ម៉ិចស៊ីកូ ៖តាមប្រភពព័ត៌មាន Oddity Central បានឲ្យដឹងថា ប៉ូលិសទាំងអស់នៅក្រុង Alvarado របស់ម៉ិចស៊ីកូ ត្រូវបានមេដកហូតកាំភ្លើងជំនួសវិញដោយជំពាមកៅស៊ូ ក្រោយប៉ូលិសភាគច្រើនប្រឡងធ្លាក់តេស្តប្រើកាំភ្លើង។
ក្រោយមានប៉ូលិសត្រឹមតែ៣០នាក់ជាប់តេស្តប្រើកាំភ្លើង (ក្នុងចំណោម១៣០នាក់) លោក Miguel Angel Yunes Linares ថ្នាក់ដឹកនាំនៃរដ្ឋ Verracruz សម្រេចចិត្តដកហូតកាំភ្លើងសៀតចង្កេះ។ ការដកហូតមិនឲ្យប្រើកាំភ្លើង គឺមិនមែនទើបតែធ្វើឡើងនៅ Alvarado នោះទេ។ គេធ្លាប់ឃើញមាននៅក្រុងផ្សេងៗទៀតរបស់ម៉ិចស៊ីកូ រួមមាន ៖ Lxtaczoquitlan, Ciudad Mendoza និង Pueblo Viejo។
ចៅហ្វាយក្រុង Alvarado លោក Bogar Ruiz Rosas បានប្រឆាំងនឹងការដកហូតនេះ ហើយក៏ឲ្យប៉ូលិសក្នុងតំបន់ខ្លួនប្រើប្រាស់ជំពាមកៅស៊ូជាបណ្តោះអាសន្ន។ លោកថា មូលហេតុដែលប៉ូលិសភាគច្រើនមិនជាប់ការប្រឡង គឺដោយសារតែពួកគេជាបុគ្គលិកថ្មី ហើយការដកមិនឲ្យប្រើកាំភ្លើងនេះ គឺបំពានដល់ភាពស្វយ័តនៅតំបន់របស់លោកហើយ។
ដោយសារតែរូបភាពប៉ូលិសប្រើជំពាមកៅស៊ូ ត្រូវបានគេចែកចាយពេញបណ្តាញសង្គម ថ្នាក់ដឹកនាំរដ្ឋ Verracruz លោក Linares បានព្រមានថា ការធ្វើដូចនេះគឺប្រឆាំងនឹងថ្នាក់លើ និង អាចជាប់ទោសថែមទៀតផង៕
ចែករំលែកព័តមាននេះ