ខេត្តបន្ទាយមានជ័យ ៖ ពិតជារឿងស្មានមិនដល់ទាល់តែសោះ ដែលទឹកភ្នែកបែរជាហូរធ្លាក់នៅក្នុងពិធីរីករាយត្រៀមទទួលជោគសិរីទៅវិញ ដោយសារតែស្ត្រីអាយុ៥១ឆ្នាំម្នាក់បានស្លាប់ ពេលបញ្ជូនទៅមន្ទីរពេទ្យក្នុងឧប្បត្តិហេតុត្រូវចរន្តអគ្គិសនីឆក់ ។ ហេតុការណ៍នេះ កើតឡើងនៅកំឡុងពីម៉ោង៥ទៅម៉ោង៦ព្រឹកថ្ងៃទី១៨ ខែកក្កដា…
ខេត្តបន្ទាយមានជ័យ ៖ ពិតជារឿងស្មានមិនដល់ទាល់តែសោះ ដែលទឹកភ្នែកបែរជាហូរធ្លាក់នៅក្នុងពិធីរីករាយត្រៀមទទួលជោគសិរីទៅវិញ ដោយសារតែស្ត្រីអាយុ៥១ឆ្នាំម្នាក់បានស្លាប់ ពេលបញ្ជូនទៅមន្ទីរពេទ្យក្នុងឧប្បត្តិហេតុត្រូវចរន្តអគ្គិសនីឆក់ ។ ហេតុការណ៍នេះ កើតឡើងនៅកំឡុងពីម៉ោង៥ទៅម៉ោង៦ព្រឹកថ្ងៃទី១៨ ខែកក្កដា នៅភូមិអូរវែង ឃុំតាបែន ស្រុកស្វាយចេក ។
ទាក់ទិននឹងឧប្បត្តិហេតុខាងលើ បើតាមលោកនាយប៉ុស្តិ៍នគរបាលរដ្ឋបាលឃុំតាបែន បានឱ្យដឹងថា ស្ត្រីរងគ្រោះឈ្មោះ គង់ ណាគ្រី មានទីលំនៅក្នុងភូមិ ឃុំ ខាងលើ ។ នាវេលាព្រឹកព្រលឹមនោះ ស្ត្រីរងគ្រោះបានក្រោកបោសសំរាមនៅក្នុងរោងពិធីសម្រាប់ទទួលភ្ញៀវ ព្រោះជាថ្ងៃដែលកូនប្រារព្ធពិធីឡើងផ្ទះ ។ ពេលកំពុងបោសសម្អាតនោះ គាត់ឃើញព្រីខ្សែភ្លើងដែលបែកត្រូវបានគេរុំស្រោបដោយថង់ និងយកស្បៃសម្រាប់ហាលស្រូវមកគ្របពីលើ ។ ជួនជាស្បៃនោះសើមដោយសារត្រូវទឹកភ្លៀង ហើយគាត់ទៅទាញដើម្បីបោសសំរាមក៏ឆក់បណ្តាលឱ្យរងរបួសធ្ងន់ និងបានស្លាបនៅតាមផ្លូវខណៈបញ្ជូនទៅមន្ទីរពេទ្យ ។
លោកនាយប៉ុស្តិ៍បញ្ជាក់ថា នេះគឺជាការធ្វេសប្រហែសរបស់អ្នកតខ្សែភ្លើង ពេលឃើញព្រីបែកហើយមិនព្រមផ្លាស់ប្តូរនៅតែយកមកប្រើទៀត ។ ឆ្លងកាត់ហេតុការណ៍គួរឱ្យស្តាយក្រោយនេះ លោកក៏បានអំពាវនាវដល់បងប្អូនប្រើប្រាស់ប្រព័ន្ធភ្លើង សូមមានការប្រុងប្រយ័ត្ន ជាពិសេសកុំស្តាយព្រីដែលបែកហើយ ត្រូវតែឈប់ប្រើប្រាស់តទៅទៀត ដើម្បីចៀសវាងគ្រោះថ្នាក់ជាយថាហេតុ ។ សពស្ត្រីរងគ្រោះ ត្រូវបានរៀបចំធ្វើបុណ្យតាមប្រពៃណីជំនួសឱ្យពិធីឡើងផ្ទះទៅវិញ ៕
ចែករំលែកព័តមាននេះ