ខេត្តកំពង់ចាម ៖ សំឡេងផ្ទុះដ៏កក្រើក បានបង្កឱ្យមានការភ្ញាក់ផ្អើលដល់កម្មការិនីបម្រើការងារនៅរោង ចក្រកាលីបតុន ស្ថិតក្នុងភូមិខ្នុរដំបង ឃុំខ្នុរដំបង ស្រុកជើងព្រៃ នាំគ្នារត់ចេញពីអគារដែលកំពុងបម្រើការ ងារ ដោយតក់ស្លុតយ៉ាងខ្លាំង ។ ហេតុការណ៍នេះ កើតឡើងកាលពីវេលាម៉ោង១២ និង៥០នាទីថ្ងៃត្រង់ថ្ងៃទី២០ ខែក្កដា ដោយកម្មការិនីបានដួលសន្លប់ ជាបន្តបន្ទាប់រហូតដល់២១១នាក់ និងត្រូវបានរថយន្តដឹកទៅសង្គ្រោះនៅមន្ទីរពេទ្យបង្អែកស្រុកបាធាយ និងស្រុកជើងព្រៃ ក្នុងនោះមានកម្មការិនីមានផ្ទៃពោះចំនួន១១នាក់ផងដែរ ។
លោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្តទទួលផែនព្រហ្មទណ្ឌបានឱ្យដឹងថា ក្រោយពីមានហេតុការណ៍ខាងលើនេះ លោកឧត្តមសេនីយ៍ទោ ឯម កុសល ស្នងការនគរបាលខេត្ត បានចាត់ឱ្យរូបលោកដឹកនាំកងកម្លាំងចុះទៅកាន់រោងចក្រនោះជាបន្ទាន់ ដោយមានរថយន្តសម្រាប់សង្គ្រោះដឹកកម្មការិនីមកកាន់មន្ទីរពេទ្យផង ។ ក្នុងជំហានដំបូង សំឡេងដែលផ្ទុះខ្លាំងនោះ មិនទាន់ដឹងថាបណ្តាលមកពីអ្វីពិត ប្រាកដនៅឡើយទេ ។
លោកស្នងការរងបន្តថា រថយន្តជាច្រើនគ្រឿងបានដឹកអ្នករងគ្រោះ ដោយដឹកទៅមន្ទីរពេទ្យបង្អែកស្រុកបាធាយចំនួន១៣១នាក់ ក្នុងនោះអ្នកមានផ្ទៃពោះ៦នាក់ និងទៅមន្ទីរពេទ្យបង្អែកស្រុកជើងព្រៃចំនួន៨០នាក់ ក្នុងនោះអ្នកមានផ្ទៃពោះ៥នាក់ ។ បន្ទាប់មក សមត្ថកិច្ចបានចុះទៅពិនិត្យដល់ក្នុងអគារA ដែលជាកន្លែងទុស្សេចរន្តអគ្គិសនី បង្កឱ្យមានឮសូរសំឡេងផ្ទុះបង្កឱ្យមានការភ្ញាក់ផ្អើល ដល់កម្មការិនីនាំគ្នារត់ចេញមកក្រៅប្រសាច និងបណ្តាលឱ្យដួលសន្លប់ជាបន្តបន្ទាប់នេះ ។
កម្មការិនីដែលសន្លប់ជាង២០០នាក់ ត្រូវបានផ្អាកការងារទាំងអស់ រង់ចាំឱ្យមានកម្លាំងនឹងវិលត្រឡប់ទៅធ្វើការងារធម្មតាវិញ ។ ជាមួយនេះ សមត្ថកិច្ចបានរកឃើញដុំប្រអប់អេឡិចត្រូនិកមួយដែលផ្ទុះបង្កឱ្យមានការភ្ញាក់ផ្អើល តែត្រូវបានជាងអគ្គិសនីជួសជុលឡើងវិញហើយដែរ ៕
ចែករំលែកព័តមាននេះ