ខេត្តរតនគីរី ៖ តាមប្រភពព័ត៌មានបានឱ្យដឹងថា តែមួយថ្ងៃកើតឡើង៣ករណីផ្សេងៗគ្នា ក្នុងនោះរួមមាន ៖ ករណីទី១-ក្មេងស្រីម្នាក់បានលង់ទឹកអូរស្លាប់ ហេតុការណ៍នេះបានកើតឡើងកាលពីវេលាម៉ោង១រសៀលថ្ងៃទី២១ ខែកក្កដា ឆ្មាំ២០១៨…
ខេត្តរតនគីរី ៖ តាមប្រភពព័ត៌មានបានឱ្យដឹងថា តែមួយថ្ងៃកើតឡើង៣ករណីផ្សេងៗគ្នា ក្នុងនោះរួមមាន ៖ ករណីទី១-ក្មេងស្រីម្នាក់បានលង់ទឹកអូរស្លាប់ ហេតុការណ៍នេះបានកើតឡើងកាលពីវេលាម៉ោង១រសៀលថ្ងៃទី២១ ខែកក្កដា ឆ្មាំ២០១៨ ចំណុចកើតហេតុអូរចាហាម ស្ថិតក្នុងភូមិអូរកាន ឃុំជយ័ឧត្ដម ស្រុកលំផាត់ ។
តាមប្រភពពីសមត្ថកិច្ចស្រុកលំផាត់បានអោយដឹងថា ក្មេងស្រីដែលស្លាប់ឈ្មោះសេង ស្រីណេ អាយុ៩ឆ្នាំជាសិស្សថ្នាក់ទី២ ។
បើតាមការរៀបរាប់ពីឱពុកម្ដាយក្មេងស្រីរងគ្រោះបានអោយដឹងថា នៅមុនពេលកើតហេតុ ពួកគេមានគ្នា៣នាក់សុទ្ធតែក្មេងស្រីៗដែលមានអាយុ៩ឆ្នាំ អាយុ១០ឆ្នាំ និងអាយុ១១ឆ្នាំ ជាកូនអ្នកភូមិជាមួយគ្នាឃើញមានកាន់ដងសន្ទូចម្នាក់មួយបបួលគ្នាទៅស្ទូចត្រីនៅអូរខាងក្រោយផ្ទះចំងាយ២០០ម៉ែត្រ ទៅបាត់ជិត២ម៉ោងទើបមានក្មេងស្រី២នាក់ដែលទៅជាមួយគ្នាបានរត់មកប្រាប់ពួកគាត់ជាឪពុកម្ដាយក្មេងស្រីរងគ្រោះថា កូនស្រីរបស់គាត់បានលង់ទឹកអូរបាត់ទៅហើយ ដោយរអិលជើងធ្លាក់ទឹកដែលមានជំរៅ៣ទៅ៤ម៉ែត្រ ក្រោយពីឪពុកម្តាយទទួលដំណឹងអកុសលបែបនេះ រួមទាំងអ្នកជិតខាងបាននាំគ្នាទៅដល់កន្លែងកើតហេតុចុះរាវរកសពអស់រយៈពេលជាង២ម៉ោង ទើបរកសពឃើញ។
ក្រោយពីកើតហេតុ សមត្ថកិច្ចស្រុកបានចុះទៅដល់កន្លែងកើតហេតុដើម្បីធ្វើការត្រួតពិនិត្យសព លទ្ធផលរកឃើញថាក្មេងស្រីរងគ្រោះពិតជាស្លាប់ដោយសារលង់ទឹកពិតប្រាកដមែន មិនមានជាករណីឃាតកម្មអ្វីនោះទេ ។
ករណីទី២-ភ្លើងឆេះផ្ទះមួយខ្នងម៉ត់ ហេតុការណ៍នេះបានកើតឡើងកាលពីវេលាម៉ោង៧និង៤០នាទីព្រឹកថ្ងៃទី២១ ខែកក្កដា ឆ្នាំ២០១៨ ស្ថិតនៅភូមិថ្មីឃុំសេដា ស្រុកលំផាត់ បើតាមរបាយការណ៍របស់ប៉ូលិសស្រុកបានឱ្យដឹងថា ម្ចាស់ផ្ទះឈ្មោះអែល ជីប ភេទប្រុស អាយុ៤៩ឆ្នាំ ជាខ្មែអ៊ិស្លាម ។
