រាជធានីភ្នំពេញ ៖ លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា នៅដើមខែកក្កដា ឆ្នាំ២០១៨នេះ ជំនន់ទឹកភ្លៀងទូទាំងប្រទេសបានបណ្ដាលឱ្យខេត្តព្រះសីហនុ កំពត កោះកុង កំពង់ស្ពឺ និងបាត់ដំបង សរុបមាន១២ស្រុក ដែលមានប្រជាពលរដ្ឋសរុប៣.៨២៦គ្រួសាររងការប៉ះពាល់យ៉ាងខ្លាំង ហើយប្រជាពលរដ្ឋចំនួន១.០៧៩គ្រួសារត្រូវបានជម្លៀសទៅទីទួលសុវត្ថិភាព ។
នៅក្នុងគ្រោះជំនន់ទឹកភ្លៀងនេះដែរ បណ្តាលឱ្យខូចខាតផ្ទះ៦ខ្នង សាលារៀន៨កន្លែង វត្ត២ និងវិហារខ្មែរ
អ៊ិស្លាម២ ។ ក្រៅពីនេះ បាត់គោ១៤ក្បាល ទឹកជន់លិចដីស្រែចម្ការសរុប៣.៩២៥ហិកតា ក្នុងចំនួននេះខូចខាត៤៣ហិកតា ស្ពាន១ក្នុងចំនួន៥ និងស្រះចិញ្ចឹមត្រី៧ ខូចខាត២ បាត់ទូក២គ្រឿង ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងទៀតថា ក្នុងចំណោមខេត្តទាំង៥មាន ខេត្តកំពត កោះកុង និងកំពង់ស្ពឺ រងប៉ះពាល់ខ្លាំងជាងគេ ពីព្រោះទឹកទើបតែជន់លិច ខណៈដែលខេត្តដទៃទៀតទឹកបានស្រក ។រីឯទឹកហូរជន់លិចផ្លូវនេះដែរ ផ្លូវលំមួយចំនួនដែលមានពី៧០ទៅ៨០ខ្សែ ក៏រងផលប៉ះពាល់ដែរ ។ បញ្ហានេះក្រសួងជំនាញបានចុះពិនិត្យហើយ តែការវាយតម្លៃទំហំនៃការខូចខាតគឺនៅពេលដែលទឹកស្រកអស់ ទើបវាយតម្លៃបាន ។
ក្រៅពីខេត្តទាំង៥ខាងលើ ក៏មានខេត្តមួយចំនួនទៀតរងការប៉ះពាល់ដោយសារជំនន់ទឹកភ្លៀងបន្តិចបន្តួចដែរដូចជា ប៉ៃលិន កែប និងរតនគិរី ។ ជាមួយគ្នានេះ ខេត្តដែលស្ថិតនៅជាប់ទន្លេមេគង្គ ក៏ត្រូវមានការប្រុងប្រយ័ត្នផងដែរ ដោយសារទឹកទន្លេមេគង្គកើនឡើងច្រើនបណ្ដាលមកពីប្រព័ន្ធរងសម្ពាធទាប ធ្វើឱ្យមាន
ភ្លៀងធ្លាក់ច្រើននៅអាងទន្លេមេគង្គលើ ។ ដូច្នេះដើម្បីចៀសវាងជាយថាហេតុណាមួយ ក្រសួងពាក់ព័ន្ធក៏ដូចជាអាជ្ញាធរមូលដ្ឋាន បានចេញសេចក្ដីប្រកាស ឬជូនជាព័ត៌មានទៅប្រជាពលរដ្ឋឱ្យមានការប្រុងប្រយ័ត្នជាមុន ។
លោក កែវ វី បញ្ជាក់ថា បច្ចុប្បន្នមិនទាន់មានបញ្ហាអ្វីគួរឱ្យកត់សម្គាល់នៅឡើយទេ ដោយសារកម្ពស់ទឹកនៅមិនទាន់ឡើងដល់ចំណុចត្រូវប្រកាសអាសន្ន ហើយកម្ពស់ទឹកអាចឡើងពី២ទៅ៣ម៉ែត្រទៀត អាចដល់ចំណុចត្រូវប្រុងប្រយ័ត្ន ។ ក្រសួងធនធានទឹកនិងឧតុនិយម ក៏ធ្លាប់ចេញសេចក្ដីប្រកាសរួចមកហើយ ចំពោះប្រជាពលរដ្ឋនៅតាមទីទំនាបទន្លេមេគង្គលើ ត្រូវរួសរាន់ប្រញាប់ប្រមូលផល កុំឱ្យមានការខូចខាតច្រើនពេលទឹកជន់ឡើងធំ ។
ទឹកជន់ឡើងតាមដងព្រែក អូរ តាមបណ្ដាខេត្តមួយចំនួន ភាគច្រើនមកពីទឹកភ្លៀង ហើយទន្លេមេគង្គលើដែលនៅកម្ពុជាឡើង ជាទឹកភ្លៀងដែលធ្លាក់មកពីអាងទន្លេមេគង្គ ពីប្រទេសថៃ និងឡាវ ដោយក្នុងមួយថ្ងៃអាចឡើងពី១០សង់ទីម៉ែត្រទៅ៥០សង់ទីម៉ែត្រជារៀងរាល់ថ្ងៃ ។ទឹកទន្លេមេគង្គនឹងចាប់ផ្ដើមស្រកទៅវិញនៅដើមខែតុលា ។ ចំពោះវិធានការទប់ស្កាត់គ្រោះមហន្តរាយដោយសារជំនន់ទឹកភ្លៀងនេះ អាជ្ញាធរ
មូលដ្ឋានក៏ដូចជារាជរដ្ឋាភិបាល បានត្រៀមកម្លាំងបម្រុងក្នុងការជួយសង្គ្រោះជាមុនគ្រប់មធ្យោ
បាយ នៅពេលមានហេតុការណ៍កើតឡើង មានស្បៀងនិងសម្ភារផ្សេងៗមួយចំនួន ។
គួររំឭកថា ដើម្បីឆ្លើយតបក្នុងការសង្គ្រោះបន្ទាន់ សម្ដេចតេជោនាយករដ្ឋមន្ត្រី ហ៊ុន សែន ក៏បានអំពាវនាវដល់អាជ្ញាធរដែនដី និងប្រជាពលរដ្ឋ សូមមានការប្រុងប្រយ័ត្ន និងត្រៀមបង្ការខ្ពស់ចំពោះគ្រោះធម្មជាតិដូចជា ទឹកជំនន់ ខ្យល់ព្យុះ រន្ទះបាញ់ ដែលអាចកើតមានតាមការព្យាកររបស់ក្រសួងជំនាញ ដើម្បីកាត់បន្ថយផលប៉ះពាល់និងខូចខាតទាំងទ្រព្យសម្បត្តិ ផលដំណាំនិងអាយុជីវិត ៕
ចែករំលែកព័តមាននេះ