រាជធានីភ្នំពេញ ៖ យោងតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយផ្ញើជូនសម្តេចតេជោ ហ៊ុន សែន នាយករដ្ឋមន្ត្រីព្រះរាជាណាចក្រកម្ពុជាបានឲ្យដឹងថា ខេត្តទាំង៧ដែលកំពុងរងគ្រោះនោះរួមមាន ខេត្តកោះកុង ប៉ៃលិន បាត់ដំបង កំពត ព្រះសីហនុ កែប និងខេត្តកំពង់ស្ពឺ ។ ក្នុងនោះខេត្តកំពង់ស្ពឺរងប៉ះពាល់ខ្លាំងជាងគេ ពិសេសនៅស្រុកភ្នំស្រួច មានឃុំ៨ រងផលប៉ះពាល់ ដែលមានប្រជាជន២៣០គ្រួសាររងគ្រោះ ស្រូវ១១៥៧ហិកតា និងចំការស្វាយ២៣២ហិកតារងការលិចលង់ ។
បច្ចុប្បន្នកំពុងមានការព្រួយបារម្ភចំពោះកម្រិតទឹកនៅស្ថានីយ៍ពាមឃ្លៃដែលឡើងដល់៨,៣០ម៉ែត្រ(កម្រិតទឹកជំនន់) និងទំនប់រលាំងជ្រៃដោយកម្រិតទឹកឡើងដល់៧,៦០ម៉ែត្រគិតត្រឹមម៉ោង៨ព្រឹក ថ្ងៃទី១៩ ខែកក្កដា (បើឡើងដល់៧,៨០ម៉ែត្រនឹងលិចផ្សារកំពង់ស្ពឺ) ។
ចំណែកខេត្តព្រះសីហនុ ចំណុចដែលប្រឈមខ្លាំងគឺនៅត្រង់ស្ពានសំរោង ភូមិស្ទឹងសំរោង ឃុំអូរបាក់រទេះ ស្រុកកំពង់សិលាដែលកាលពីថ្ងៃទី១៨ ខែកក្កដា ទឹកលិចថ្នល់ជាតិលេខ៤ ប្រវែងប្រមាណ ៩០០ម៉ែត្រ មានកម្ពស់ទឹក១,៧០ម៉ែត្រហើយរហូតដល់វរលាម៉ោង៧និង៥០នាទីយប់ថ្ងៃដដែលទឹកបានស្រកនៅត្រឹមកន្លះម៉ែត្រ ហើយបានធ្វើឲ្យប្រជាពលរដ្ឋប៉ះពាល់ចំនួន៣ភូមិស្មើប្រណាណ៩០០គ្រួសារ ។
ដោយឡែក ខេត្តកំពត មានភ្លៀងធ្លាក់ច្រើននៅតាមផ្លូវជាតិលេខ៣ និងលេខ៤១ ទឹកជន់លិចពេញតាមដងផ្លូវ។ គិតត្រឹមម៉ោង ៧ល្ងាចថ្ងៃទី១៨ ខែកក្កដា រដ្ឋបាលខេត្តកំពត បានប្រកាសអាសន្ននូវគ្រោះទឹកជំនន់ក្នុងភូមិអណ្តូងជី ឃុំកំពង់ក្រែង ស្រុកទឹកឈូ ទឹកឡើងដល់កម្ពស់ ៨,២ម៉ែត្រ ។
ខេត្តកោះកុង មានឃុំ៥ ក្នុងស្រុកចំនួន៤ រងការលិចលង មានប្រជាជនប្រមាណ ៥៥១គ្រួសារត្រូវជម្លៀសទៅកាន់ទីទួលសុវត្ថិភាព ។ ខេត្តប៉ៃលិន មានភ្លៀងធ្លាក់ច្រើន ស្ទឹង អូរ ព្រែក មានទឹកពេញទាំងអស់ ដោយសារទឹកភ្លៀងបានហូរធ្លាក់ពីប្រទេសថៃ (ខេត្តត្រាត)។
ចំណែកខេត្តកែប ស្ថានការណ៍ទឹកភ្លៀងអាចគ្រប់គ្រងបាន ។ រីឯខេត្តបាត់ដំបង មានស្រុកមួយចំនួនរងគ្រោះ ដូចជាស្រុកសំឡូត លិចភូមិចំនួន៤ និងប៉ះពាល់ដល់ឃុំចំនួន៣ គឺឃុំព្រែកនរិន្ទ ឃុំព្រែកខ្ពប និងឃុំព្រែកហ្លួង។
ជំនន់ទឹកនេះ បានធ្វើឲ្យស្រូវកំពុងហាលផ្កា៥០ហិកតា ខូចខាតទាំងស្រុង និងប្រឈមខូចខាតជាង១,០០០ហិកតា និងលិចផ្ទះប្រជាពលរដ្ឋ ១០៩ខ្នង នៅស្រុកឯកភ្នំ ។ កម្ពស់ទឹកនៅទំនប់សេកសក និងទឹកទំនប់គង្ហត កំពុងមានការព្រួយបារម្ភ ។ ចំណែកស្ពានបឹងអូរជាង ឃុំកំរៀង ស្រុកកំរៀងមានប្រេះដីនៅគល់ស្ពាន និងមានការបាក់ច្រាំងស្ទឹងសង្កែប្រមាណ១០០ម៉ែត្រ ។
ជំនន់ទឹកភ្លៀង គឺបង្កឡើងដោយឥទ្ធិពលព្យុះទី៩ ឈ្មោះ សុន ទីញ កំពុងរំកឹលទៅក្បែរដីគោកក្រុងហាណូយ ស្របពេលដែលព្យុះទី១០ កំពុងវិវត្ដកើតមកឡើង ។
គួរបញ្ជាក់ផងដែរថា ដើម្បីឆ្លើយតប ក្នុងការសង្គ្រោះបន្ទាន់ សម្ដេចតេជោ ហ៊ុន សែន ក៏បានអំពាវនាវ មុនរដូវវស្សា អាជ្ញាធរដែនដី និងប្រជាពលរដ្ឋ មានការប្រុងប្រយ័ត្ន និងត្រៀមបង្ការខ្ពស់ ចំពោះគ្រោះធម្មជាតិ ដូចជា ទឹកជំនន់ ខ្យល់ព្យុះ រន្ទះបាញ់ ដែលអាចកើតមានតាមការព្យាករណ៍របស់ក្រសួងជំនាញ ដើម្បីកាត់បន្ថយផលប៉ះពាល់ និងខូចខាតទាំងទ្រព្យសម្បត្តិ ផលដំណាំ និងអាយុជីវិត ៕
ចែករំលែកព័តមាននេះ