ខេត្តកំពត ៖ ឈើប្រណីតខុសច្បាប់ចំនួន៣ទូ កុងតឺន័រដែលមាន៥៣ដុំធំៗបម្រុងឆ្លងដែនទៅប្រទេសវៀតណាម បានត្រូវកម្លាំងការិយាល័យនាវាចរណ៍គយ សហការជាមួយសកម្លាំងអាវុធហត្ថលើផ្ទៃប្រទេសបង្ក្រាបបាន នៅចម្ងាយប្រមាណ៣គីឡូម៉ែត្រពីផែព្រែកត្នោត ព្រំប្រទល់រវាងខេត្តកំពតនិងខេត្តព្រះសីហនុ កាលពីវេលាម៉ោង១០យប់ថ្ងៃទី១៧ ខែកក្កដា កន្លងមក ។
ប្រភពព័ត៌មានពីមន្ត្រីគយដែលបង្ក្រាបករណីរត់ពន្ធឈើនេះបានឲ្យដឹងថា ដោយមានការបញ្ជាផ្ទាល់ពីលោក កើត សុទ្ធារ៉ា ប្រធាននាយកដ្ឋានបង្ការនិងបង្ក្រាបបទល្មើសនៃអគ្គនាយកដ្ឋានគយ និងរដ្ឋាករលោក ឯម ណារិទ្ធ ប្រធានការិយាល័យនាវាចរណ៍គយ បានដឹកនាំកម្លាំងសហការជាមួយកងរាជអាវុធហត្ថលើផ្ទៃប្រទេស ចុះទៅចំណុចភូមិសាស្ត្រខាងលើ ក៏ប្រទះឃើញទូកយន្តមួយគ្រឿងលិចនៅក្នុងទឹកដែលមានជម្រៅប្រហែល៣ម៉ែត្រ ។ ពេលសមត្ថកិច្ចចុះឆែកឆេរពុំឃើញមានមនុស្សណាម្នាក់ឡើយ គឺឃើញតែទូកុងតឺទ័រចំនួន៣នៅក្នុងទូកនោះ ទើបក្រុមជំនាញលើកទូកុងទ័នរនោះមកបើកមើលឃើញមានសុទ្ធតែឈើប្រណីត ។
លោក ជួន សារ៉ា នាយខណ្ឌរដ្ឋបាលព្រៃឈើកំពតបានឲ្យដឹងថា ការចុះបង្ក្រាបឈើខុសច្បាប់ដោយសមត្ថកិច្ចគយចល័តនៅសមុទ្រក្នុងឃុំព្រែកត្នោត ស្រុកទឹកឈូ កាលពីយប់ថ្ងៃទី១៧ ខែកក្កដា លោកពុំបានដឹងទេ គឺក្រោយពីមានព័ត៌មានទើបលោកស្រាវជ្រាវដឹងថាមានករណីបង្ក្រាបឈើខុសច្បាប់ ។ ឈើខុសច្បាប់ដឹកតាមទូកចំនួន៣កុងតឺន័រនេះ មិនមែនចុះនៅតាមផែម្តុំនេះទេ គឺអាចមកពីកន្លែងផ្សេងហើយរត់ឆ្លងកាត់តាមសមុទ្រខាងក្រៅ ។ ប៉ុន្តែចៃដន្យ ផ្ទៃមេឃមានព្យុះនិងភ្លៀងខ្លាំងនៅកណ្តាលសមុទ្រ អាចធ្វើឲ្យអ្នកបើកបររកផ្លូវចេញទៅក្រៅមិនរួចក៏មករកក្បែរខាងស ហើយត្រូវលិចទូក ។
ប្រភពមួយទៀតឲ្យដឹងថា សមត្ថកិច្ចគយចល័តអាចក្តាប់ព័ត៌មានបានទើបចេញល្បាតតាមចំណុចនោះ លុះមកដល់ចំណុចខាងលើក៏ប្រទះឃើញទូកម៉ាស៊ីនមួយគ្រឿងលិចនៅចម្ងាយប្រមាណ៣គីឡូម៉ែត្រពីផែព្រែកត្នោត ស្ថិតក្នុងឃុំព្រែកត្នោត ស្រុកទឹកឈូ ក្នុងនោះឃើញមានទូកុងតឺន័រចំនួន ។ ពេលនោះ កម្លាំងគយចល័ត សហការជាមួយកងរាជអាវុធហត្ថលើផ្ទៃប្រទេស បានឆែកក្នុងកុងតឺន័រឃើញមានសុទ្ធតែឈើប្រណីតសរុបមានចំនួន៥៣ដុំធំៗ ក៏បានស្រង់ឡើងដឹកយកមកដាក់នៅទីស្នាក់ការគយចល័តនាវា ។
បច្ចុប្បន្ន ទូកុងតឺន័រផ្ទុកឈើទាំងនោះ ត្រូវបានសមត្ថកិច្ចស្ទូចយកមករក្សាទុកនៅកន្លែងឈរជើងបណ្តោះអាសន្នរបស់ការិយាល័យនាវាចរណ៍គយ និងធ្វើកំណត់ហេតុបញ្ជូនទៅអគ្គនាយកដ្ឋានគយនិងរដ្ឋាករកម្ពុជា ដើម្បីរង់ចាំការសម្រេចពីលោកអគ្គនាយក ។ ជុំវិញករណីនេះ មហាជនរង់ចាំមើលថា តើសមត្ថកិច្ចជំនាញអាចរកឃើញឈ្មួញម្ចាស់ឈើនោះដែរឬទេ ?
លោក ជួន សារ៉ា ឲ្យដឹងទៀតថា ពាក់ព័ន្ធនឹងម្ចាស់ឈើទាំង៣កុងតឺន័រដែលបម្រុងលោតឆត្រទៅលក់នៅប្រទេសវៀតណាម ហើយត្រូវសមត្ថកិច្ចគយចល័តបង្ក្រាបបាននេះ មិនទាន់មានប្រភពព័ត៌មានណាមួយបង្ហាញឲ្យស្គាល់អត្តសញ្ញាណម្ចាស់នៅឡើយទេ ។ នៅពេលនេះ លោកកំពុងធ្វើទំនាក់ទំនងទៅស្ថាប័ន
តុលាការនិងសមត្ថកិច្ចដែលចុះបង្ក្រាបឈើខុសច្បាប់ខាងលើ ដើម្បីដោះស្រាយតាមនីតិវិធីរបស់តុលា
ការ ។
ទោះបីជារកម្ចាស់ឈើមិនទាន់ឃើញ ក៏អត្តសញ្ញាណទូកនិងកុងតឺន័រជាពន្លឺក្នុងការស្រាវជ្រាវដែរ ។ មតិមហាជននិយាយថា បើគ្រាន់តែចាប់បានឈើលាក់ក្នុងកុងតឺន័រហើយរកមុខម្ចាស់មិនឃើញនោះ គឺជារឿងសោកស្ដាយ ព្រោះថាមិនដឹងគេលោតឆត្របែបនេះបានប៉ុន្មានដងមកហើយនោះទេ ៕
ចែករំលែកព័តមាននេះ