បើតាមការរៀបរាប់របស់ម្ចាស់ផ្ទះកើតហេតុបានប្រាប់សមត្ថកិច្ចឱ្យដឹងថា នៅមុនពេលកើតហេតុ គាត់បានយកប៊ីដុងសាំងចំណុះ១០លីត្រ បូមសាំងដាក់ម៉ាស៊ីនកាត់ស្មៅហើយនៅក្បែរភ្លើងចង្ក្រានចំងាយកន្លះម៉ែត្រ បណ្ដាលអោយឆាបឆេះម៉ាស៊ីនកាត់ស្មៅនិងរាលដាលឆេះផ្ទះយ៉ាងសន្ធោសន្ធៅ ហើយការឆេះនេះមានរយៈពេលជិតមួយម៉ោងគឺភ្លើងបានឆេះម៉ត់ផ្ទះដែលមានទំហំទទឹង៤ម៉ែត្រគុណនឹង៦ម៉ែត្រ ប្រក់សង្ក័សី ជញ្ជាំងបាំងក្ដា ហើយបណ្តាលឱ្យខូចខាតរួមមាន លុយខ្មែអស់ចំនួន៤០០០០០រៀល ម៉ូតូសង់កូរ៉េមួយគ្រឿង ពូជសណ្ដែក១១ការុង រួមទាំងខោអាវចានឆ្នាំងត្រូវបានភ្លើងឆេះម៉ត់ ។
ករណីទី៣-ប្រពន្ធក៏ស្រវឹង ប្ដីក៏ស្រវឹង កើតជាជំលោះប្រពន្ធយកពូថៅកាប់ប្ដី១ពូថៅចំក្បាលរងរបួសធ្ងន់ហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២១ ខែកក្កដា ឆ្នាំ២០១៨ ស្ថិតនៅភូមិស្រែអង្គ្រង ឃុំស្រែអង្គ្រង ស្រុកកូនមុំ ។
២នាក់ប្តីប្រពន្ធនោះប្ដីឈ្មោះសើង សិន អាយុ៥៤ឆ្នាំ និងប្រពន្ធឈ្មោះរស់ ហ៊ុន អាយុ៤៦ឆ្នាំ មុខរបកសិករ ។
បើតាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ ២នាក់ប្ដីប្រពន្ធ និងអ្នកភូមិម្នាក់ទៀតបាននាំគ្នាទិញស្រាបៀ១កេសមកផឹកនៅផ្ទះរបស់ខ្លួន ពេលផឹកអស់ បុរសជាប្ដីផឹកមិនទាន់ឆ្អែតក៏សុំលុយប្រពន្ធទិញថែម១កេសទៀត តែត្រូវស្ត្រីជាប្រពន្ធមិនអនុញ្ញាតអោយទិញថែមទៀតទេ ក៏កើតជាជំលោះជេរម្រ៉ាយគ្នាទៅវិញទៅមកផ្អើលពេញភូមិ ក្រោយមកទៀត គេបានឃើញ២នាក់ប្ដីប្រពន្ធប្រតាយប្រតប់គ្នាស្រាប់តែប្រពន្ធទាញបានពូថៅកាប់ក្បាលប្ដី បណ្ដាលអោយរងរបួសយ៉ាងធ្ងន់ធ្ងរ ហើយត្រូវបងប្អូនសាច់ញាតិបញ្ជូនប្ដីទៅព្យាបាលនៅមណ្ឌលសុខភាពស្រុកកូនមុំ ចំណែកស្ត្រីជាប្រពន្ធត្រូវបានកំលាំងនគបាលឃុំស្រែអង្គ្រងសហការជាមួយកំលាំងនគបាលស្រុកកូនមុំឃាត់ខ្លូន។ បច្ចុប្បន្នស្ត្រីជាប្រពន្ធដែលជាជនសង្ស័យកំពុងឃុំខ្លួនបណ្ដោះអាសន្ននៅអធិការស្រុកកូនមុំ ដើម្បីកសាងសំណុំរឿងបញ្ជូនអោយតុលាការខេត្តចាត់ការតាមផ្លូវច្បាប់៕
ចែករំលែកព័តមាននេះ