រាជធានីភ្នំពេញ ៖ យុវជនចំនួន២នាក់ត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលទន្លេបាសាក់ បន្ទាប់ពីយុវជន២នាក់នោះ បានប្រើហិង្សារវាយទៅលើស្ត្រីម្នាក់គ្រាន់តែរឿងគ្រោះថ្នាក់ចរា
ចរណ៍បន្តិចបន្តួចតែប៉ុណ្ណោះ ។ ហេតុការណ៍នេះបានកើតឡើងនៅវេលាម៉ោង៨យប់ថ្ងៃទី២២ ខែកក្កដា ឆ្នាំ២០១៨ ទល់មុខនឹងផ្សាទំនើប ផ្លូវសុធារស សង្កាត់ទន្លេបាសាក់ ខណ្ឌចំការមន ។
តាមសម្តីនារីរងគ្រោះ សុំមិនបញ្ចេញឈ្មោះបានអោយដឹងថា មុនពេលកើតហេតុ គាត់មានគ្នាពីរនាក់ប្តីប្រពន្ធបានជិះម៉ូតូមួយគ្រឿងម៉ាកឌ្រីមសង់ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កំពត ១M-២២៩៩ ចេញពីផ្ទះគោលបំណងមកទទួលម្តាយនៅម្តុំផ្សារទំនើប ខណៈពួកគាត់ធ្វើដំណើរមកដល់ចំណុចកើតហេតុ ម៉ូតូរបស់ពួកគាត់បានជ្រុលទៅបុកនឹងម៉ូតូមួយគ្រឿងម៉ាកឌូករបស់យុវជន២នាក់នោះពីក្រោយបន្តិច ស្រាប់តែពេលនោះខាងយុវជន២នាក់ដែលជិះម៉ូតូធុនធំម៉ាកឌូកនោះបានចុះពីលើម៉ូតូមកវាយគាត់ជាស្ត្រី១ដៃចំផ្ទៃមុខ បណ្តាលអោយធ្លាក់ពីលើម៉ូតូតែម្តង ហើយពេលនោះដែរ ប្តីរបស់គាត់បានចុះពីលើម៉ូតូ វាយទៅលើយុវជន២នាក់នោះទៅវិញទៅមក បណ្តាលអោយរងបួស ហើមមុខបន្តិចបន្តួច ហើយត្រូវបានសន្តិសុខយាមផ្សារជួយឃាត់ ចាប់យុវជន២នាក់នោះយកមកអោយសមត្ថកិច្ចប៉ុស្តិ៍នគរបាល ទន្លេបាសាក់ដើម្បីសាកសួរតែម្តង ។
ដោយឡែកខាងយុវជន ២នាក់នោះវិញគឺមិនបានបកស្រាយអ្វីនោះទេ ។ នៅពេលនាំភាគីទាំងសងខាងមកដល់ប៉ុស្តិ៍សមត្ថកិច្ច ភាគីទាំងសង្ខាងបានសម្របសម្រួលគ្នា ដោយខាងស្ត្រីរងគ្រោះទាមទារសំណងជំងឺចិត្តចំនួន៧៥០ដុល្លារ តែខាងយុវជនទាំងពីរនាក់អត់មានដំណោះស្រាយនោះទេ ។
ក្រោយពេលកើតហេតុ ស្ត្រីរងគ្រោះបានដាក់ពាក្យបណ្តឹងអោយសមត្ថកិច្ចចាត់ការតាមផ្លូវច្បាប់ ចំណែកយុវជនទាំងពីរនាក់វិញត្រូវបានសមត្ថកិច្ចកសាងសំណុំរឿងបញ្ជូនទៅអធិការដ្ឋានខណ្ឌចំការមនដើម្បីចាត់ការបន្តតាមនីតិវិធី ៕
ចែករំលែកព័តមាននេះ