ខេត្តស្វាយរៀង ៖ បុរសម្នាក់បានលួចស្រឡាញ់នាងក្រមុំនៅជិតខាងគ្នាជាយូរឆ្នាំមកហើយ តែដោយគ្មានលុយចូលស្តីដណ្តឹងនាង មកធ្វើជាប្រពន្ធ ក៏បែកគំនិតលេងផ្លូវកាត់ឡើងទៅលើផ្ទះប៉ងចាប់រំលោភ ក៏នាងដឹងខ្លួនទាន់ ក៏ស្រែកឆោឡោផ្អើលដល់ម្តាយប្តឹងសមត្ថកិច្ចឲ្យចាប់ខ្លួន ហើយទីបំផុតកំលោះចាស់ក៏ត្រូវជាប់ខ្នោះ ។ ហេតុការណ៍នេះ កើតឡើងកាលពីវេលាម៉ោងជាង៨យប់ថ្ងៃទី១៩ ខែកក្កដា នៅឃុំប្រសូតិ ស្រុកស្វាយទាប ។
បើតាមសមត្ថកិច្ចឱ្យដឹងថា បុរសរូបនេះឈ្មោះ ទិត្យ ថែ អាយុ៣៥ឆ្នាំ ពុំមានមុខរបរពិតប្រាកដ រស់នៅក្នុងឃុំខាងលើ បានលបឡើងទៅលើផ្ទះរបស់នាងក្រមុំដែលនៅក្បែរគ្នាបំណងចាប់រំលោភព្រោះតែស្រឡាញ់នាងជាយូរឆ្នាំមកហើយ ។ រីឯនាងក្រមុំដែលទើបមានអាយុ២០ឆ្នាំ និយាយថា នៅវេលាម៉ោងជាង៨
យប់នោះ ពេលនាងកំពុងដេកលក់ ស្រាប់តែឮសំឡេងមនុស្សបើកមុងរបស់នាង ព្រមទាំងមានធុំក្លិនបារីផង ទើបស្ទុះក្រោកឡើង ហើយស្រែកឆោឡោហៅម្តាយដែលសម្រាកនៅក្រោមផ្ទះឱ្យជួយ ។
ក្រោយមានការស្រែកឆោឡោ ជនជាប់ចោទភ័យបានរត់ចុះពីលើផ្ទះរបស់នាងយ៉ាងប្រញាប់និងលោតផ្លោះរបងទៅពួននៅផ្ទះរបស់ខ្លួនធ្វើព្រងើយ ប៉ុន្តែដោយនាងស្គាល់ជននោះច្បាស់ក៏ប្តឹងសមត្ថកិច្ចតាមដំណើររឿង ។ ក្រោយពីទទួលបណ្តឹងពីនាង នគរបាលស្រុកស្វាយទាប សហការជាមួយនគរបាលប៉ុស្ដិ៍មូលដ្ឋាន បានធ្វើការស្រាវជ្រាវនិងឃាត់ខ្លួនជនឈ្មោះ ទិត្យ ថែ នាំមកសាកសួរ រួចឃាត់ខ្លួនបញ្ជូនទៅការិយាល័យនគរបាលព្រហ្មទណ្ឌកម្រិតស្រាល ខេត្តនារសៀលថ្ងៃទី២០ ខែកក្កដា ។
នៅចំពោះមុខសមត្ថកិច្ច ជនជាប់ចោទបានឆ្លើយសារភាពថា ខ្លួនពិតជាប៉ុនប៉ងរំលោភនាងប្រាកដពិតមែន ដោយសារលួចស្រឡាញ់នាងជាយូរឆ្នាំមកហើយ តែគ្មានប្រាក់ដើម្បីចូលស្តីដណ្តឹង។ នេះជាគំនិតសុញពេកណាស់ មនុស្សមានកម្លាំងកំហែងមិនរកការងារធ្វើរកប្រាក់មកដណ្តឹងប្រពន្ធ បែរជារង់ចាំវាសនាធ្លាក់ពីលើមេឃទៅវិញ ទីបំផុតក្លាយជាអ្នកទោស ៕
ចែករំលែកព័តមាននេះ