រាជធានីភ្នំពេញ ៖ បុរសម្នាក់បានស្លាប់ និង៣នាក់ផ្សេងទៀតបានរងរបួសធ្ងន់ ដោយសារគ្រោះថ្នាក់ចរាចរណ៍រវាងរថយន្តបុកជាមួយនឹងគោយន្តកន្ត្រៃ កាលពីថ្ងៃទី២២ ខែកក្កដា ឆ្នាំ២០១៨នេះ នៅត្រង់ចំណុចផ្លូវកែងស្រះទឹក តាមបណ្តោយផ្លូវជាតិលេខ៦២…
រាជធានីភ្នំពេញ ៖ បុរសម្នាក់បានស្លាប់ និង៣នាក់ផ្សេងទៀតបានរងរបួសធ្ងន់ ដោយសារគ្រោះថ្នាក់ចរាចរណ៍រវាងរថយន្តបុកជាមួយនឹងគោយន្តកន្ត្រៃ កាលពីថ្ងៃទី២២ ខែកក្កដា ឆ្នាំ២០១៨នេះ នៅត្រង់ចំណុចផ្លូវកែងស្រះទឹក តាមបណ្តោយផ្លូវជាតិលេខ៦២ ស្ថិតក្នុងភូមិត្មាតប៊ើយ ឃុំព្រីងធំ ស្រុកជាំក្សាន្ត ខេត្តព្រះវិហារ។
សមត្ថកិច្ចបានបញ្ជាក់ថា បុរសដែលស្លាប់នៅនឹងកន្លែងកើតហេតុឈ្មោះ ហ៊ោ ណេង អាយុ៤៥ឆ្នាំ រីឯអ្នករងរបួសធ្ងន់ទាំង៣នាក់រួមមាន ៖ ១-ឈ្មោះ យៀប ថី ភេទស្រី អាយុ៣៧ឆ្នាំ ២-ឈ្មោះ ណេង ស៊ីនុត ភេទប្រុស អាយុ៥ឆ្នាំ ៣-ឈ្មោះ ថុល ថក់ ភេទប្រុស អាយុ៣២ឆ្នាំ ។ ទាំង៤នាក់រស់នៅភូមិជាំស្រែ ឃុំយាង ស្រុកជាំក្សាន្ត ខេត្តព្រះវិហារ។
តាមការអោយដឹងពីសមត្ថកិច្ចនៅកន្លែងកើតហេតុអោយដឹងថា មុនកើតហេតុ រថយន្តស៊េរីទំនើបមួយគ្រឿង ពណ៍ខ្មៅ ពាក់ស្លាកលេខ ភ្នំពេញ ២AF-៥២៨២ បើកបរក្នុងល្បឿនលឿន ទើបជ្រុលមកបុកគោយន្តកន្ត្រៃពីក្រោយពេញមួយទំហឹង បណ្តាលអោយបុរសម្នាក់ស្លាប់ភ្លាមៗនៅនឹងកន្លែងកើតហេតុ ចំណែក៣នាក់ទៀត រងរបួសធ្ងន់ ត្រូវបានគេដឹកយកទៅជួយសង្គ្រោះភ្លាមៗ នៅមណ្ឌលសុខភាពតាកឹង ស្ថិតក្នុងស្រុកគូលេន ខេត្តព្រះវិហារ។
ចំណែកអ្នកបើកបររថយន្តបង្ក ក្រោយពីបង្កហេតុ បានរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ ។ ពេលនេះសមត្ថកិច្ចកំពុងស្រាវជ្រាវរកអ្នកបើកបររថយន្តដែលរត់គេចខ្លួននោះ ដើម្បីអោយចូលខ្លួនមកធ្វើការដោះស្រាយតាមផ្លូវច្បាប់ ។ ចំណែកឯសពជនរងគ្រោះត្រូវបានសមត្ថកិច្ចដឹកយកទៅតម្កល់ទុកនៅមណ្ឌលសុខភាពតាកឹង រង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕
ចែករំលែកព័តមាននេះ