រាជធានីភ្នំពេញ ៖ បុរសម្នាក់ចេញពីផឹកស៊ីវិញស្រវឹងទោទន់ហើយបានបើករថយន្តឡើងចំណោតបួងចង្កូតមិនទាន់បានជ្រុលទៅបុករថយន្តដឹកសំរាម ដែលបើកបញ្ច្រាសទិសគ្នាយ៉ាងពេញទំហឹង បណ្តាលអោយរថយន្តទាំងពីរកៀបជាប់គ្នា រងការខូចខាតយ៉ាងដំណំ ហេតុការណ៍នេះបានកើតឡើងនៅវេលាម៉ោង១រំលងអាធ្រាត្រ ឈានចូលថ្ងៃទី២៣ ខែកក្កដា ឆ្នាំ២០១៨ ផ្លូវបេតុង ត្នោតជ្រុំ កែងនិងផ្លូវ៣៧១ សង្កាត់ដង្កោ ខណ្ឌដង្កោ ។
តាមប្រភព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញបុរស២នាក់ជាអ្នករួមដំណើរ និងអ្នកបើកបរម្នាក់បានបើករថយន្តដឹកសំរាមមួយគ្រឿង ពណ៌ស បានធ្វើដំណើរតាមផ្លូវ៣៧១ ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៍ស្រាប់តែបុរសម្នាក់វ័យជាង៣០ឆ្នាំ មិនដឹងថាចេញពីផឹកស៊ីនៅកន្លែងណានោះបានបើកបររថយន្ដមួយគ្រឿងម៉ាកហាយឡែនឌ័រ ពណ៌ទឹកប្រាក់ ធ្វើដំណើរតាមផ្លូវបេតុងត្នោតជ្រុំ ក្នុងទិសដៅ ពីជើងទៅត្បូង ក្នុងល្បឿនលឿន ដើម្បីឡើងចំណោតបត់ឆ្វេងឡើងផ្លូវ៣៧១ តែដោយសារតែរថយន្តលឿនពេក ហើយណាមួយអ្នកបើកបរស្រវឹងផងនោះ ទើបបួងចង្កូតរថយន្តមិនទាន់ក៍ជ្រុលទៅបុករថយន្តដឹកសំរាមចំពីមុខយ៉ាងពេញទំហឹង បណ្តាលអោយកៀបរថយន្តជាប់គ្នា រីឯរថយន្តហាយឡែនឌ័របានរងការខូចខាតខ្ទេចផ្នែកចំហៀងខាងមុខ តែមិនមានគ្រោះថ្នាក់ដល់មនុស្សឡើយ ។ ដោយឡែករថយន្តដឹកសំរាមបានរងការខូចខាតក្រពឹតកាងខាងមុខចំហៀងខាងឆ្វេង តែសំណាងល្អមិនមានគ្រោះថ្នាក់ដល់មនុស្សដូចគ្នា ។
ភ្លាមៗនោះដែរ ភាគីទាំងសងខាងបានទូរសព្ទ័ហៅតំណាងមករៀងៗខ្លួន ដើម្បីសម្របសម្រួលគ្នា ដោយលើកយកហេតុផលមករៀងៗខ្លួន ។ ក្រោយពេលកើតហេតុ បន្ទាប់ពីការចរចារគ្នាអស់រយៈពេលជាងមួយម៉ោង ទើបខាងរថយន្តហាយឡែនឌ័រសុំសងសំណង ទៅខាងរថយន្តដឹកសំរាមចំនួនទឹកប្រាក់៥០ដុល្លារដើម្បីបញ្ចប់រឿង ៕
ចែករំលែកព័តមាននេះ