ខេត្តស្ទឹងត្រែង ៖ កំលាំងប៉េអឹមក្រុង-ស្រុក និងស្នាក់ការសន្តិសុខ បានសហការជាមួយមន្ត្រីរដ្ឋបាលព្រៃឈើសង្កាត់សេសានចុះបង្ក្រាបកាណូតប្រភេទស៊ីឃេ ដឹកឈើគ្រញូងតាមដងទន្លេទាំងថ្ងៃ ទាំងយប់តាមទន្លេសេសាន និងសេកុង។ ការដឹកជញ្ជូនមិនឈប់ឈរនេះដោយសារតម្លៃហាងឆេងឈើគ្រញូងបានថ្លៃ ធ្វើឱ្យឈ្មួញជាច្រើននាំគ្នាសំរុកប្រមូលទិញតាមតំរូវការរបស់ថៅកែវៀតណាម។
តាមប្រភពព័ត៌មានឱ្យដឹងថា ឈើគ្រញូងជាចំនៀរ ដែលគេអារច្រៀកជាសន្លឹកភាគច្រើននៅស្ទឹងត្រែងគេនិយមហៅថា (ប៉ាកកេ) ដែលជាឈើទុកសំរាប់តែដុតដាំបាយហូបទៅហើយ គឺអាចលក់បានតម្លៃ៣.០០០ទៅ៤.០០០រៀលក្នុងមួយគីឡូក្រាម។ ចំពោះទីផ្សារឈើគ្រញូងនៅតំបន់ស គឺលក់បានតម្លៃ៤.០០០ទៅ៤.៥០០ដុល្លារក្នុងមួយម៉ែត្រគូប រីឯប្រភេទគ្រញូងជាកូនក្រឡឹងមានមុខកាត់មួយតឹកបួនជ្រុងប្រវែងប្រាំមួយតឹកឈ្មួញកណ្តាលក្នុងខេត្តឱ្យតំលៃ៦.០០០ទៅ៧.០០០រៀលក្នុងមួយគីឡូក្រាម តែពេលទៅដល់វៀតណាមតំលៃ៥.០០០ទៅ៥.៥០០ដុល្លារក្នុងមួយម៉ែត្រគូប ហើយឈើប្រភេទគ្រញូងដែលមានមុខកាត់៣០×៤០ប្រវែងពីរម៉ែត្រ មានតំលៃរហូតជាងមួយម៉ឺនដុល្លារក្នុងមួយម៉ែត្រគូប។
នៅថ្ងៃទី១២ មីនា ចាប់តាំងពីព្រឹកគេសង្កេតឃើញកាណូតស៊ីឃេ ផ្ទុកទៅដោយឈើគ្រញូងច្រកក្នុងការុងយ៉ាងច្រើនដឹកមកពីស្រុកសេសាន តាមភូមិមួយចំនួនចូលមកកំពង់ផែខេត្ត។ នៅល្ងាចថ្ងៃដដែល កំលាំងប៉េអឹម និងជំនាញរដ្ឋបាលព្រៃឈើបានចុះបង្ក្រាបចាប់កាណូតបានចំនួនបួនគ្រឿង តែរត់រួចអស់ចំនួន៣គ្រឿងនៅសល់តែមួយគ្រឿងបញ្ជូនទៅខណ្ឌរដ្ឋបាលព្រៃឈើខេត្តកសាងសំណុំរឿង និងរក្សាវត្ថុតាង។ ប្រភពពីកន្លែងកើតហេតុបានឱ្យដឹងថា ក្រោយពីកំលាំងជំនាញ និងប៉េអឹមស្រុក-ក្រុង និងស្នាក់ការបង្ក្រាបនោះ មានបុរសម្នាក់បានមកអះអាងថា ឈើ និងកាណូតស៊ីឃេ នេះជារបស់គាត់។ គាត់រកស៊ីដឹកឈើគ្រញូងតាមកាណូតស៊ីឃេ ប៉ុណ្ណឹងបើសមត្ថកិច្ចចង់ចាប់យកទៅដល់ណាក៏យកចុះ ទោះបីចូលតុលាការចូលគុកក៏គាត់មិនខ្លាចដែរ ៕
ចែករំលែកព័តមាននេះ