ប្រទេសអ៊ីស្រាអែល និងប៉ាឡេស្ទីន ៖ ទោះបីភាពស្ងប់ស្ងាត់កើតមានឡើងវិញ នៅជ្រោយហ្គាហ្សា បន្ទាប់ពីការផ្ទុះ អំពើហិង្សាថ្មីមួយប្រាវទៀត ក៏បណ្ដាជនស៊ីវិលប៉ាឡេស្ទីន និងអ៊ីស្រាអែល នៅតែភ័យខ្លាចការផ្ទុះជម្លោះថ្មីរវាងអ៊ីស្រាអែល…
ប្រទេសអ៊ីស្រាអែល និងប៉ាឡេស្ទីន ៖ ទោះបីភាពស្ងប់ស្ងាត់កើតមានឡើងវិញ នៅជ្រោយហ្គាហ្សា បន្ទាប់ពីការផ្ទុះ អំពើហិង្សាថ្មីមួយប្រាវទៀត ក៏បណ្ដាជនស៊ីវិលប៉ាឡេស្ទីន និងអ៊ីស្រាអែល នៅតែភ័យខ្លាចការផ្ទុះជម្លោះថ្មីរវាងអ៊ីស្រាអែល និងក្រុមហាម៉ាស់ ដែលកាន់អំណាចនៅហ្គាហ្សា។
បន្ទាប់ពីទាហានខ្លួនម្នាក់ស្លាប់កាលពីថ្ងៃទី២០ កក្កដា ដោយសារការវាយប្រហាររបស់ពួកប៉ាឡេស្ទីន ពេលមានបាតុកម្ម ជិតព្រំដែនរវាងហ្គាហ្សា និងដែនដីអ៊ីស្រាអែល កងទ័ពអ៊ីស្រាអែលបានធ្វើការវាយប្រហារតាមអាកាសយ៉ាងខ្លាំងក្លា នៅហ្គាហ្សាបណ្ដាលឲ្យស្លាប់ជនជនប៉ាឡេស្ទីន៤នាក់ ក្នុងនោះ៣នាក់ ជាសមាជិកសាខាប្រដាប់អាវុធក្រុមហាម៉ាស់។
ក្រោយការធ្វើអាជ្ញាកណ្ដាលរបស់អង្គការសហប្រជាជាតិ និងអេហ្ស៊ីប បទឈប់បាញ់គ្នាមួយត្រូវបានគោរពជាសកលនាថ្ងៃទី២១ កក្កដា ប៉ុន្តែប្រជាជននៅមានការព្រួយបារម្ភ។
យោងតាមអ្នកទទួលខុសត្រូវម្នាក់របស់ក្រុមហាម៉ាស់ថា បទឈប់បាញ់គ្នាថ្មីគ្រោងបញ្ឈប់ការវាយប្រហារតាមអាកាសរបស់អ៊ីស្រាអែល និងការបាញ់គ្រាប់រ៉ុក្កែតរបស់ប៉ាឡេស្ទីនទៅកាន់អ៊ីស្រាអែល ប៉ុន្តែពុំមែនការបង្ហោះខ្លែងមានភ្ជាប់គ្រឿងឆេះឡើយ។
ជនប៉ាឡេស្ទីនជិត១៥០នាក់ស្លាប់ដោយស្នាដៃកងទ័ពអ៊ីស្រាអែល រយៈពេលស្ទើរតែ៤ខែនៃការតវ៉ារបស់ពួកប៉ាឡេស្ទីននៅតាមព្រំដែន។ ចំណែកអ៊ីស្រាអែលមានស្លាប់ទាហានតែម្នាក់គត់។ នោះជាទាហានអ៊ីស្រាអែលដំបូងស្លាប់នៅជិតហ្គាហ្សា ចាប់តាំងពីសង្គ្រាមឆ្នាំ២០១៤រវាងអ៊ីស្រាអែល និងក្រុមហាម៉ាស់មក៕
ចែករំលែកព័តមាននេះ