រាជធានីភ្នំពេញ ៖ ស្ត្រីជនជាតិចិនម្នាក់ ខណៈកំពុងដើរតាមផ្លូវមាត់ទន្លេ បានត្រូវជន២នាក់ជិះម៉ូតូហុងដាឌ្រីមឆក់កាបូបតែមិនបានសម្រេច ហើយជនរងគ្រោះទាញជនសង្ស័យជាអ្នកឆក់ធ្លាក់ពីលើម៉ូតូ និងត្រូវប្រជាពលរដ្ឋនាំគ្នាឃាត់ខ្លួន បាននាំយកទៅប្រគល់ឱ្យសមត្ថកិច្ចប៉ុស្តិ៍ផ្សារកណ្តាលទី១ ។ ហេតុការណ៍នេះ កើតឡើងកាលពីវេលាម៉ោង១១និង២០នាទីយប់ថ្ងៃទី១៩ ខែកក្កដា នៅចំណុចកែងរវាងផ្លូវព្រះស៊ីសុវត្ថិនិងផ្លូវលេខ១១៨ ស្ថិតក្នុងសង្កាត់ផ្សារកណ្តាលទី១ ខណ្ឌដូនពេញ ។
ជនសង្ស័យដែលឃាត់ខ្លួនបានឈ្មោះ គឹម វណ្ណៈ ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅក្នុងសង្កាត់ផ្សារថ្មីទី៣ ខណ្ឌដូនពេញ ចំណែកជនដែលរត់គេចខ្លួនរួចឈ្មោះ ឆៃ ។ ជនដែលប្រជាពលរដ្ឋចាប់បាន ត្រូវបានវាយម្នាក់មួយដៃម្នាក់មួយជើង បណ្តាលឱ្យរងរបួសយ៉ាងដំណំ រួចទើបប្រគល់ទៅឱ្យនគរបាលប៉ុស្តិ៍ផ្សារកណ្តាលទី១ ។
នៅចំពោះមុខសមត្ថកិច្ច ជននេះបានឆ្លើយថា ខ្លួនពុំបានធ្វើសកម្មភាពឆក់ទេ គឺរូបគេទើបតែចេញមកពីផឹកស៊ីនៅហាងស៊ីវីល័យ នៅផ្លូវលេខ៥៣ សង្កាត់ផ្សារថ្មីទី៣ ខណ្ឌដូនពេញ ជាមួយមិត្តភក្តិ៤នាក់ទៀត ។ ពេលជិះម៉ូតូទៅដល់ចំណុចខាងលើ ស្រាប់តែទាក់ដៃចង្កូតគេដួល ហើយត្រូវគេស្រែកថា ចោរៗតែម្តង ចំណែកឯមិត្តភក្តិឈ្មោះឆៃនោះ ទើបតែស្គាល់គ្នាបានកន្លះខែប៉ុណ្ណោះ ។
ចែករំលែកព័តមាននេះ