ខេត្តកំពង់ធំ ៖ អភិបាលស្រុកបារាយណ៍ដឹកនាំក្រុមការងារចុះសាកសួរសុខទុក្ខប្រជាពលរដ្ឋដែលត្រូវបានខ្យល់កន្ត្រាក់បក់រលំផ្ទះ លោក ហាក់ ម៉ុងហួត អភិបាលស្រុកបារាយណ៍ បានដឹកនាំក្រុមការងារចុះសាកសួរសុខទុក្ខប្រជាពលរដ្ឋ ២គ្រួសារដែលត្រូវបានខ្យល់កន្ត្រាក់បក់រលំផ្ទះ នៅក្នុងភូមិអូចំរេះ ឃុំបាក់ស្នា ស្រុកបារាយណ៍ ខេត្តកំពង់ធំ កាលពីថ្ងៃទី២២ ខែកក្កដា ឆ្នាំ២០១៨ ។
លោក ហាក់ ម៉ុងហួត អភិបាលស្រុកបានមានប្រសាសន៍ថា បន្ទាប់ពីទទួលព័ត៌មានថា បងប្អូនប្រជាពលរដ្ឋរងគ្រោះដោយសារខ្យល់កន្ត្រាក់រលំផ្ទះ លោកបានចុះសាកសួរសុខទុក្ខភ្លាមៗ និងបានក្រុមការងារថ្នាក់ស្រុក និងឃុំបានចុះអន្តរាគមន៍ជួយប្រជាពលរដ្ឋ ពិនិត្យមើលពីការប៉ះពាល់ និងជួយជុសជុលផ្ទះ ដើម្បីផ្តល់ទីបណ្តោះអាសន្ន សម្រាប់ស្នាក់អាស្រ័យ និងឲ្យក្រុមការងារបន្តតាមដានជាប់ជាប្រចាំផ្តល់ភាពកក់ក្តៅដល់ពួកគាត់ ។
ទោះយ៉ាងណាក៏ដោយមិនមានបងប្អូនប្រជាពលរដ្ឋរងគ្រោះដល់ជីវិតនោះទេ ។ លោក អភិបាលស្រុកក៏បានសូមបងប្អូនប្រជាពលរដ្ឋមានការប្រុងប្រយ័ត្នខ្ពស់ ជាពិសេសពេលមេឃរកកល់ភ្លៀង សូមរកកន្លែងសុវត្ថិភាព ជៀសវាងគ្រោះថ្នាក់ដោយយថាហេតុ និងត្រូវចេះថែសុខភាព ហូបស្អាត ផឹកស្អាត កុំឱ្យមានជំងឺផ្សេងៗទៀត ។
ជាមួយគ្នានេះ លោក ហាក់ ម៉ុងហួត ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ជាប្រចាំ ដើម្បីជៀសវាងគ្រោះថ្នាក់ដែលអាចកើតឡើង និងសូមអាជ្ញាធរមូលដ្ឋានគ្រប់លំដាប់ថ្នាក់យកចិត្តទុកដាក់ខ្ពស់ ចំពោះជនងាយរងគ្រោះ និងកុមារតូចៗ និងពិនិត្យតាមដានសភាពការណ៍កម្រិតទឹកនៅតាមភូមិសាស្ដ្រខាងលើឲ្យបានខ្ជាប់ខ្ជួន ៕
ចែករំលែកព័តមាននេះ