រាជធានីភ្នំពេញ ៖ ជនជាប់ចោទជាជនជាតិចិន២នាក់ បានត្រូវសាលាដំបូងរាជធានីភ្នំពេញ នៅថ្ងៃទី១៧ ខែកក្កដា ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់១០ឆ្នាំក្នុងម្នាក់ៗក្រោមការចោទប្រកាន់ពីបទកំហែងយក និងបទរំលោភសេពសន្ថវៈនៅផ្ទះជួលមួយក្នុងក្រុងតាខ្មៅ ខេត្តកណ្ដាល ។ ជនជាប់ចោទទាំង២នាក់នេះ ម្នាក់ឈ្មោះ Dai Ze Qing ភេទប្រុស អាយុ៤៣ឆ្នាំ និងម្នាក់ទៀតឈ្មោះ Yan Qiu Fen ភេទប្រុស អាយុ៣៩ឆ្នាំ ។
គួរបញ្ជាក់ថា កាលពីព្រឹកថ្ងៃទី២១ ឧសភា ឆ្នាំ២០១៨ សាលាដំបូងរាជធានីភ្នំពេញ បានបើកសវនាការជំនុំជម្រះទោសលើជនជាប់ចោទជនជាតិចិនទាំង២នាក់ ដែលពាក់ពន្ធពីបទចាប់បង្ខាំងមនុស្សរំលោភសេពសន្ថវៈ និងជំរិតទារប្រាក់ពីជនរងគ្រោះ ។ ប៉ុន្តែក្រោយពេលបញ្ចប់សវនាការ ប្រធានក្រុមប្រឹក្សានៃអង្គសវនាការ បានសម្រេចលើកពេលប្រកាសសាលក្រមទៅថ្ងៃទី១៧ កក្កដា ។
ជនជាតិចិន២នាក់នេះ បានត្រូវនគរបាលខណ្ឌពោធិ៍សែនជ័យ សហការជាមួយនគរបាលខេត្តកណ្តាល ឃាត់ខ្លួនកាលពីថ្ងៃទី២៤ ខែវិច្ឆិកាឆ្នាំ២០១៦ វេលាម៉ោង៥និង៣០នាទីល្ងាច នៅចំណុចផ្ទះសំណាក់ដាល្លាវីន បន្ទប់លេខ១១៣ក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ។ ក្នុងពេលសវនាការជនជាប់ចោទបានបដិសេធថា ពួកគេមិនបានប្រព្រឹត្តដូចការចោទប្រកាន់នោះទេ ។ចំណែកជនរងគ្រោះឈ្មោះ Cheng Pingyunហៅ Zhao Xia ភេទស្រី អាយុ២៤ឆ្នាំ ជនជាតិចិនដូចគ្នា បានបំភ្លឺថា កាលពីថ្ងៃទី២៣ ខែវិច្ឆិកា ឆ្នាំ២០១៦ វេលាម៉ោង១២យប់ មានភ្ញៀវជាជនជាតិចិនដូចគ្នាដែលស្គាល់គ្នាតាមរយៈ Wechat មានលេខទូរស័ព្ទ០៩៧ ៣៧ ៣៩ ៧១០ គឺជនជាប់ចោទបានទាក់ទងមកលេខ ០៨៨ ៦០០ ៧៤ ២៦ ជាលេខរបស់នាងឱ្យមកជួយម៉ាស្សានៅខាងក្រៅ ។
ជនជាប់ចោទបានឱ្យនាងទៅជួបនៅចំណុចផ្សារ«ខាយសាន» មហាវិថីសហព័ន្ធរុស្សុី ខាងមុខព្រលានយន្តហោះអន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។ នៅពេលជួបគ្នា ជនជាប់ចោទបានយកកូនកាំបិតចុងស្រួចភ្ជង់គំរាមនាងឱ្យឡើងជិះរថយន្តតាក់ស៊ីមួយគ្រឿងពណ៌ក្រហម មិនចាំម៉ាក និងផ្លាកលេខ ទៅផ្ទះសំណាក់«ដាល្លាវីន» ស្ថិតក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ដោយនាំចូលបន្ទប់លេខ១១៣ ។
ពេលនោះជនជាប់ចោទទាំង២នាក់ បាននាំគ្នាចាប់រំលោភនាង ដោយជនឈ្មោះ Dai Ze Qing ជាអ្នករំលោភមុនបានសម្រេច១លើក និងបន្ទាប់មកឈ្មោះ Yan Qiu Fen បានធ្វើសកម្មភាពចាប់រំលោភរហូតបានសម្រេចចំនួន២លើក ។បន្ទាប់ពីធ្វើសកម្មភាពរំលោភរួចហើយ ជនជាប់ចោទបានយកកូនកាំបិតចុងស្រួចភ្ជង់គំរាមសម្លាប់ បើសិនបើនាងហ៊ានស្រែកឬបើហ៊ានប្តឹងសមត្ថកិច្ច ។ លុះនៅថ្ងៃទី២៤ ខែវិច្ឆិកា ឆ្នាំ២០១៦ វេលាម៉ោងប្រហែល១១ទៅ១២ថ្ងៃត្រង់ ជនជាប់ចោទឈ្មោះ Yan Qiu Fen បានចាប់រំលោភនាងបានសម្រេចម្តងទៀត ។
ក្រោយមក ជនជាប់ចោទបានទូរស័ព្ទទៅថៅកែជាជនជាតិចិនរបស់ជនរងគ្រោះ តាមរយៈទូរស័ព្ទលេខ ០៨៨ ៨០ ៥៣ ៦៣៦ ដើម្បីជំរិតទារប្រាក់ចំនួន១ម៉ឺនដុល្លារអាមេរិក ជាថ្នូរនឹងការដោះលែងជនរងគ្រោះ បើមិនបានប្រាក់ទេ ពួកគេគំរាមថានឹងសម្លាប់ជនរងគ្រោះចោល ។ ពេលនោះថៅកែរបស់ជនរងគ្រោះបានវេរប្រាក់ចំនួន២០០ដុល្លារអាមេរិកឱ្យទៅជនជាប់ចោទ និងទៅប្តឹងនគរបាលខណ្ឌពោធិ៍សែនជ័យ ដើម្បីឱ្យជួយអន្តរាគមន៍លើករណីនេះ ។ បន្ទាប់ពីទទួលបានពាក្យបណ្តឹងភ្លាម កម្លាំងនគរបាលខណ្ឌពោធិ៍សែនជ័យ បានសហការជាមួយនគរបាលក្រុងតាខ្មៅ ឆ្មក់ចូលក្នុងបន្ទប់ផ្ទះសំណាក់ខាងលើ ចាប់ខ្លួនជនសង្ស័យនិងរំដោះជនរងគ្រោះពីក្រញាំបិសាចតណ្ហា ៕
ចែករំលែកព័តមាននេះ