រាជធានីភ្នំពេញ ៖ ទូរស័ព្ទខេមហ្វូន ស៊េរីថ្មីម៉ូដែល Honey Y1 ត្រូវបានប្រកាសសម្ពោធលក់ជាផ្លូវការនៅលើទីផ្សារប្រទេសកម្ពុជា កាលពីល្ងាចថ្ងៃទី១៩ ខែកក្កដា ឆ្នាំ ២០១៨ នៅផ្សារទំនើបអ៊ីអនម៉លសែនសុខ ដោយមានការចូលរួមពីភ្ញៀវកិត្តិយស និងតារាចម្រៀងល្បីៗប្រចាំព្រះរាជាណាចក្រកម្ពុជាផងដែរ ។
អ្វីដែលជាកាត់សម្គាល់ ទូរស័ព្ទម៉ូដែលថ្មីនេះ គ្រាន់តែប្រកាសបើកលក់ជាផ្លូវការ មានអ្នកបញ្ជាទិញរហូតដល់៥.០០០គ្រឿងក្នុងទីផ្សារប្រទេសកម្ពុជា និង ២០ម៉ឺគ្រឿងសម្រាប់ទីផ្សារប្រទេសផ្សេងៗ ។
នៅក្នុងឱកាសបើកលក់ជាផ្លូវការនោះដែរ លោក លុន បូរីទីប្រឹក្សាជាន់ខ្ពស់នៃក្រុមហ៊ុនខេមហ្វូន បានមានប្រសាសន៍ថា លោកស្ទើរតែមិនជឿថា ទូរស័ព្ទខេមហ្វូនស៊េរីថ្មីនេះ មានអ្នកគាំទ្រច្រើនយ៉ាងនោះសោះ ។ នេះជាអ្វីដែលថ្នាក់ដឹកនាំក្រុមហ៊ុនចង់បាន និងជាការលើកទឹកចិត្តដល់ថ្នាក់ដឹកនាំនិងបុគ្គលិករបស់ក្រុមហ៊ុនក្នុងការបន្តចែកចាយទូរស័ព្ទម៉ាក ខេមហ្វូននៅលើទីផ្សារប្រទេសកម្ពុជា ។
លោកបន្តថា បើនិយាយពីទូរស័ព្ទម៉ាកខេមហ្វូន គឺជាម៉ាកទូរស័ព្ទរបស់ខ្មែរ ថ្វីត្បិតតែវាផលិតនៅក្រៅប្រទេសក៏ពិតមែន តែវាជាការរចនា និងច្នៃឡើងដោយខ្មែរ ហើយក្នុងនាមជាកូនខ្មែរក៏ចង់យកផលិតផលណាដែលមានគុណភាពមកលក់ជូនដល់ប្រជាពលរដ្ឋខ្មែរប្រើប្រាស់ រួមជាមួយនឹងតម្លៃសមរម្យដែលអាចទទួលយកបានគ្រប់ៗគ្នា ។
លោក ឃុន ហេង ប្រធានទីផ្សារក្រុមហ៊ុនខេមហ្វូន បានអោយដឹងផងដែរថា ទូរស័ព្ទខេមហ្វូនស៊េរីថ្មីម៉ូដែល Honey Y1 គឺជាស្មាតហ្វូនស៊េរីថ្មីរបស់ខ្លួន ត្រូវបានរចនាឡើងជាមួយនឹងរូបរាងស្តើងទាន់សម័យ បំពាក់ដោយកាមេរ៉ាភ្លោះ 13MP + 2 MP ដែលអាចចាប់យករូបភាពដិតច្បាស់ល្អ និងកាមេរ៉ាមុខ 8MP អមជាមួយបច្ចេកវិទ្យា AI Wide Angle កាមេរ៉ាដែលអាចថតស៊ែលហ្វី បានស្អាត និងជាក្រុមបានគ្នាច្រើន ។
លោកបន្តថា Honey Y1 ក៏ភ្ជាប់មកជាមួយនឹងអេក្រង៥,៥អ៊ីង លាតពេញគែម ពេញភ្នែក អង្គចងចាំ Ram 2GB និងMemory 16GB ព្រមទាំងកម្លាំងថាមពលថ្ម 3500mAh ផងដែរ ដែលអាចអោយអ្នកប្រើប្រាស់ទូទៅបានពេញមួយថ្ងៃ ។ លើសពីនេះ Honey Y1 ក៏ត្រូវបានបំពាក់ដោយប្រព័ន្ធបច្ចេកវិទ្យា ស៊ីមពីរ 4G Volte អាចដំណើរការអ៊ីនធើណេត Youtube , Facebook និងកម្មវិធីកម្សាន្តផ្សេងៗ ដោយរលូន ។ កាន់តែពិសេស Honey Y1 ត្រូវបានបំពាក់ដោយបច្ចេកវិទ្យា Face ID រឺដោះសោរដោយស្គែនមុខ ដែលស៊ីពេលត្រឹមតែ១វិនាទីប៉ុណ្ណោះ ក្នុងការដោះសោរ ។
គួរបញ្ជាក់ថា ទូរស័ព្ទ ខេមហ្វូន ម៉ូដែល Honey Y1 បានចេញលក់ក្នុងទីផ្សារ តម្លៃត្រឹមតែ ១១៥ ដុល្លារអាមេរិក ក្នុងមួយគ្រឿង និងមានថែមជូនកាដូជាច្រើនទៀត ដូចជា Power Bank ម៉ាក Kongfulong កាសក្តោបត្រចៀកធំ អាវយឺត ស៊ីមស្មាត សរុបជាទឹកប្រាក់ថែមជូនប្រមាណ៥០ដុល្លារអាមេរិក ។ ចំណែកទូរស័ព្ទខេមហ្វូនមួយម៉ូដែលទៀតដែលចេញលក់ដំណាលគ្នានោះម៉ូដែល L1 មានតម្លៃត្រឹមតែ ២៩ដុល្លារអាមេរិក ព្រមទាំងថែមជូនអាវភ្លៀងមួយផងដែរ ក្នុងរដូវភ្លៀងដូចនេះ ៕
ចែករំលែកព័តមាននេះ