មិនដឹងម៉េចរអិលថយក្រោយ ទៅបុករះដេប៉ូលក់សម្ភារគេ
- ព្រះសីហនុ
ខេត្តព្រះសីហនុ ៖ រថយន្តដឹកសម្ភារសំណង់សំពីងសំពោងក្រុមហ៊ុនរាជសីហ៍ឡូធីស្ទីក បើកបរខុសលក្ខណបច្ចេកទេស ថយក្រោយបុករះដេប៉ូលក់ចែកចាយហ្កាស់យីហោសន្តិភាព រងការខូចខាតសម្ភារលក់ដូរ តែមិនបង្កឲ្យរងរបួស ឬប៉ះពាល់ដល់អាយុជីវិតមនុស្សទេ។ក្នុងហេតុការណ៍គ្រោះថ្នាក់ចរាចរណ៍ដែលមិនគិតដល់ ខណៈដែលរថយន្តដឹកទំនិញសម្ភារសំណង់សំពីងសំពោងដែលមានស្លាកសញ្ញាសម្គាល់រថយន្តរបស់ក្រុមហ៊ុនខាងលើពេលកំពុងបើកបរតាមវិថីលេខ១០៨ ស្ថិតក្នុងសង្កាត់លេខ០២…
លុះដល់ចំណុចតភ្ជាប់ និងវិថីមិត្តភាពដែលជាផ្លូវចំណោតឡើង ស្រាប់តែរថយន្តដឹកទំនិញខាងលើបានរអិលថយក្រោយយ៉ាងលឿនមកបុករះដេប៉ូលក់ចែកចាយហ្កាស់ និងហាងជួសជុលសម្ភារអគ្គិសនី ដែលមានទីតាំងស្ថិតនៅចំណុចកើតហេតុខាងលើ បណ្តាលឲ្យរងការខូចខាតសម្ភារលក់ដូរអស់ជាច្រើន ប៉ុន្តែមិនបានបណ្តាលឲ្យរងរបួស ឬគ្រោះថ្នាក់ដល់អាយុជីវិតមនុស្សទេ ។
សមត្ថកិច្ចនគរបាលការិយាល័យចរាចរណ៍ផ្លូវគោកនៃស្នងការរដ្ឋាននគរបាលខេត្តព្រះសីហនុបានឲ្យដឹងថា ហេតុការណ៍ខាងលើបានកើតឡើងនៅវេលាម៉ោង១០និង១៥នាទីព្រឹក ថ្ងៃទី២០ ខែកក្កដា ឆ្នាំ២០១៨នៅកន្លែងកើតហេតុខាងលើ ។ ប្រភពខាងលើបានបន្តឲ្យដឹងទៀតថា អ្នកបើកបររថយន្តបង្កហេតុឈ្មោះ គេង គង់ ភេទប្រុស អាយុ២៤ឆ្នាំ មានទីលំនៅភូមិទួលទ្រេប ឃុំមៀន ស្រុកព្រៃឈរ ខេត្តកំពង់ចាម ។ បើកបររថយន្តពណ៌ស លាយខៀវ ពាក់ស្លាកលេខស្វាយរៀង3A-1415 ជារថយន្តរបស់ក្រុមហ៊ុនដែលមានយីហោខាងលើ ។
អ្នកបើកបររថយន្តខាងលើបានឲ្យដឹងថា ខណៈរូបគេបើកបរមកដល់ចំណុចកើតហេតុជាផ្លូវឡើងចំណោតផង ហើយនៅចំណុចខាងមុខ កំពុងតែស្ទះចរាចរណ៍ផង ស្រាប់តែរថយន្តហ្វ្រាំងមិនជាប់មានបញ្ហាបច្ចេកទេសក៏រអិលថយក្រោយមកបុក និងដេប៉ូខាងលើតែម្តងទៅ ។ ក្រោយកើតហេតុអ្នកបើកបររួមទាំងរថយន្តបង្កហេតុត្រូវបានសមត្ថកិច្ចនគរបាលជំនាញនាំយកទៅរក្សាទុកនៅការិយាល័យនគរបាលចរាចរណ៍នៃស្នងការរដ្ឋានខេត្តព្រះសីហនុ ដើម្បីធ្វើការដោះស្រាយទៅតាមនីតិវិធីច្បាប់ ។
ចែករំលែកព័តមាននេះ