ខេត្តបាត់ដំបង ៖ «យើងបានទៅបោះឆ្នោត គឺដើម្បីខ្លួនឯង» នេះជាប្រសាសន៍លោក ឡោក ហ៊ួរ ប្រធានក្រុមការងារចុះជួយស្រុកសង្កែ ក្នុងពិធីសំណេះសំណាលជាមួយសមាជិកគណបក្សប្រជាជនកម្ពុជាចំនួន៤០០នាក់ មកពី៣ភូមិ…
ខេត្តបាត់ដំបង ៖ «យើងបានទៅបោះឆ្នោត គឺដើម្បីខ្លួនឯង» នេះជាប្រសាសន៍លោក ឡោក ហ៊ួរ ប្រធានក្រុមការងារចុះជួយស្រុកសង្កែ ក្នុងពិធីសំណេះសំណាលជាមួយសមាជិកគណបក្សប្រជាជនកម្ពុជាចំនួន៤០០នាក់ មកពី៣ភូមិ គឺភូមិស្វាយធំ ភូមិទួលល្វៀង និងភូមិដំបូកខ្ពស់ ក្នុងអូរដំបង២ ស្រុកសង្កែខេត្តបាត់ដំបង ក្រោមអធិបតីភាពលោក ឡោក ហ៊ួរ សមាជិកគណកម្មធិការកណ្តាលគណបក្សប្រជាជនកម្ពុជា អ្នកតំណាងរាស្ត្រមណ្ឌលបាត់ដំបង និងប្រធានក្រុមការងារថ្នាក់កណ្តាល ដោយមានការចូលរួមពីសមាជិកក្នុងខេត្ត-ស្រុកបានចូលរួមផងដែរ ។
ដែលបានធ្វើឡើងនៅក្នុងបរិវេណវត្តកំណប់ ឃុំអូរដំបង២ ស្រុកសង្កែនៅវេលារសៀលថ្ងៃទី២១ ខែកក្កដា ឆ្នាំ២០១៨ ។ ថ្លែងក្នុងឱកាសនោះ លោកឡោក ហ៊ួរ បានបញ្ជាក់ថា អាណត្តិបន្តបន្ទាប់លោកត្រូវបានបងប្អូនស្គាល់នៅទីនេះជាច្រើនឆ្នាំមកហើយ ដោយបានរៀបចំផ្លូវថ្នល់ ប្រព័ន្ធធារាសាស្ត្រ បន្ថែមប្រឡាយទឹកចំនួន៤ខ្សែទៀត តាមតម្រូវការរបស់កសិករ ដែលបានកំពុងក្លាយទៅជាពាណិជ្ជករលើដំណាំស្រូវក្នុងខេត្តរបស់យើង ។
លោកបានថ្លែងបន្តទៀតថា ប្រទេសកម្ពុជាយើងអភ័ព្វណាស់ក្នុងប្រវត្តិសាស្ត្រនេះ ដែលបានបន្សល់ភាពរ៉ាំរ៉ៃនៃសង្គ្រាមដណ្តើមអំណាច សូម្បីតែព្រះមហាវីរៈក្សត្រសម្តេចឪ(សម្តេចព្រះនរោត្តមសីហនុ)កំពុងកសាងប្រទេសនៅសម័យឆ្នាំ១៩៦០ ក៏នៅមានពួកប្រឆាំងតាមលាបពណ៌ ញុះញង់ ដោយមានបរទេសនៅពីក្រោយខ្នង ដើម្បីបង្កបង្កើតជាសង្គ្រាមឡើង ហើយបក្សប្រឆាំងមួយចំនួនបានធ្វើរដ្ឋប្រហារទំលាក់សម្តេចឪនៅឆ្នាំ១៩៧០ ហើយឡើងកាន់អំណាចដោយលោកលន់ នល់ ដែលមានអាមេរិកនៅពីក្រោយខ្នង បានដឹកនាំបង្កសង្គ្រាមរហូតនាំគ្រឿងផ្ទុះ សព្វាវុធ គ្រាប់បែកប្រមាណជាង៧លានតោនមកបង្កសង្គ្រាម ទម្លាក់គ្រាប់បែកនៅស្រុកខ្មែរឲ្យស្លាប់ប្រជាជនប្រមាណ៧៥ម៉ឺននាក់ ហើយបន្តមកទៀតនៅឆ្នាំ១៩៧៥ របបខ្មែរក្រហមដែលដឹកនាំដោយប៉ុល ពត បានលាបពណ៌ចោទពីរបបសក្តិភូមិ លក់ទឹកដីឲ្យប្រទេសជិតខាង រំដោះតស៊ូវណ្ណៈ គ្មានអ្នកមាន គ្មានអ្នកក្រ រត់តស៊ូក្នុងព្រៃរហូតរំដោះបាននៅឆ្នាំ១៩៧៥ ហើយដឹកនាំតាមយុទ្ធសាស្ត្រដោយជម្លៀសប្រជាជនចេញពីទីក្រុង ឲ្យទៅរស់នៅធ្វើស្រែដោយមានវណ្ណៈតែមួយ ។
ដោយបំបាក់ស្មារតីដោយមិនឲ្យប្រជាជនមានសិទ្ធតវ៉ា ដើរហើរទៅណាបានដោយសេរី ក្នុងការរស់នៅ គ្មានសេដ្ឋកិច្ចទីផ្សារឡើយ បើនៅតែហ៊ានត្រូវតែសម្លាប់ចោលអស់ជាង៣លាននាក់ និងបង្អត់អាហារមិនឲ្យមានការហូបចុកគ្រប់គ្រាន់ឡើយ ទោះបីមានស្រូវអង្ករហូរហៀរយ៉ាងណាក៏ដោយ នេះហើយជាលទ្ធផលដែលក្រមប្រឆាំងម្ខាងៗតែងតែលាបពណ៌ ចោទថា ក្បត់ជាតិដោយសារអ្នកមានចំណេះដឹងត្រូវកម្ទេចចោលទាំងអស់ ។
ក្នុងឱកាសនោះលោកតំណាងរាស្ត្របានជម្រាបជូនប្រជាពលរដ្ឋថា នៅសល់តែរយៈពេល០៨ថ្ងៃទៀតប៉ុណ្ណោះ ដល់ថ្ងៃបោះឆ្នោត ហើយសូមប្រជាពលរដ្ឋត្រៀមឯកសារឲ្យគ្រប់គ្រាន់ ដើម្បីទៅបោះឆ្នោតនៅថ្ងៃទី២៩ ខែកក្កដាខាងមុខនេះ គឺការបោះឆ្នោតជ្រើសតាំងតំណាងរាស្ត្រ រដ្ឋសភាអាណត្តិទី០៦ ៕
ចែករំលែកព័តមាននេះ