រាជធានីភ្នំពេញ ៖ នៅក្នុងឆមាសទី១ឆ្នាំនេះ បញ្ញើជាប្រាក់ដុល្លារបានកើនឡើងដល់២០% បើធៀបនឹងគ្រាដូចគ្នាកាលពីឆ្នាំមុន មានកំណើន១៩,៦% ខណៈបញ្ញើជារៀលមានកំណើនថមថយ ឬស្មើប្រមាណតែ២១% បើធៀបនឹងរយៈពេលដូចគ្នានៅឆ្នាំ២០១៧ មានកំណើន២៤% ។ នេះយោងតាមរបាយការណ៍ប្រចាំឆមាសទី១ របស់ធនាគារជាតិនៃកម្ពុជា ។
កំណើននៃបញ្ជើជាប្រាក់ដុល្លារនេះ គឺដោយសារតែការបន្តកើនឡើងនៃប្រាក់ចំណូល និងសន្សំរបស់ប្រជាពលរដ្ឋ រួមនឹងការបន្តទទួលបានលំហូរមូលធនចូលមកក្នុងសេដ្ឋកិច្ច តាមរយៈប្រព័ន្ធធនាគារ។ ចំណែកការថមថយនៃ កំណើនបញ្ញើជាប្រាក់រៀល ដោយសារតែការថយចុះនៃអត្រាការប្រាក់បញ្ញើ ។ ទោះបីយ៉ាងនេះក្ដី របាយណ៍ការបានបញ្ជាក់ថា ការចរាចរប្រាក់រៀលមានកំណើន២២% ខ្ពស់ជាង១៨% ក្នុងរយៈពេលដូចគ្នានៅឆ្នាំមុន ។ កំណើននៃការប្រើប្រាស់ប្រាក់រៀល បានបង្ហាញពីជំនឿទុកចិត្តរបស់សាធារណជនលើប្រាក់រៀល និងតួនាទីកាន់តែសកម្មរបស់ប្រាក់រៀលក្នុងសេដ្ឋកិច្ច ដែលរួមចំណែករក្សាកម្រិតដុល្លារូបនីយកម្ម មិនឱ្យកើនឡើងក្នុងរយៈពេលកន្លងមក ។
របាយការណ៍បញ្ជាក់ថា ឥណទានចំពោះវិស័យឯកជនបានឡើងបន្តិចវិញស្មើប្រមាណ ១៦,៨% ធៀបនឹង១៦,៥%នៅខែមិថុនាឆ្នាំមុន ដែលបង្ហាញថា ចលនាសាច់ប្រាក់នៅក្នុងសេដ្ឋកិច្ចបន្តរឹងមាំ និងគាំទ្រដល់កំណើនប្រាក់បញ្ញើជារូបិយប័ណ្ណ និងរូបិយវត្ថុទូទៅ ។
ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រឹត ធ្លាប់មានប្រសាសន៍ថា ៖«គិតត្រឹម៥ខែដើមឆ្នាំ២០១៨នេះ ប្រាក់កម្ចីមានកំណើនរហូតដល់៧៤៦លានដុល្លារ ។ អីចឹងនៅឆ្នាំនេះ យើងមានរំពឹងថា អាចនឹងទទួលបានកំណើនប្រមាណ២០% និងប្រាក់សន្សំអាចកើនឡើងប្រហែលគ្នាផងដែរ » ។ លោកបន្តថា ៖« រយៈពេល៦ខែដើមឆ្នាំ នេះ សម្រាប់អម្រឹត គឺនៅតែទទួលបានកំណើន តែអាចថា កំណើនដែលរំពឹងនោះ អាចនឹងទាបជាង៦ខែឆ្នាំមុន ដោយសារឥទ្ធិពលនៃការកំណត់ពិដានអត្រាការប្រាក់ ដែលរាជរដ្ឋាភិបាលបានដាក់ឱ្យអនុវត្តកន្លងមក និងមួយផ្នែកផ្សេងទៀត ដោយសារអាជីវកម្មដែលអម្រឹតបានផ្តល់ជូនអតិថិជនសម្រាប់ទីផ្សារមួយនេះ បានទទួលឥណទានគ្រប់គ្រាន់ ស្របទៅតាមការកើនឡើងនៃកំណើនសេដ្ឋកិច្ចជាតិ » ៕
ចែករំលែកព័តមាននេះ