រាជធានីភ្នំពេញ ៖ ម៉ូតូចំនួន៣គ្រឿងត្រូវបានក្រុមចោរវាយប្លន់យកទៅបាត់ ដោយសុវត្តិភាព ក្នុងសកម្មភាពចំនួន៣ករណីផ្ទួនៗផ្សេងគ្នា ក្នុងភូមិសាស្ត្រខណ្ឌដង្កោមួយលើក ក្នុងភូមិសាស្ត្រខណ្ឌពោធិសែនជ័យ២លើក ។ ករណីទី១ ចោរមួយក្រុមមានគ្នាប្រមាណ៨ទៅ៩នាក់…
រាជធានីភ្នំពេញ ៖ ម៉ូតូចំនួន៣គ្រឿងត្រូវបានក្រុមចោរវាយប្លន់យកទៅបាត់ ដោយសុវត្តិភាព ក្នុងសកម្មភាពចំនួន៣ករណីផ្ទួនៗផ្សេងគ្នា ក្នុងភូមិសាស្ត្រខណ្ឌដង្កោមួយលើក ក្នុងភូមិសាស្ត្រខណ្ឌពោធិសែនជ័យ២លើក ។
ករណីទី១ ចោរមួយក្រុមមានគ្នាប្រមាណ៨ទៅ៩នាក់ ជិះម៉ូតូចំនួន៦គ្រឿង ដេញស្ទាក់ព័ទ្ធវាយប្លន់យកម៉ូតូម៉ាកនិចពីយុវជនម្នាក់ ខណៈដែលកំពុងជិះម៉ូតូឌុបប្អូនស្រីវិលត្រឡប់ទៅផ្ទះជួល បានសម្រេច ហើយគេចខ្លួនបាត់អស់ដោយសុវត្តិភាព ជនរងគ្រោះរបួសបែកក្បាលហូរឈាមកក្លាក់ កាលពីវេលាម៉ោង១១និង៣០នាទីយប់ថ្ងៃទី២១ ខែកក្កដា ឆ្នាំ២០១៨ ស្ថិតនៅតាមផ្លូវ៣០ម៉ែត្រ ក្បែរវត្តអង្គមេត្រី ភូមិព្រៃសលិច សង្កាត់ព្រៃស ខណ្ឌដង្កោ ។
ជនរងគ្រោះឈ្មោះ យួន សីហា ភេទប្រុស អាយុ១៨ឆ្នាំ មុខរបរកម្មកររោងចក្រ ស្នាក់នៅភូមិទួលពង្រ សង្កាត់ចោមចៅ១ ខណ្ឌពោធិសែនជ័យ មានស្រុកកំណើតភូមិត្រពាំងផ្លុង ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។ ចំណែកម៉ូតូដែលក្រុមចោរប្លន់យកទៅបាត់ម៉ាកនិច ពណ៌ប្រផេះខ្មៅ ពាក់ស្លាកលេខភ្នំពេញ 1GW-8743 ។
តាមសម្តីជនរងគ្រោះបានឲ្យដឹងថា មុនកើតហេតុខ្លួនបានឌុបប្អូនស្រី២នាក់ចេញពីផ្ទះបងថ្លៃ ភូមិអង្គត្រគៀត សង្កាត់កន្ទោក ខណ្ឌពោធិសែនជ័យ គោលបំណងត្រឡប់ទៅផ្ទះជួលនៅភូមិទួលពង្រ សង្កាត់ចោមចៅ១ ដោយធ្វើដំណើរតាមផ្លូវ៣០ម៉ែត្រ ពីលិចទៅកើត លុះដល់ចំណុចកើតហេតុ ស្រាប់តែឃើញភ្លើងម៉ូតូប្រសាចពេញផ្លូវ តាមពីក្រោយមកដល់ទន្ទឹម សរុបចំនួន៦គ្រឿង មនុស្ស៨ទៅ៩នាក់ ស្ទាក់ព័ទ្ធម៉ូតូខ្លួនស្រែកគម្រាមឲ្យឈប់ ហើយត្រូវបានក្រុមជនសង្ស័យទាំងនោះ វាយប្លន់យកម៉ូតូជិះគេចទៅបាត់ ។
ក្រោយកើតហេតុជនរងគ្រោះជនរងគ្រោះបានវិលត្រឡប់ក្រោយទៅភូមិអង្គត្រគៀតវិញ ប្រាប់សាច់ញាតិទើបផ្អើលដល់សមត្ថកិច្ចទៅសួរនាំទើបដឹងរឿងកើតឡើងនៅខាងទឹកដីសង្កាត់ព្រៃស សមត្ថកិច្ចប្រាប់ឲ្យទៅប្តឹងនៅប៉ុស្តិ៍ព្រៃសវិញ ។
