រាជធានីភ្នំពេញ ៖ បុរសពីរនាក់ជិះម៉ូតូឌ្រីមស៊េរី០១៨មួយគ្រឿង ចេញពីខារ៉ាអូខេហើយបំណងទៅផឹកបន្តនៅកោះពេជ្រ ខណៈមកតាមផ្លូវក៏ត្រូវក្រុមចោរមួយក្រុមជិះដេញតាម និងសកម្មភាពវាយប្លន់យកម៉ូតូបានសម្រេច បណ្តាលឲ្យជនរងគ្រោះរងរបួសបែកក្បាល ។ ហេតុការណ៍នេះកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី២៣ ខែកក្កដា ឆ្នាំ២០១៨នៅតាមបណ្ដោយផ្លូវ៦០៨ ស្ថិតក្នុងសង្កាត់បឹងកក់ទី២ ខណ្ឌទួលគោក ។
ជនរងគ្រោះជាម្ចាស់ម៉ូតូមានឈ្មោះ ធឿន ប៊ុនធុល ភេទប្រុស អាយុ២៣ឆ្នាំ ជាជាងជួសជុលរថយន្ត ស្នាក់នៅស្រុកស្អាង ខេត្តកណ្ដាល ។ ទីពីរជាអ្នកអង្គុយពីក្រោយមានឈ្មោះ ផុន ណារ៉ូ ភេទប្រុស អាយុ២៥ឆ្នាំ ជាកម្មកររោងចក្រ ស្នាក់នៅសង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីជនរងគ្រោះទាំងពីរនាក់ខាងលើបានឲ្យដឹងថា នៅមុនពេលកើតហេតុជនរងគ្រោះបានទើបតែចេញមកពីច្រៀងខារ៉ាអូខេនៅម្ដុំភ្នំពេញថ្មី ហើយបំណងទៅផឹកជាមួយនឹងសង្សារបន្តទៀតនៅម្តុំកោះពេជ្រ ។ ដោយជិះម៉ូតូមួយគ្រឿងម៉ាក ហុងដាឌ្រីមស៊េរី០១៨ ពណ៌ខ្មៅ ពាក់ស្លាកលេខ កំពង់ចាម 1F-4596 តាមបណ្ដោយផ្លូវ៦០៨ ក្នុងទិសដៅចុះមកពីទំនប់ត្រឡោកបែក ឆ្ពោះទៅអតីតរង្វង់ទួលគោក ។ លុះមកដល់ចំណុចកើតហេតុស្រាប់តែលេចមុខជនសង្ស័យមួយក្រុមប្រដាប់ដោយខ្សែក្រវាត់ជិះម៉ូតូប្រាំទៅប្រាំមួយគ្រឿង មកតាមពីក្រោយ ហើយក៏បានធ្វើសកម្មភាពវាយប្លន់ទៅលើជនរងគ្រោះជាម្ចាស់ម៉ូតូចំសៀតផ្កាខាងឆ្វេង បណ្តាលឲ្យបែកឈាម ហើយក៏ដួលម៉ូតូ ។
ភ្លាមៗនោះដោយក្រុមជនសង្ស័យឃើញឱកាសល្អក៏លើកម៉ូតូរបស់ជនរងគ្រោះជិះរត់គេចខ្លួនបាត់ស្រមោលដោយសុវត្ថិភាព ភ្លាមនោះដែរជនរងគ្រោះក៏បានស្រែកចោរៗឲ្យគេឯងដែលនៅក្បែរនោះជួយ តែគ្មាននរណាម្នាក់ជួយនោះទេ ។
ក្រោយពេលកើតហេតុជនរងគ្រោះបានត្រឹមតែកាន់កាតគ្រីទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងកក់ទី២ ដោយក្តីសោកស្ដាយតែប៉ុណ្ណោះ ៕
ចែករំលែកព័តមាននេះ