ទីក្រុងហូជីមិញ ៖ ការផ្គត់ផ្គង់វីឡា និងផ្ទះផ្ទាល់ដីនៅទីក្រុងហូជីមិញ បានអន់ថយក្នុងរយៈពេលប៉ុន្មានខែថ្មីៗនេះ ហើយជាលទ្ធផលតម្លៃបានកើនឡើងជាបន្តបន្ទាប់ ។ លោកស្រី Dang Phuong Hang នាយិកាគ្រប់គ្រង CBRE Vietnam បានប្រាប់សារព័ត៌មានក្នុងស្រុកថា ការផ្គត់ផ្គង់មានកម្រិត ព្រោះតែកង្វះខាតដីសម្រាប់សាងសង់ ។
នៅត្រីមាសទី១ ឆ្នាំ២០១៨នេះ ប្រទេសវៀតណាមមានគម្រោងតែ៤ប៉ុណ្ណោះនៅលើទីផ្សារអចលនទ្រព្យ ក្នុងនោះមានផ្ទះ និងវីឡា ចំនួន៦៣៥យូនីត ។ លោកស្រី Dang Phuong Hang គិតថា ៖« ការជ្រើសរើសរស់នៅក្នុងផ្ទះទាំងនេះ ក៏បានជំរុញដល់តម្រូវការផងដែរ » ។
យោងតាមរបាយការណ៍មួយចេញផ្សាយដោយក្រុមហ៊ុន JLL Vietnam បានឲ្យដឹងថា នៅត្រីមាសទី២ឆ្នាំ២០១៨នេះ ការផ្គត់ផ្គង់វីឡា និងផ្ទះផ្ទាល់ដី សរុបស្មើ១.៥៥០យូនីត ក្នុងនោះផ្ទះផ្ទាល់ដីស្មើនឹង៧៣%នៃចំនួនសរុប ។ ២ភាគ៣នៃផ្ទះផ្ទាល់ដីទាំងនេះ គឺមានតម្លៃចាប់ពី៣៥ម៉ឺន ទៅ៥៥ម៉ឺនដុល្លារអាមេរិក ។
JLL បានឲ្យដឹងទៀតថា ផ្ទះប្រមាណ១.៤៨៣យូនីតត្រូវបានលក់ចេញ ហើយផ្ទះប្រមាណ១.៩០០យូនីតទៀតនឹងដាក់លក់នៅឆមាសទី២ ឆ្នាំ២០១៨នេះ ។
ពួកគេបន្ថែមថា កង្វះខាតវីឡា និងផ្ទះផ្ទាល់ដីនៅក្នុងទីផ្សារធំ និងទីផ្សារបន្ទាប់បន្សំ គឺដោយសារតែកង្វះខាតដីសម្រាប់សាងសង់ក្នុងទីតាំងល្អ ។
លោក Tran Duc Vinh នាយកទូទៅនៃក្រុមហ៊ុន Tran Anh Group បាននិយាយថា កាលពីឆ្នាំមុន ក្រុមហ៊ុនរបស់លោកបានសាងសង់វីឡាចំនួន៤០០ និងផ្ទះជាច្រើនខ្នងទៀត ដើម្បីលក់ចេញឲ្យទាន់ពេលវេលា ។
លោកបន្តថា ៖« ទីផ្សារអចលនទ្រព្យបានល្អប្រសើរឡើងតាំងពីឆ្នាំ២០១៥មកម្ល៉េះ ហើយប្រាក់ចំណូលពលរដ្ឋវៀតណាមក៏បានកើនឡើងផងដែរ ដែលធ្វើឲ្យតម្រូវការវីឡា និងផ្ទះផ្ទាល់ដីកើនឡើង » ៕
ចែករំលែកព័តមាននេះ