រាជធានីភ្នំពេញ ៖ វិស័យធនាគារ និងហិរញ្ញវត្ថុ គឺជាកម្លាំងចលករដ៏សំខាន់ក្នុងការជំរុញ និងលើកកម្ពស់ការប្រើប្រាស់រូបិយប័ណ្ណជាតិឲ្យកាន់តែទូលំទូលាយ ស្របពេលបច្ចុប្បន្ន ធនាគារជាតិនៃកម្ពុជា បានលើកទឹកចិត្ត និងដាក់បទប្បញ្ញតិនានាដល់បណ្ដាគ្រឹះស្ថានធនាគារ និងមីក្រូហិរញ្ញវត្ថុ ឲ្យមានការផ្ដល់កម្ចី និងបញ្ញើជាប្រាក់រៀល ដល់អតិថិជនរបស់ខ្លួនឲ្យកាន់តែសម្បូរបែប ។
លោក ហុង ហៀប នាយកសេវាកម្មហិរញ្ញវត្ថុពាណិជ្ជកម្មនៃធនាគារស៊ីអាយអិមប៊ី ភីអិលស៊ី បានឲ្យដឹងថា ធនាគាររបស់លោកបានគាំទ្រយ៉ាងពេញទំហឹង ក្នុងការរួមចំណែកដល់ការលើកកម្ពស់ការប្រើប្រាស់ប្រាក់រៀលនៅក្នុងគ្រឹះស្ថានធនាគារ ដោយនាំយកផលិតផលធនាគារជាប្រាក់រៀលដ៏សម្បូរបែបទាំងប្រភេទកម្ចី និងប្រាក់បញ្ញើដល់អតិថិជន ។ លោកថ្លែងថា ៖« ការទូទាត់ក្នុងប្រតិបត្តិការអាជីវកម្ម និងការបង់ពន្ធជាប្រាក់រៀលជាដើមនោះ អតិថិជនពិតជាទទួលបាននូវអត្ថប្រយោន៍ច្រើន ដូចជា អាចកាត់បន្ថយលើការចំណាយប្រតិបត្តិការ និងបង្កើនប្រាក់ចំណេញបានច្រើន នៅពេលដែលពួកគេមានគណនីធនាគារជាប្រាក់រៀលស្រាប់ ដោយកាត់បន្ថយនូវហានិភ័យពីអត្រាប្តូរប្រាក់ ។ ជាមួយគ្នានេះ សម្រាប់ការដាក់ប្រាក់បញ្ញើជាប្រាក់រៀល អតិថិជនក៏ទទួលបានអត្រាការប្រាក់ល្អជាងប្រាក់ដុល្លារអាមេរិកផងដែរ » ។
លោកបន្ដថា ៖« ស្របតាមការលើកទឹកចិត្ត និងបទប្បញ្ញត្តិរបស់ធនាគារជាតិនៃកម្ពុជា យើងនឹងបង្កើនការផ្សព្វផ្សាយយ៉ាងទូលំទូលាយអំពីសារសំខាន់ និងរួមចំណែកនៃការប្រើប្រាស់ប្រាក់រៀលទាំងក្នុងវិស័យធនាគារ និងសកម្មភាពសេដ្ឋកិច្ចក្នុងស្រុកទាំងមូលឲ្យកាន់តែទូលំទូលាយថែមទៀត » ។
លោកបន្ថែមថា តាមរយៈការជួយឧបត្ថម្ភ ពីសំណាក់ធនាគារជាតិនៃកម្ពុជា ប្រាក់រៀលត្រូវបានរំពឹងថា នឹងមានចរាចរណ៍កើនឡើងជាលំដាប់នៅក្នុងប្រទេស ដែលនឹងជំរុញប្រសិទ្ធភាពក្នុងការអនុវត្តគោលនយោបាយរូបិយវត្ថុ ។ ដោយឡែក ធនាគារជាតិនៃកម្ពុជា នឹងមានលទ្ធភាពកាន់តែច្រើន ក្នុងការគ្រប់គ្រងគោលនយោបាយម៉ាក្រូសេដ្ឋកិច្ច និងអភិវឌ្ឍន៍សេដ្ឋកិច្ចជាតិប្រកបដោយចីរភាព ហើយប្រសិនបើប្រាក់រៀលជារូបិយវត្ថុចម្បងនោះ ក៏នឹងលើកកម្ពស់កិត្យានុភាព និងអធិបតេយ្យភាពរបស់ប្រទេសជាតិផងដែរ ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា ក៏បានឲ្យដឹងថា ក្នុងនាមជាប្រតិបត្តិករក្នុងវិស័យមីក្រូហិរញ្ញវត្ថុកម្ពុជា លោកបានជំរុញឲ្យមានការប្រើប្រាស់ប្រាក់រៀលឲ្យបានទូលំទូលាយទៅតាមការណែនាំរបស់ធនាគារជាតិនៃកម្ពុជា ក្នុងនោះបណ្ដាមីក្រូហិរញ្ញវត្ថុនានាបានលើកទឹកចិត្តអតិថិជនឲ្យប្រើប្រាស់ប្រាក់រៀលកាន់តែច្រើន ។ ចំណែកគ្រឹះស្ថានមីក្រូហិរញ្ញវត្ថុដែលមានសិទ្ធិទទួលប្រាក់បញ្ញើពីអតិថិជន បានផ្ដល់ការប្រាក់ខ្ពស់ចំពោះអតិថិជនណាដែលយកប្រាក់រៀលមកដាក់បញ្ញើ ។ លោកថ្លែងថា ៖« ការលើកទឹកចិត្តឲ្យអតិថិជនចំពោះការដាក់ប្រាក់បញ្ញើជាប្រាក់រៀលទទួលបានការប្រាក់ច្រើនជាងការដាក់ប្រាក់បញ្ញើជាប្រាក់ដុល្លារ គឺចង់ឲ្យប្រជាពលរដ្ឋប្រើប្រាស់ប្រាក់រៀលឲ្យបានទូលំទូលាយ » ។
គួរបញ្ជាក់ថា ធនាគារជាតិនៃកម្ពុជា តែងតែជំរុញឲ្យពលរដ្ឋប្រើប្រាស់ប្រាក់រៀលឲ្យបានកាន់តែច្រើនឡើង ក្នុងនោះដែរ ស្ថាប័នមួយនេះក៏តែងតែធ្វើយុទ្ធនាការស្រឡាញ់ប្រាក់រៀល ដោយប្រកាសឲ្យសាធារណជនដែលមានប្រាក់រៀលទក់ រហែក ឬដាច់ មកប្តូរយកប្រាក់រៀលដែលថ្មីទៅប្រើប្រាស់វិញ ។ ទាំងនេះ គឺជាការយកចិត្តទុកដាក់មួយលើការលើកស្ទួយការប្រើប្រាស់ប្រាក់រៀល ។ បើតាមរបាយការណ៍របស់ធនាគារជាតិនៃកម្ពុជា កាលពីឆ្នាំ២០១៧ ធនាគារជាតិបានចាក់បញ្ចូលប្រាក់រៀលនៅក្នុងទីផ្សារប្រមាណ៣,៧ពាន់លានរៀល ដែលស្មើនឹងប្រាក់ដុល្លារប្រមាណ៩១៥លានដុល្លារអាមេរិក ៕
ចែករំលែកព័តមាននេះ