ខេត្តកណ្តាល ៖ អ្នកដំណើរលើសាឡាងជាច្រើននាក់ព្រលឹងចុងសក់គ្រប់ៗគ្នា ខណៈរថយន្តស៊ីរ៉ែនរបស់អធិការដ្ឋាននគរបាលស្រុកខ្សាច់កណ្តាល ទំនងជាឆ្លងចរន្តភ្លើង បានឆេះចេញជាអណ្តាតភ្លើង ។ ពេលនោះក្រុមកម្មករសាឡាង បានយកបំពង់ពន្លត់អគ្គិភ័យមកបាញ់ពន្លត់ តែមិនរលត់…
ខេត្តកណ្តាល ៖ អ្នកដំណើរលើសាឡាងជាច្រើននាក់ព្រលឹងចុងសក់គ្រប់ៗគ្នា ខណៈរថយន្តស៊ីរ៉ែនរបស់អធិការដ្ឋាននគរបាលស្រុកខ្សាច់កណ្តាល ទំនងជាឆ្លងចរន្តភ្លើង បានឆេះចេញជាអណ្តាតភ្លើង ។ ពេលនោះក្រុមកម្មករសាឡាង បានយកបំពង់ពន្លត់អគ្គិភ័យមកបាញ់ពន្លត់ តែមិនរលត់ លុះសាឡាងបើកដល់ច្រាំង អ្នកដំណើរលើសាឡាងទាំងអស់ ក៏នាំគ្នារុញរថយន្តនោះចូលទឹកទើបរលត់ រួចហើយសណ្តោងរថយន្តពីក្នុងទឹកមកដាក់លើគោកវិញ ។
ហេតុការណ៍ដែលកម្រនេះ បានកើតមានកាលពីថ្ងៃ២០ កក្កដា វេលាម៉ោង០៦និង៣០នាទីយប់ ស្ថិតនៅ
លើសាឡាងឈ្មោះវិស្ណុ ស្ថិតក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ។ តាមអ្នកឃើញហេតុការណ៍និយាយថា នៅល្ងាចថ្ងៃនោះ រថយន្តស៊ីរ៉ែនខាងលើបានឆ្លងពីត្រើយខាងភ្នំពេញ មកត្រើយខាងអរិយក្សត្រជាមួយរថយន្តជាច្រើនគ្រឿងទៀត ។ លុះនៅចម្ងាយប្រមាណ៤០០ ទៅ៥០០ម៉ែត្រទៀត ដល់ច្រាំង លោកនាយផ្នែកនគរបាលយុត្តិធម៌ស្រុកខ្សាច់កណ្តាល ដែលជាអ្នកបើករថយន្តនោះក៏បានបញ្ឆេះរថយន្ត ដើម្បីត្រៀមបើកចេញពីសាឡាង ។
ប្រភពព័ត៌មានឱ្យដឹងទៀតថា ខណៈនោះស្រាប់តែរថយន្តឆ្លងភ្លើងឆេះចេញជាអណ្តាតភ្លើង និងហុយផ្សែងទ្រលោម ធ្វើឱ្យអ្នកដំណើរឆោឡោពេញសាឡាង ដោយអ្នកខ្លះប្រុងលោតចូលទឹកថែមទៀតផង ។ ពេលនោះ ក្រុមកម្មករបានយកបំពង់ពន្លត់អគ្គិភ័យមកបាញ់ពន្លត់តែមិនរលត់ លុះសាឡាងបើកមកដល់ក្បែរច្រាំងអ្នកដំណើរនៅលើសាឡាង ក៏នាំគ្នារុញរថយន្តចូលទឹកទើបរលត់ រួចហើយសណ្តោងរថយន្តពីក្នុងទឹកយកទៅរក្សាទុកនៅប៉ុស្តិ៍នគរបាលរដ្ឋបាលស្វាយជ្រំ ស្រុកខ្សាច់កណ្តាល ។
ទោះបីជាបែបណា ករណីខាងលើនេះ មិនបណ្តាលឱ្យមានគ្រោះថ្នាក់ដល់មនុស្សណាម្នាក់ទេ គឺខូចខាតតែរថយន្ត១គ្រឿងនេះប៉ុណ្ណោះ ។ រថយន្តដែលឆេះនេះ ម៉ាកកាមរីគូទហើម អាចស៊េរីឆ្នាំ១៩៩២ ឬ១៩៩៣ ៕
ចែករំលែកព័តមាននេះ