រាជធានីភ្នំពេញ ៖ បុរសម្នាក់បានរងរបួសធ្ងន់ ខណៈបើកបររ៉ឺម៉កម៉ូតូកង់បីព្យាយាមបត់ឆ្វេងត្រូវរថយន្តមកបុកពីក្រោយពេញទំហឹង ។ ករណីនេះបង្កឱ្យមានការភ្ញាក់ផ្អើកាលពីម៉ោង១១និង៣០នាទីថ្ងៃទី២១ កក្កដា ឆ្នាំ២០១៨ នៅចំណុចមុខព្រលានយន្តហោះអន្តរជាតិភ្នំពេញ ផ្លូវសហព័ន្ធរុស្សី ភូមិព្រៃទាសង្កាត់ចោមចៅ៣ ខណ្ឌពោធិ៍សែនជ័យ។
ជនរងគ្រោះឈ្មោះ ចាន់ ណា អាយុ៣៧ឆ្នាំ មុខរបររត់រ៉ឺម៉កម៉ូតូកង់បី ស្នាក់នៅភូមិកន្ទោក សង្កាត់កន្ទោកខណ្ឌពោធិ៍សែនជ័យ បានរងរងរបួសធ្ងន់។ ចំណែកអ្នកបើកបររថយន្តឈ្មោះម៉ី ចាន់រ៉ាឌី អាយុ៣០ឆ្នាំ ស្នាក់នៅផ្ទះលេខ១៣ផ្លូវ៣៣៩ សង្កាត់បឹងកក់១ ខណ្ឌទួលគោក។
តាមប្រភពព័ត៌មានបានប្រាប់ឱ្យដឹងថា មុនកើតហេតុ គេបានឃើញបុរសម្នាក់បើកបររ៉ឺម៉កម៉ូតូកង់បីបានធ្វើដំណើរក្នុងទិសដៅពីលិចទៅកើត ខណៈមកដល់ចំណុចកើតហេតុខាងលើបានបត់ឆ្វេងវាងទ្រូងផ្លូវ ស្រាប់
តែមានរថយន្តមួយគ្រឿងពណ៌ខៀវ បើកមកពីក្រោយបុកចំពាក់កណ្តាលរ៉ឺម៉កម៉ូតូកង់បីតែម្តង បណ្តាលអោយកន្ទុយរ៉ឺម៉កម៉ូតូកង់បីខ្ទាតទៅលើចិញ្ចើមផ្លូវ ហើយម៉ូតូអូសរ៉ឺម៉កកៀបជាប់ជាមួយរថយន្តតែម្តងធ្វើអោយអ្នកបើកបររ៉ឺម៉កម៉ូតូកង់បីបោកផ្ទុបនឹងរថយន្តរងរបួសធ្ងន់ ។
តាមសំដីអ្នកបើកបររថយន្តបានប្រាប់សមត្ថកិច្ចឱ្យដឹងថា មុនកើតហេតុ គាត់បានបើកបររថយន្តម្នាក់ឯងក្នុងទិសដៅពីលិចទៅកើត ខណៈមកដល់ចំណុចខាងលើស្រាប់តែឃើញរ៉ឺម៉កម៉ូតូកង់បីខាងលើបើកលើផ្លូវបញ្ច្រាសទល់មុខរថយន្តគាត់ ហើយអ្នកបើកបររ៉ឺម៉កម៉ូតូកង់បីបានព្យាយាមបើកបត់មកផ្លូវម្ខាងទៀត តែដោយសារគាត់ជាន់ហ្វាំងមិនទាន់ក៍ទៅបុកទាំងកំរោលតែម្តងទៅ។
ទោះជាយ៉ាងណា ក្រោយកើតហេតុ អ្នករងរបួសធ្ងន់ត្រូវបានរថយន្តសង្គ្រោះដឹកទៅកាន់គ្លីនិកឯកជន
ដែលនៅក្បែរកន្លែងកើតហេតុហើយបងប្អូនក៍បញ្ជូនបន្តទៅមន្ទីពេទ្យធំ១៧៩។ ដោយឡែករថយន្ត និងរ៉ឺម៉កម៉ូតូកង់បីត្រូវបានកម្លាំងនគរបាលនៃការិយាល័យចរាចរជើងគោករាជធានីភ្នំពេញចុះមកវាស់វែងយកទៅរក្សាទុកដោះស្រាយគ្នាពេលក្រោយ ក្នុងនោះអ្នកបើកបររថយន្តខាងលើក៍ត្រូវបានហៅទៅសាកសួរផងដែរ ៕
ចែករំលែកព័តមាននេះ