ខេត្តកំពង់ធំ ៖ ស្ត្រីម្នាក់អង្គុយក្នុងហាងគុយទាវកាហ្វេសុខៗ ស្រាប់តែងងឹតមុខធ្លាក់ពីលើកៅអីស្លាប់បាត់បង់ជីវិតបន្ទាប់ពីបញ្ជូនដល់មន្ទីពេទ្យ ។ ហេតុការណ៍នេះបង្កឱ្យមានភាពភ្ញាក់ផ្អើលពេញហាងគុយទាវកាហ្វេមួយកន្លែងកាលពីវេលាម៉ោង៤ល្ងាចថ្ងៃទី១៩ ខែកក្កដា ឆ្នាំ២០១៨ស្ថិតនៅចំណុចហាងគុយទាវកាហ្វេមួយកន្លែង ក្នុងភូមិតាំងក្រសាំង ឃុំតាំងក្រសាំង ស្រុកសន្ទុក ខេត្តកំពង់ធំ ។
ស្ត្រីដែលស្លាប់ឈ្មោះវិន សារឿន អាយុ៤៦ឆ្នាំ មានទីលំនៅភូមិតាំងក្រសាំង ឃុំតាំងក្រសាំង ស្រុកសន្ទុក ។
តាមប្រភពពីសមត្ថកិច្ចបានឱ្យដឹងថា ស្ត្រីរងគ្រោះសង្ស័យស្លាប់ដោយសារគាំងបេះដូង ឬជំងឺលើសឈាម ។
បើតាមការបំភ្លឺពីលោកថាច់ មន្នីរ័ត្ន អាយុ៥៨ឆ្នាំ ជាម្ចាស់ហាងគុយទាវកាហ្វេបានឱ្យដឹងថា មុនពេលកើតហេតុ ស្ត្រីរងគ្រោះបានដឹកដៃកូនស្រីអាយុប្រហែល៦ឆ្នាំចូលជ្រកភ្លៀងក្នុងហាងគុយទាវរបស់គាត់ ព្រោះភ្លៀងនឹងខ្យល់ខ្លាំង ។
លោកបានបន្តទៀតថា ប្រហែលជា១៥នាទីក្រោយមកស្រាប់តែឃើញស្ត្រីរងគ្រោះធ្លាក់ពីលើកៅអីឮសូរតែប្រាវ លោកព្រមទាំងអ្នកហូបកាហ្វេ២នាក់ទៀតរត់ទៅជួយលើកនិងធ្វើចលនា ហើយលោកបានជិះម៉ូតូទៅប្រាប់ប្តីស្ត្រីរងគ្រោះថា «ប្រពន្ធលោកដួលសន្លប់បាត់ស្មារតីនៅហាងរបស់ខ្ញុំ» ប្តីឮដូច្នោះក៍ប្រញ៉ាប់ប្រញ៉ាល់មកមើលប្រពន្ធ ហើយបានឌុបប្រពន្ធដោយមានអ្នកឱបពីក្រោយម្នាក់ដើម្បីដឹកយកទៅសង្គ្រោះនៅមណ្ឌលសុខភាពតាំងក្រសាំង លុះពេលមកដល់មន្ទីរពេទ្យ ក្រុមគ្រូពេទ្យបានពិនិត្យជីពចរ ក្រោយពីពិនិត្យមើលជីពចររួច ក្រុមគ្រូពេទ្យបាននិយាយថា «ចូលរួមសោកស្តាយផង ប្រពន្ធលោកបានស្លាប់បាត់ទៅហើយ» គ្រាន់តែឮគ្រូពេទ្យប្រាប់ភ្លាម ប្តីនិងកូនបានយំសោកបោកខ្លួន ព្រោះមួយប៉ប្រិចភ្នែកបាត់បង់ប្រពន្ធបាត់បង់ម្តាយជាទីស្រលាញ់ជារៀងរហូត ។
បច្ចុប្បន្ន សពស្ត្រីរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