ខេត្តស្វាយរៀង ៖ បុរសម្នាក់បានលួចស្រឡាញ់នាងក្រមុំនៅជិតខាងគ្នាជាយូរឆ្នាំមកហើយ តែគ្មានលុយចូលស្តីដណ្តឹងនាងមកធ្វើជាប្រពន្ធ បែរជាបែកគំនិតឡើងទៅលើផ្ទះប៉ុនប៉ងចាប់រំលោភ ក៏ត្រូវនារីរងគ្រោះដឹងខ្លួនទាន់ស្រែកឆោឡោផ្អើលដល់ម្តាយប្តឹងឲ្យសមត្ថកិច្ចចាប់ខ្លួន ហេតុការណ៍នេះ កើតឡើងកាលពីម៉ោងជាង៨យប់ ថ្ងៃទី១៩ ខែកក្កដា ឆ្នាំ២០១៨ ស្ថិតនៅភូមិអង្គតាមោក ឃុំប្រសូតិ ស្រុកស្វាយទាប ។
បើតាមសមត្ថកិច្ចបានឲ្យដឹងថា ជនសង្ស័យឈ្មោះ ទិត្យ ថែ អាយុ៣៥ឆ្នាំ គ្មានមុខរបរ រស់នៅក្នុងភូមិ-ឃុំកើតហេតុ ចំណែកនារីរងគ្រោះអាយុ២០ឆ្នាំ។ សមត្ថកិច្ចបន្តទៀតថា មុនកើតហេតុ ជនសង្ស័យបានលបឡើងទៅលើផ្ទះរបស់នារីរងគ្រោះ ក្នុងបំណងចាប់រំលោភ។
បើតាមនារីរងគ្រោះឱ្យដឹងថា នៅវម៉ោងជាង៨យប់ពេលនាងកំពុងតែគេងលក់ ព្រោះទើបមកធ្វើការរោងចក្រអស់កម្លាំងផង ស្រាប់តែឮសូរសម្លេងមនុស្សទាញបើកមុងរបស់នាង ព្រមទាំងមានធំក្លិនបារីផង ទើបស្ទុះក្រោកឡើង ហើយស្រែកឆោឡោហៅម្តាយដែលសម្រាកនៅក្រោមផ្ទះឲ្យជួយ។ ក្រោយមានការស្រែកឆោឡោ ជនសង្ស័យភ័យក៏រត់ចុះពីលើផ្ទះជនរងគ្រោះយ៉ាងប្រញាប់ និងលោតផ្លោះរបងទៅពួនដេកនៅផ្ទះរបស់ខ្លួនធ្វើប្រងើយ ចំណែកនារីរងគ្រោះស្គាល់ជនសង្ស័យក៏ប្តឹងសមត្ថកិច្ចតែម្តង ។
ក្រោយពីទទួលបណ្តឹងពីនារីរងគ្រោះសមត្ថកិច្ចនគរបាលនៃអធិការដ្ឋាននគរបាលស្រុកស្វាយទាបសហការជាមួយកម្លាំងនគរបាលប៉ុស្ដិ៍មូលដ្ឋានចុះទៅឃាត់ខ្លួនជនសង្ស័យមកសួរនាំ រួចបញ្ជូនមកការិយាល័យនគរបាលព្រហ្មទណ្ឌកម្រិតស្រាលនៅវេលារសៀលថ្ងៃទី២០ កក្កដានេះ។
នៅចំពោះមុខសមត្ថកិច្ចជនស្ស័យឆ្លើយសារភាពថា ខ្លួនពិតជាបានប៉ុនប៉ងរំលោភទៅលើនារីរងគ្រោះនោះពិតមែន ដោយសារខ្លួនលួចស្រឡាញ់នាងតាំងពីយូរណាស់មកហើយ តែគ្មានប្រាក់ដើម្បីចូលស្តីដណ្តឹង។ បច្ចុប្បន្នជនសង្ស័យ ត្រូវបានការិយាល័យជំនាញកំពុងចាត់ការបន្តតាមនីតិវិធីច្បាប់៕
ចែករំលែកព័តមាននេះ