ករណីទី២ – កើតឡើងនៅវេលាម៉ោង១និង៤៥នាទី ឈានចូលថ្ងៃទី២២ ខែកក្កដា ឆ្នាំ២០១៨ ក្រុមចោរប្លន់មួយក្រុមគ្នា៦នាក់ ជិះម៉ូតូ២គ្រឿង ធ្វើសកម្មភាពវាយប្លន់យកម៉ូតូម៉ាកនិច ពណ៌ស ពាក់ស្លាកលេខ 0428 មិនចាំអក្សរខាងដើម ចេញពីភូមិសាស្ត្រ សង្កាត់បឹងធំ ខណ្ឌពោធិសែនជ័យ ប្លន់បានសម្រេច ហើយក្រុមចោរប្លន់ទាំងនោះជិះឡើងមកតាមបណ្តោយផ្លូវជាតិលេខ៣ ពីត្បូងទៅជើង ឆ្លងកាត់ផ្លូវសហព័ន្ធរុស្សី ទោះជាកម្លាំងប៉ុស្តិ៍ពងទឹក ខណ្ឌដង្កោ ប្រទះឃើញហើយប្រដេញតាមស្រែកប្រកាសតាមប្រព័ន្ធវិទ្យុទាក់ទង ឲ្យកម្លាំងប៉ូលិសខណ្ឌពោធិសែនជ័យជួយស្ទាក់ តែពុំបានលទ្ធផល ត្រូវចោរប្លន់យកម៉ូតូទៅបាត់ ។
ករណីទី៣ – នៅវេលាម៉ោង៣និង៣០នាទី ក្រុមចោរប្លន់៣នាក់ ថ្មើរជើងបានធ្វើសកម្មភាពវាយប្លន់យកម៉ូតូម៉ាក MSX មួយគ្រឿងទៀត ខណៈដែលជនរងគ្រោះ ឌុបនារីជាសង្សារត្រឡប់ទៅផ្ទះជួលខាងក្រោយសួនកុមារពោធិចិនតុង ដោយសុវត្ថិភាព ជាលើកទី៣ ។
តាមសម្តីជនរងគ្រោះ ក្នុងករណីប្លន់លើកទី២ ក្នុងខណ្ឌពោធិសែនជ័យនេះបានឲ្យដឹងថា មុនកើតហេតុខ្លួនបានឌុបសង្សារវិលមកពីកម្សាន្តប្រគុំតន្ត្រី នៅផ្លូវជាតិលេខ៣ ភូមិក្រាំងដូនទៃ សង្កាត់ចោមចៅ២ ឌុបនាងមកផ្ទះជួលខាងក្រោយជាប់សួនកុមារពោធិតុង ភូមិតាងួន សង្កាត់កាកាប១ ខណ្ឌពោធិសែនជ័យ មកដល់ហើយនាងជាសង្សារបានដើរចូលផ្ទះ រីឯខ្លួនអង្គុយលើម៉ូតូ ក្នុងបំណងសុំសង្សារដេកស្នាក់នៅមួយយប់ដែរ តែទីបំផុតត្រូវបានក្រុមចោរប្លន់គ្នា៣នាក់ដើរថ្មើរជើងចេញពីក្នុងសួនមកកេះស្មាទាមទារយកទូរស័ព្ទ និងកាបូបលុយប្រាប់ថា អត់មានជនសង្ស័យប្រាប់ថា អីញ្ចឹងសូមប្លន់យកម៉ូតូ ថា ហើយក្រុមជនសង្ស័យវាយប្រ៉ាវ ជនរងគ្រោះបោះសោម៉ូតូចោល ហើយត្រូវបាន ក្រុមជនសង្ស័យ អូសម៉ូតូ បណ្តើរយកចេញទៅបាត់ តាមផ្លូវ២០១១ ឆ្ពោះទៅទិសខាងជើង ឆ្លងចូលក្នុងភូមិសាស្ត្រ ខណ្ឌសែនសុខបាត់ស្រមោល ។
ករណីប្លន់ទាំង៣ករណីក្នុងខណ្ឌដង្កោ មួយករណី ក្នុងខណ្ឌពោធិសែនជ័យពីរករណី ជនរងគ្រោះបានត្រឹមតែដើរស្វែងរកប្តឹងប៉ូលិសតែប៉ុណ្ណោះ ។
តាមប្រជាពលរដ្ឋបានលើកឡើងថា ប៉ូលិសឥឡូវហត់នឿយច្រើនពេលថ្ងៃស្រែកតាមវិទ្យុទាក់ទងដូចសម្បើមណាស់ ពួនស្ទាក់ ស្ទាក់ពួនកេកកាក ដូចក្ងាន ស្រែកអស់កម្លាំង យប់ឡើងគាត់ត្រូវការសម្រាកដូចពលរដ្ឋដែរ ល្វើយខ្លាំងពេក ទៅ ដេកលង់លក់បាត់ ភ្លេចរឿងចេញល្បាតក្នុងភូមិសាស្ត្ររបស់ខ្លួន ទើបក្រុមចោរបានឱកាសដើរធ្វើសកម្មភាពវាយប្លន់យកទ្រព្យសម្បត្តិពលរដ្ឋបានដោយងាយៗ ៕
ចែករំលែកព័តមាននេះ