ប្រទេសថៃ ៖ កុមារទាំង១១នាក់ក្នុងចំណោមកុមារទាំង១២នាក់ និងគ្រូបង្វឹកបាល់ទាត់ពួកគេដែលត្រូវបានសង្គ្រោះចេញពីរូងភ្នំថាមហ្លួង ភាគខាងជើងប្រទេសថៃ ពេលនេះបានលុតជង្គង់ថ្វាយបង្គំព្រះសង្ឃជាច្រើនអង្គ ក្នុងពិធីមួយមុនសាងផ្នួសរបស់ពួកគេ ស្ថិតនៅវត្តមួយនៃខេត្តឈៀងរ៉ៃ។ ជាង១សប្ដាហ៍ក្រោយចេញពីរូងភ្នំដែលពួកគេជាប់នៅក្នុងនោះ ព្រោះតែទឹកជន់លិច…
ប្រទេសថៃ ៖ កុមារទាំង១១នាក់ក្នុងចំណោមកុមារទាំង១២នាក់ និងគ្រូបង្វឹកបាល់ទាត់ពួកគេដែលត្រូវបានសង្គ្រោះចេញពីរូងភ្នំថាមហ្លួង ភាគខាងជើងប្រទេសថៃ ពេលនេះបានលុតជង្គង់ថ្វាយបង្គំព្រះសង្ឃជាច្រើនអង្គ ក្នុងពិធីមួយមុនសាងផ្នួសរបស់ពួកគេ ស្ថិតនៅវត្តមួយនៃខេត្តឈៀងរ៉ៃ។
ជាង១សប្ដាហ៍ក្រោយចេញពីរូងភ្នំដែលពួកគេជាប់នៅក្នុងនោះ ព្រោះតែទឹកជន់លិច កុមារ១១នាក់ក្នុងចំណោមកុមារ១២នាក់នឹងបួសរយៈពេល៩ថ្ងៃ មុនពេលវិលត្រឡប់ទៅរកជីវភាពធម្មតាវិញ ដែលនោះជាការទម្លាប់ក្នុងប្រទេសមួយដែលប្រជាជនភាគច្រើនកាន់ព្រះពុទ្ធសាសនា។
អភិបាលខេត្តឈៀងរ៉ៃថ្មី លោក PRACHON PRATSAKUL កាលពីថ្ងៃទី២២ កក្កដា ២០១៨ បានថ្លែងទៅកាន់សារព័ត៌មានថា កុមារ១១នាក់ត្រូវសាងផ្នួសរយៈពេល៩ថ្ងៃ ចំណែកគ្រូបង្វឹកបាល់ទាត់ពួកគេនឹងក្លាយជាសង្ឃ។ រីឯកុមារទី១២ ឈ្មោះ ADUL SAM ON ពុំបានបួសឡើយ ព្រោះគេជាគ្រឹស្តសាសនិក។ តាមពិតទៅគ្រូបង្វឹកបាល់ទាត់ លោក EKKAPOL CHANTAWONG តាំងចិត្តជាសង្ឃរួចទៅហើយ ទើបអាចជួយកុមារឲ្យតាំងចិត្តស្ងប់ពេលស្ថិតក្នុងរូងភ្នំ។
មានអាយុពី១១ទៅ១៦ឆ្នាំកុមារបាល់ទាត់ក្រុមជ្រូកព្រៃ ដែលជាប់ក្នុងរូងភ្នំក្រោយនាំចេញមកបាន ដំបូងស្ថិតជាច្រើនថ្ងៃក្នុងមន្ទីរពេទ្យ មុនពេលឲ្យវិលត្រឡប់ទៅផ្ទះវិញ។ក្រោយចេញពីពេទ្យ កាលពីថ្ងៃទី១៩ កក្កដា ពួកគេបានទៅវត្តរួចហើយ ដើម្បីធ្វើពិធីបែបសាសនាមួយចំនួន សូមឲ្យពួកគេលែងជួបទុក្ខភ័យទៀត និងបានរស់នៅដោយសុខសាន្ត។
ព្រះតេជគុណ PRAPHUN KHOMJOI ជាអ្នកទទួលខុសត្រូវលើព្រះសង្ឃខេត្តឈៀងរ៉ៃ បានបញ្ជាក់ថា កុមារទាំងនេះត្រូវកោរសក់នាថ្ងៃទី២៥ កក្កដា មុនពេលបំបួសគ្រងជីវរនាថ្ងៃបន្ទាប់។ ពួកគេនឹងស្ថិតក្នុងវត្តទាំងឡាយរហូតដល់ថ្ងៃទី៤ សីហា ទើបសឹកវិញ៕
ចែករំលែកព័តមាននេះ