ្តើមហាត់ដំបូងអាចទ្រទ្រង់កម្លាំងរបស់ខ្លួនក្នុងថេរវេលាបានតែ១៥ ទៅ២០នាទីប៉ុណ្ណោះ ។
បុរសម្នាក់ដែលមានរាងស្អាតសាច់ដុំ ធំៗ និងឆ្លងកាត់ការហាត់ជាង៣ឆ្នាំកន្លងទៅ ឈ្មោះរិទ្ធិ ណាលិ អាយុ២៤ឆ្នាំ ជាមន្ត្រីនគរបាលការិយាល័យកណ្តាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ មានទីលំនៅនៅភូមិសន្សំកុសល សង្កាត់បឹងទំពុន១ ខណ្ឌមានជ័យ បានថ្លែងប្រាប់កោះសន្តិភាពកាលពីពេល ថ្មីៗកន្លងមកថា ៖ មុនពេលលោកមិនទាន់ទៅលើកអាល់ទែរ លោកនៅរាងស្គម មានទម្ងន់តែ៥២គីឡូក្រាមប៉ុណ្ណោះ ។
លុះក្រោយមកដោយសារតែកត្តាហូបច្រើនយ៉ាងណាក៏នៅតែមិនទទួលបានរាងធំស្អាតនោះ លោកក៏សម្រេចចិត្តទៅលើកអាល់ទែរ ដោយពេលចាប់ផ្តើមលើកដំបូង គឺគាត់ទទួលអាការហាក់ឈឺចាប់ខ្លាំងពេញខ្លួនប្រាណតែម្តង ពិសេសត្រង់ចំណុចដៃ និងឆ្អឹងខ្នង ក្រោយពេលហាត់រួច ។ លោកនៅតែមិនចុះចាញ់នោះឡើយ ដោយព្យាយាមហាត់ជាបន្តបន្ទាប់រហូតបានជាង២សប្តាហ៍ អាការឈឺចាប់ក៏បាត់ទៅវិញ ព្រោះសាច់ដុំស៊ាំនឹងទម្ងន់ដែក ។
តាំងពីពេលនោះមក លោកក៏ចាប់ផ្តើមលើកដុំដែកដែលមានទម្ងន់ធ្ងន់ទៅៗ ជាបន្តបន្ទាប់ រហូតទទួលបានរូបរាងស្អាត និងមានទម្ងន់ដល់៧៨គីឡូក្រាម ។ គីឡូនេះជាគីឡូដែលសមសួនជាមួយនឹងរូបរាងមនុស្សប្រុស ហើយរូបរាងបែបនេះមើលទៅក៏សង្ហា និងគួរឱ្យចាប់អារម្មណ៍ ។
បុរសដដែលបន្តថា ក្នុងមួយថ្ងៃលោកហាត់១ពេលប៉ុណ្ណោះគឺនៅពេលល្ងាច ដោយហាត់ចំនួន៣ម៉ោង ហើយក្នុងមួយសប្តាហ៍ហាត់៦ថ្ងៃប៉ុណ្ណោះ គឺចាប់ពីថ្ងៃចន្ទ ដល់សៅរ៍ ដោយឈប់មួយថ្ងៃ គឺនៅថ្ងៃអាទិត្រដើម្បីអាចឱ្យសាច់ដុំបានសម្រាក និងទទួលការលូតលាស់បាន ។ មួយរយៈក្រោយមកនេះ លោកពុំសូវមានពេលវេលាច្រើនដើម្បីទៅធ្វើលំហាត់ដូចពេលមុនទៀតនោះទេ ព្រោះជាប់រវល់ការងារផ្ទាល់ខ្លួនច្រើនណាស់ ដូច្នេះហើយក្នុងមួយសប្តាហ៍អាចទៅហាត់បានតែ ២ថ្ងៃប៉ុណ្ណោះ ហើយបើសប្តាហ៍ខ្លះរវល់ច្រើនវិញ អាចនឹងមិនបានហាត់ទាល់តែសោះក៏មានដែរ ។
ដោយឡែកបុរសសាច់ដុំ ធំៗ ម្នាក់ទៀត ឈ្មោះជា បញ្ញារ៉ា អាយុ២៥ឆ្នាំ ជាមន្ត្រីនគរបាលនៃអធិការដ្ឋាននគរបាលខណ្ឌច្បារអំពៅ ថ្លែងប្រាប់កោះសន្តិភាពឱ្យដឹងថា ៖ ពីមុនលោកមានរាងស្គម ដើរទៅណាមកណា ហាក់មិនមែនជាមនុស្សប្រុសទេ ព្រោះគ្មានសាច់ឈាមនឹងគេឡើយ ។ ការស្លៀកពាក់់អ្វីក៏មិនសមសួននឹងរូបរាងកាយផងដែរ ។ លុះក្រោយពេលខំប្រឹងលើកអាល់ទ័រជាង១ឆ្នាំកន្លងមក ឃើញថារូបរាងកាយរបស់លោកហាក់មានការប្រែប្រួលខ្លាំងបំផុត សឹងតែអាចនិយាយបានថា មនុស្សម្នាក់អាចប្រែទៅជាមនុស្សផ្សេងដទៃវិញ ។
ក្រោយពេលខិតខំហាត់ជាងមួយឆ្នាំ នៅពេលដើរទៅខាងក្រៅ ម្តងៗ មិនថា ទៅដើរលេង ទៅធ្វើការ ឬទៅតាមកម្មវិធីតូចធំ ផ្សេងៗនោះឡើយ គឺលោកហាក់មានភាពជឿជាក់លើខ្លួនឯងខ្ពស់បំផុត ដោយសារតែរូបរាងធំសមសួនជាបុរស ស្លៀកពាក់អ្វីមើលទៅក៏សម ជាហេតុធ្វើឱ្យមជ្ឈដ្ឋានទូទៅតែងកើតមានចំណាប់អារម្មណ៍លើលោកច្រើនគួរសម ។
លោកជា បញ្ញារ៉ា បន្តថា បើទោះបីជាពុំមានមានអ្នកចាប់អារម្មណ៍ ឬគាំទ្រក៏ដោយ ក៏លោកពេញចិត្តចំពោះរូបរាងកាយរបស់ខ្លួនឯង នាពេលបច្ចុប្បន្ននេះដែរ ។
សារមួយឃ្លារបស់បុរសទាំង២នាក់ នោះថ្លែងទៅកាន់អ្នកដែលមានរាងស្គម ប្រសិនបើចង់បានរូបរាងស្អាត មានសាច់ដុំធំៗ ដូចពួកលោកសូមព្យាយាមអំណត់អត់ធ្មត់ឱ្យបានច្រើន និងតាំងចិត្តខ្ពស់ក្នុងការធ្វើលំហាត់ប្រាណប្រចាំថ្ងៃ ព្រោះវាមិនមែនជួយឱ្យរាងកាយស្អាតតែមួយមុខទេ តែវាក៏ជាជ្រុងមួយក្នុងការចូលរួមចំណែកថែទាំ និងថែរក្សាសុខភាពរបស់មនុស្សឱ្យនៅល្អផងដែរ ៕
ចែករំលែកព័តមាននេះ